Воштӥськы вакытэн ӵош!

Удмурт Дунне
By Удмурт Дунне 29 февраля, 2012 09:28

Воштӥськы вакытэн ӵош!

Андрей Фурсенкоен пумиськонын.

Россиысь дышетонъя но наукая министр Андрей Фурсенко, Удмуртие вуылыкуз, кык час ӵоже кенешиз элькунысьтымы вылӥ учреждениосысь дышетскисьёсын. Пумиськон ортчиз студентъёслэн «Интеграл» дворецазы. Москваысь куно 28 юанлы валэктыны вуиз.

Пумиськонлэн кутсконаз ик министр ӵектӥз возьдаськытэк шара вераськыны. Залысь микрофон дорын соку ик черод кылдӥз. Ваньмызлэсь сэзь луэмзэ возьматӥз Ижысь медициная кун академиын дышетскись Дмитрий Храмов. Со вузын ньылетӥ арзэ визь люка ни. Кышнояськемын. Пиналзы вань. Ужа медбрат луыса реанимациын. Со понна толэзяз 6 сюрс манет басьтэ. 2 сюрс манет вуэ кисыяз стипендия чотын.

— Вералэ, кызьы куинь мурт улыны кулэ 8 сюрс манетлы? Удмуртиын улыны луымон лыдпуслэн быдӟалаез 5 сюрс манетлэсь вылӥын, — вазиськиз кивалтӥсьлы студент.

— Берло вакытэ ми вузъёслы луонлык сётӥм стипендия фондэн асьсэлы кузёяськыны. Академидылэн кивалтӥсьёсыз, студентъёс, кыӵе ке но огазеяськонъёсты мед чаклалозы, кудӥзлэсь стипендизэ йылэтоно, кинлэсь — кулэстоно. Ваньзэ одӥг кабъя уд дунъя ук! Юрттоно тужгес ёрмисьёсызлы, устогес дышетскисьёсызлы, — валэктыны но буйгатыны выриз министр. Со дыре ик пусйиз, Дмитрий кадь студентъёс сокем трос ӧвӧл. Дэмлаз та ужпумез нимаз эскерыны.

Глазысь Алла Чиркинаез шугъяськытэ дышетӥсьёс-лэн мӧйымемзы. Егитъёс пединститут бере школае уг дырто.

— Кин дышетоз мынэсьтым нылпиме — 50 ареслэсь ортчем адями? — юаз нылаш.

— Мон уг лыдъяськы, Россиын туннэ дышетӥсьёс уг тырмо шуыса, — вераз Фурсенко. — Быдэс странаямы уг окмо 4 сюрс педагогъёс. Со трос ӧвол. Москваын, мукет бадӟым городъёсын берло дыре школае озьы гинэ уд интыяськы. Конкурс пыр ортчоно луэ. Чаклано мукетсэ но. Асьмемыз вите ужлы ёрмон, малы ке шуоно дышетскисьёслэн лыдзы арысь аре кулэсме, со герӟаськемын демографиен но экономикаын шуг-секытъёсын, куке анай-атайёс ӧз дӥсьтылэ пинал вордыны.

Министрез зол гинэ курад-ӟытӥзы огъя кун экзамен (ЕГЭ) пумысен. Одӥгез студент таӵе чакламзэ шараяз: Америкаын улӥсьёс Интернетын ӵемгес юаллясько математика, наука, Толэзь пумысен, нош Россиын нырысетӥ интыын мыно ЕГЭ, солы валэктонъёс утчамен герӟаськем куронъёс. Югдур возьматэ ук: егитъёслэн уг поты визь-нод люкамзы, соос дасьсэ шедьтыны но озьы экзамензэс сётыны выро.

— Оске, эшъёсы, ЕГЭ — визез чакланъя умойтэм амал, но солэсь ӟечсэ нокин но та дырозь ӧз малпа на! — Андрей Александровичлэн тусыз ик воштӥськиз. — ЕГЭ луонлык сётэ кыдёкысь гуртын улӥсь яке куанер семьяын будӥсь егит муртлы Россиысь валтӥсь вузъёсы пырыны. Азьло сыӵе луонлык ӧй вал.

Студентъёс ӵекто ЕГЭ-эз но кельтыны, со дыре ик экзаменэз азьло сямен но сётыны луонлыкез утьыны.

Озьы уз луы, ЕГЭ юрттэ коррупциен нюръяськыны, валэктӥз кивалтӥсь.

— Ӟечбуресь, мон Анастасия Петрова! — зал тыр чузъяськиз удмурт кыл.

УдГУ-ысь удмурт филология факультетын дышетскись нылаш министрлы но, егит эшъёсызлы но тодазы вайытӥз, 21-тӥ феврале дуннеын Анай кыллэсь нуналзэ пусъё шуыса.

— Удмурт кыл — чебер кыл, мукетъёсыз кадь ик, — вазиськиз Фурсенко, — тодӥськоды-а, дуннеын трос верасько соиз будос, таиз кибы быро шуыса, но малы ке но шер поттыло йырвизь ласянь пӧртэмлыкез утён сярысь. Юнме шат пӧртэм интыосын улӥсьёс пумен юнгес ог-огзылы укшаны ӧдъяло? Умой луоз шат, адямиос ваньмыз ик огпормаесь кылизы ке? Кылъёсты дышетыны кулэ. Но та удысын зӥбыны уг яра. Адями ачиз валаны кулэ: солы кылэз тодон ватсаса луонлыкъёс сётоз.

Удмурт студентка министрлы поттылӥз бускель Татарстанын бигер кылэз дышетон сямез.

— Э-э-э, тӥ уд тодӥське, кӧня гожтэт вуэ отысь мыным, — мылкыдзэ усьтӥз куно. — Туж зол ӝожтӥсько, кылэз кужмысь дышетыны косо шуыса. Соин ик чакласьконо, выль амал утчано кыллэсь данзэ вылэгес ӝутон понна.

Дышетонъя министрлэн Удмуртие вуэмезлэсь кӧнялы ке азьлогес газетъёсын ивор-тӥзы, Андрей Фурсенко выляз Правительствоын уз ужа ни шуыса. Ижысь студентъёс та пумысен асьсэос тодыны малпазы но меӵак юан сётӥзы.

— Тӥ малпаськоды, мынам кисыям ужысь куриськон кылле ни шуыса? Ӧвӧл, озьы ӧвӧл. Тани ук ужасько. Но котькуд чиновник интызэ бушатыны ялан дась луыны кулэ. Тани монэ юнматӥз Президент, мон азе ужпум пуктӥз. Но со ужпумез мон ӧй быдэсты на, — пусйиз Андрей Александрович.

Пумиськон пумын министр егитъёслы вазиськиз:

— Асьмеос улӥськом туж тунсыко вакытэ. Котькудӥз-лэн луонлыкез вань ассэ дышетсконын, ужын, мукет удысын возьматыны. Эн кышкалэ, эскере кужымдэс! Отӥяз сыӵе луонлык, оло, уз но кылды ни, — шуиз Москваысь бадӟым куно.

Сергей Захаров.

Удмурт Дунне
By Удмурт Дунне 29 февраля, 2012 09:28