ВТО: выль сямен бергано

Удмурт Дунне
By Удмурт Дунне 14 февраля, 2012 07:18

Асьме предприятиос но заводъёс кризисысь потӥзы. 2008-тӥ арен ӵошатыса, производствомы йылӥз 118 процентлы. Поттэм вузмы республикае 2011-тӥ арын 289 миллиард манет вайиз. Тазьы шуэ Удмуртиысь промышленностья но энергетикая министр Олег Радионов.

 

Ляб адӟон уг люкеты

Кылем арын республикамы Россиысь трос улосъёсты паймытӥз аслаз дӥсьтонэныз но быгатонлыкеныз. Музон улосъёс пӧлысь асьме дорын нырысьсэ ужаны кутскиз инвалидъёслы уж сётонъя программа. Озьы 700-лэсь ятыр ляб адӟисьёс Ижысь «Спутник» заводын поттыны быгатӥзы курегпузлы чаклам лоток. Со сяна, татын ик азьланяз малпало лэсьтыны полипропиленлэсь пуйыос но мешокъёс. Сарапулысь «Промтехника» предприятиын поттыны кутскизы полипропиленлэсь гумыос, мясорубкалы ёзъёс. Таос ик «Глазов. Электрон» огазеяськонэн ӵош лэсьто пӧртэм тунгонъёс. Берлояз заводын малпало ляб адӟисьёсты тросгес кыскыны машиналы чаклам жгутъёсты дасянэ. Федерал бюджет но Россиысь Сукыръёслэн огазеяськонзы ваньзэ тае улонэ пыӵатыны висъяз 56 миллион манет.

Но тыршем сяна, инвалидъёс шулдыръяськыны, спортэн вырыны ярато. Кивалтӥсьёссы соос понна нимысьтыз интыос но висъяло. Сотэк-а куасэн бызьылонъя ӵошатсконъёсын асьмелэнъёс ӟеч интыос басьто? Ужаны но шутэтскыны быгатэммес адӟем каро ни музон улосъёс но.

2011-тӥ арын ӟеч тыршеменыз ушъяськыны быгатӥз республикаысьтымы 21 предприятие. Радиацилэсь, кышкытлыклэсь утиськонъя, обороная но мукет федерал программаосъя ужаменызы соос Россилэн бюджетысьтыз кыскыны быгатӥзы 720 миллион манет.

Уноез предприятиос поттоно вуззылэсь быдӟалазэ будэтӥзы. Сыӵеос пӧлы пыро «Купол», «Элеконд», Сарапулысь радиозавод, Воткаысь завод. Берлоез сярысь пусйыкуз, Олег Радионовлэн мылкыдыз ик ӝутӥськиз. Ма, кызьы шум уд поты? Татын производствозэс йылтэмен гинэ уг буйгало, заводзэс но выльдо. Кылсярысь, али отын кылдыто термической цех, вакуум комплекс.

 

Гужем — выль машина

— Туэ но машина поттон удыслы аналскыны ум сётэ — чакламъя выль 70 сюрс автомобиль кылдоз. 2000-тӥ арен ӵошатыса, та 2 но ӝыны поллы тросгес, — оскытэ Радионов. — Туэ июль-август толэзьысен поттыны кутскомы «Лада Грантаез». Туннэ «АвтоВАЗ» предприятиын выль машиналы чаклам оборудование лэсьтӥське ни. Ужасьёсты дышетон мынэ. Азьланяз малпанъёс вань араз 350 сюрс «Лада Гранта» бичаны. Но та модель вылын киоссэс волятыны кутскытозь, азьланьтӥськоз ВАЗ-2104, ВАЗ-2107 но ИЖ-27175 машинаосты поттон.

Ӟеч вылэм, машинаосты утилизацие сётонъя программа туэ но ужасалыз ке. Та пумысен Москвае гожтэт келямын ни.

 

11 кивалтӥсь тузэмын

Калыклэн «Буммаш» завод сярысь, сюлэмыз вӧсь луытэк, кылэмез уг луы. Я ужасьёссэс отын кулэсто, я уждун олокӧня толэзьёсын уг тыро, я производствозэс дугдыто. Туннэ завод банкротэн ялэмын. Олег Радионов шуэ:

— «ИжАвтоын» но Сарапул радиозаводын югдур солэсь но секыт вал — кузёосыз лушкаськизы но гылӟизы. «Буммаш» воксё куашкан калэ вуэмын ӧвӧл. Туннэ со дасяське выль сямен ужаны, отын реорганизация ортче. Котьма ке но «Буммашын» лэсьтэм вуз данын. 2010-тӥ арен ӵошатыса, завод кылем арын 110 процентлы тросгес ваньбур поттӥз.

Министр югдур тупатымон шуыса оскытэ ке но, 2011-тӥ ар кутсконын 55 миллион манет тыр уждун ӝегатэмын «Сарапул радиозавод», «Родина», «Агрокомплекс», «Пычас свинокомплекс» но «Троицкое» огазеяськонъёсын. Кивалтӥсьёссэс зуркатон вылысь кыткемын вал Правительство но, прокуратура но. Пӧсятъямъёслэн пайдазы луиз ик: куд-ог огазеяськонъёс пунэмзэс кысӥзы. Кылсярысь, «ЧУС», «Чепца», «Ошмес» заводъёс. Административной кыл кутон улэ кыскемын 419 кивалтӥсь. Таос пӧлысь 11-ез пуконысьтызы вольтчытэмын.

 

Вьетнамен Китай уз кекатэ

Республикаысьтымы 60 процентэз предприятиос туннэ ик дасесь ни Дуннеысь вуз каронъя огазеяськонлэн (ВТО-лэн) куронъёсызъя ужаны. Но мукетъёсыз но пумен ӧразы пырозы. Выль сямен берганы дышон понна уго 5-ысен 7 арозь дыр сётӥське.

— Уноез предприятиосмы, дуннеысь вуз каронъя огазеяськонэ пырыса, вормозы гинэ. Кылсярысь, металлургия. Сьӧд но чибориё кортъёсмылы быдэс дуннеын синмаськисез лачак. Но татчыозь солы сюрес пытсамын вал: Америка, куд-ог мукет кунъёс курон пуктылӥзы — тамындазэ гинэ вуздэс, пе, дорамы пыртыны лэзиськомы. ВТО-ен огкылысь ужаны кутскыса, сыӵе пыдпуктонъёс бырозы.

Зэм, зуркытгес йӧтоз, дыр, капчи промышленностьлы. ВТО уго ӧсъёсты паськыт усьтоз Вьетнамысь но Китайысь дунтэм вузъёслы. Кунмы палэнысь вуись вуз шоры чиньы пыртӥз уз учкы, чаклалоз, макем со ӟеч.

Елена Фёдорова.

Удмурт Дунне
By Удмурт Дунне 14 февраля, 2012 07:18