Инбам сьӧры уг лобӟиськы…

Удмурт Дунне
By Удмурт Дунне 29 февраля, 2012 09:43

Инбам сьӧры уг лобӟиськы…

Ваня Белослудцев.

Ижын ортчем «Дарт» дискотекае лыктэм адямиосты аслаз кырӟанъёсыныз паймытӥз егит бард — Ваня Белослудцев. Тросэз синмаськизы солэн жингырес куараезлы, чебер кырӟанъёсызлэн шулдыр крезьгурзылы. Кез ёросысь Александрово гуртысь 17 аресъем пияш яркыт кизилиен ӝуатскиз удмурт эстрадаын.

Ваня Удмурт кун университетысь удмурт филология факультетын дышетске. Пичи дырысен ик со кыл, литература, история борды кыстӥськиз, математикаез ӧз яраты. Маин али тунсыкъяське егит усточи? Мар малпа туала удмурт крезьгур сярысь? Кемалась-а эшъяське гитараен?

— 2008-тӥ арын «Орлёнок» лагерьын шутэтски. Отын трос егитъёс гитараен шудо но кырӟало вал, соослы вожъяськи, — веранзэ мытэ Ваня Белослудцев. — Соин ик гуртам бертэме бере атайме косӥ гитараен шудыны дышетыны. Со мыным валтӥсь аккордъёсты возьматӥз. Ны­рысьсэ сцена вылэ потӥ ас гурт клубам ик, пӧртэм ужрадъёсы пыриськылӥ. Умойгес шудыны кутскеме бере ӵужапае, Анна Ворончихина, ӵектӥз: ойдо, пе, мынам кылбуръёсылы крезьгур го­жтом. Со ик луиз нырысетӥ вамыш. Собере малпаськи: оло, аслым кылбур гожтыса утчано? Озьы гуръёсылы кылъёс кылдӥзы, нырысь ӟуч кылын, нош УдГУ-э дышетскыны пыреме бере удмурт сямен но гожъяны кутски.

Усточи верамъя, кылбур гожтыны крезьгурлэсь секытгес, пе, йӧтэ. Ванялы туж кельшо кунгож сьӧрысь пӧ­р­тэм рок-группаос, кыл­сярысь, Linkin park, Switchfoot, Everlast, Mew, Stone So­ur. Котькыӵе егит муртлэн сямен ик, В. Белослудцевлэн кырӟанъёсыз яратон сярысь.

— Мон — романтик. Сое валалоды, кырӟанъёсме кы­л­­­зӥськиды ке. Отын куректонэз но шумпотонэз, тодэ ваёнъёсысь но али улонысь мылкыдъёс вань. Инбам сьӧры мон уг лобӟиськы, ваньмыз басьтэмын зэмос учыръёсысь. Туннэ нуналлы куать кырӟанэ ини. Но со кутсконэз гинэ ай. Тросгес егитъёс милемды мед кылзӥськозы шуыса, котькуд кырӟанмес аспӧртэмлыко карыны турттом. Озьыен, мукет калыкъёслы возьматом, удмуртъёс пӧлын но туж тунсыко, быгатӥсь адямиос вань шуыса. Али удмурт эстрадаын тросэз бадӟымъёслы тупась кырӟанъёсы быдэсто, соос огвыллемесь. Соин ик ми удмурт лулчеберетэз узырмытыны но вылӥегес ӝутыны тыршом. Вань на мынам эшшо одӥг бадӟым малпанэ: кырӟанъёсме студиын гожтэм потэ.

Мария Векшина.

Удмурт Дунне
By Удмурт Дунне 29 февраля, 2012 09:43