Демократия кисьмалоз

Удмурт Дунне
By Удмурт Дунне 10 февраля, 2012 10:34

Зэмос демократия огкутскемен уг кылды, кинлэсь ке адӟем карыса гинэ, уг быдэсмы, гожтэ «Коммерсант» газетын Россилэн премьерез Владимир Путин «Демократия но кунлэн ӟечлыкез» статьяяз.

1990-тӥ аръёслэн кутсконазы адямиос лӧптӥзы советской система куашкамлы. Иське, власть ӝоген вуоз калык кие. Демократиез кылдытон понна асьме кунамы нырысь кутсконо луиз экономикаын реформаос ортчытон борды. Нош таиз борды нориськизы олигархъёс — соос государствоез киултӥзы, кун ваньбурен возьдаськытэк кузёяськыны ӧдъязы.

Обществомы пырпотӥз секыт быдэ вуон сюресэз. Быгатӥмы странамес нюрысь кыскыны. Туннэ асьмелэн кунмы трослы мукет, 2000-тӥ арен ӵошатыса. Адямиос узыргес, визьмогес луо, таин валче куронъёссы но йыло.

Шара луон

Россиысь гражданъёс берло дыре дышизы ивор шедьтыны, Интернетысь одӥг кнопкаез зӥбыса. Эрик вань бере, калыклэн пыриськемез потэ политикае но, кивалтонэ но. Соин валче адямиос, калык огазеяськонъёс мед быгатозы азьло ик эскерыны кун документъёсты.

Асьмеос али ик кыӵе ке закон пумысен кенешыны быгатӥськом Интернетын. Котькуд мурт аслэсьтыз ӵектонзэ келяны быгатэ. Ӟечъёссэ пыртыны луэ законлэн берпуметӥ версияз. Таӵе амалэз, экспертъёс сое краудсорсинг шуо, кутыны мед быгатом закон кылдытонлэн вань тубатъёсаз.

Статьялэн та люкетэз уката кельшиз егитъёслы. Удмуртиысь Егитъёслэн парламентсылэн тӧроез Андрей Макаров пусъе:

— Политической улонын та выль малпан. Умой ӵектэмын: кыӵе ке закон пумысен Интернетын 100 сюрс куара люкаськиз ке, сое одно ик эскерыны кулэ Кун Думаын. Валамон, таӵе дыръя «вотэсын» пукисьёс «нимтэм» кариськыны уз быгатэ. Но та ӟеч практика луысал, уката ик таӵе амалъя, пе, Великобританиын ужало ни.

Нимысьтыз вераськон «Электрон Правительство» проект пумысен. Адямиос Интернетысь тодыны быгато политикаын вожвылъяськонъёс сярысь, тодмо артистъёслэн но кырӟасьёслэн люкиськемзы-кышнояськемзы пумысен. Со дыре ик ЖКХ удыс понна тыронъёссэс адӟыны уг быгато, больницаысь картазы онлайн амалэн уг усьтӥськы. Зэм, тросэз кун услугаос электрон амалэ выжтэмын ни.

— Правительстволэн огез валтӥсь ужез — калыклы ивор сётон. Кивалтӥсь но огшоры адями вискын ваче вераськон мед луоз. Интернет вань дыръя таӵе диалогез радъяны нокыӵе шугъяськонъёс уг кылдо ни. Путинлэсь та ӵектонзэ кивалтӥсьёс мед санэ басьтысалзы, — мылкыдзэ вера ИжГТУ-ысь студентъёслэн профкомзылэн тӧроез Валентин Анисимов.

 

Вылласянь коньдон уз усьы

Бадӟым кунлэн демократиез кылдэ интыосын шара но эрико ужам бордысь. Вылӥ кивалтӥсьёс кыданы кулэ, интыысь кивалтон удысъёсын тыршыса. Со вакытэ ик гуртысь, ёросысь йыръёслэн кужымзы мед луоз. Нырысь ик, муниципалитетъёс калыклы матын мед луозы. Собере, тырмоз ни интыысь кивалтӥсьёсты коньдон ласянь пачкатыны. Вылӥослэсь юрттэмзэс возьмаса, медаз улэ.

Сарапул ёрослэн йырыз Игорь Асабин премьерлэн таӵе малпанъёсыныз туж соглаш:

— Лыдъясько, Владимир Путинлэн ӵектонъёсыз дыраз верамын. Соос кемалась кисьмамын ни. Тани 131-тӥ законэз кутэм бере троссэ ужпумъёсты быдэстыны кулэ вал интыосын — гуртлэн, ёрослэн, городлэн кужыменызы. Но талы тырмыт коньдон ноку ӧз люкаськылы.

Нимысьтыз верасал гурт поселениос сярысь.Законын чакламын соослы тросгес полномочиос но кыл кутон сётыны. Но ужез коньдонтэк нокызьы уд вырӟыты.

Бен, улос кивалтэт юрттӥське. Озьы ке но куддыръя решениосты кутон ӝега. Та ужпумъёсты быдэстон но коньдон висъян ужъёс сётэмын мед луысалзы ёросъёслы. Соку муниципал кылдытэтъёс асьсэ понна быгатысалзы тужгес сюлэмшугъяськытӥсь юанъёсты сэрттыны, кулэ луэмезъя уксё висъяны.

Путинлэн таӵе ӵектонэз тужгес кулэ ми понна. Солэсь быдэсъяськемзэ соку ик шӧдоз Россиысь котькуд адями. Малпасько, уката ик — милям ёросамы улӥсьёс.

Покчи но шоро-куспо ужбергатонэз Правительстволэн Тӧроез сётыны ӵектэ интыосысь бюджетъёсы. Тазэ вань гурт поселениос уз шӧдэ. Угось гуртъёсын ужбергатон огкадь уг азинскы. Умой, гурт сюресъёслы матын ке. Шуом, Кам шур вӧзын ик интыяськемын ке. Нош куд-ог муниципал кылдытэтъёслы ужбергатон номыр но уз сёты. Кыӵе ке районъёсын ужбергатонлэсь пайда ке уг поты, соослы коньдонэн юрттэт озьы ик висъяно луоз.

Сарапул ёрослы пичи но шоро-куспо ужбергатонлэсь вытъёс туж юрттысалзы. Милям районмылы синмасько коньдонэн узыр компаниос. Али ик кӧня ке ӟеч проектъёс пыӵало ни. Малпасько, туэ выльёсыз луозы. Соин оскем потэ, ужбергатонлэсь пайдазэ адӟомы.

Ми туж возьмаськом воштӥськонъёсты. Уго Владимир Путин гожтэ, бичам вытъёслэн бадӟым люкетэз интыосы кылёз шуыса. Озьыен, налогъёс матын луозы гуртлы, музъемлы, калыклы — та туж ӟеч малпан.

Дасяз Елена Скворцова.

Удмурт Дунне
By Удмурт Дунне 10 февраля, 2012 10:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<