Нянь инмысь уг усьы

Удмурт Дунне
By Удмурт Дунне Январь 24, 2012 11:04

Нянь инмысь уг усьы

Мария Глушкова, Ольга Петрова, Ольга Стародубцева но Леонид Зорин.

Ува ёросысь Свердлов нимо СПК — шоро-куспо хозяйство. Куинь ар талэсь азьло куашкан калэ вуэм эштосэз ас вылаз басьтӥз гурт удысысь тодмо кивалтӥсь Анатолий Асанов. Жужгес калыклэсь оскемзэ со умой быдэсъя, хозяйствоез огъя кужымен пыд йылаз пуктӥзы ни, шуыны луоз. Табере гуртоос шуо: медаз гинэ кошкы вал. Азьло уго гурт кузёос ӵем вошъяськизы, эштосэз ӝутон сярысь ӧз малпаськылэ. Хозяйствоен кивалтӥсь ужасьёс азе юнэсь куронъёс пуктэ, сое адямиос ӟеч валало, уж борды ӝабыр-ӝабыр басьтӥсько. Озьы хозяйствоын юнма дисциплина.

Усто специалист, дышетскемезъя зоотехник Анатолий Асанов тужгес бадӟым саклык висъя пудо вордонэз азинтонлы. Туала вакытэ уго хозяйство отысь гинэ коньдон поттэ, пайда басьтэ, уждун тыре, тыронъёссэ берыктэ но техниказэ каллен выльдэ. Эштос ӝутскон сюрес вылын, ялан будэтэ пудо уллёзэ. Али сюро тазаез — 1 сюрс 182 йыр, со пӧлысь скалъёс — 480. Соос куинь фермае интыямын: скалъёс — Жужгесын, ветылъёс — Косойын, ошпиос — Кечгуртын (Малый Жужгес).

Пудо утисьёслэн тыршемзы син азьын: 2009-тӥ арын скаллы быдэ 3 сюрс 52 килограмм йӧл кыскизы ке, валля арын — 3 сюрс 968, нош кылем арын — 4 сюрс 500. 2010-тӥ арын ваньзэ 1 сюрс 784 тонна йӧл люказы. Нош кылем арын — 2 сюрс 107 тонна, яке 323 тонналы тросгес, скаллы быдэ — 524 килограммлы ятыр. Нош туэ 5 сюрсозь вуттыны чаклало. Али но йӧл умой кыско, нуналаз скаллы быдэ шорлыдын 13-14 килограмм потэ, ортчем арысь та дырен ӵошатыса, 1 тонналы тросгес люкаське.

Азьлане вамышъёс кожазы уг лыкто. Жужгесъёс кылем арын тырмыт но ӟеч пудо сиён дасязы — одӥг пудо йырлы быдэ 30 центнер. Отчы трос кужымзэс понӥзы усто механизаторъёс — Андрей Васильев, Валентин Антропов, Алексей Камашев, Василий Семёнов, Николай Александров, Борис Кабанов, Пётр Петров, Анатолий Дмитриев… Синмаськымон ужало водительёс Андрей Соловьёв, Анатолий Глушков, Виктор Петров, Григорий Фёдоров но мукетъёсыз.

Пудо вордон оскемын чырткем кышномуртлы Ольга Петровалы. Со валтӥсь зоотехник. Ужан висказ дышетске Ижысь гурт удысъя кун академиын зооинженере.

— Визь люканы секыт ӧвӧл, калыкен ужаны шуггес, котькудӥныз огкыл шедьтыны быгатоно, — шуэ со. — Али 17 дояркамы, ваньмыз мылысь-кыдысь тыршо. Но пӧлысьтызы тужгес висъяське Любовь Нефёдова. Кылем арын со котькуд скалэзлэсь 6 сюрс килограмм йӧл кыскиз. Районлэн Данъян пул вылаз пыртэмын. Озьы ик лулысь-сюлмысь ужало Ольга Кабанова, Лидия Александрова, егит дояркаос Ольга Мадьярова, Елена Калинина но трос мукетъёсыз. Косойын ветылъёсты утялто Валентина Антропова (бригадир) но Любовь Кудрявцева. Кечгуртын ошпиосты куайыто Галина Семёнова но Галина Морозова. Пудозы нуналаз шорлыдын 600 грамм будэ. Со лыдпусэз ӝутыны луонлыкъёсмы вань ай.

Озьы ик пусйытэк кельтэме уг поты пудо эмъясьёсты Леонид Зоринэз, Раиса Широбоковаез но Ольга Стародубцеваез. Таос бадӟым саклык висъяло скалъёслэсь лейкоз висёнзэс быдтонлы. 22 ар скалъёсты бызьылытэ ни Мария Глушкова. 2005-тӥ арын со 100 скаллэсь 97 кунян басьтӥз, нош кылем арын — 79.

Жужгесъёс музъем ужез но палэнэ уг кельто. Берло дыре кык МТЗ-80 трактор басьтӥзы, нош миым нянь утялтӥсь КЗС-812 комбайн, кыкетӥзэ МТЗ-1221 трактор вуттӥзы. Озьы кылем арын, минерал сылалъёс кутытэк, котькуд гектарысь 16 центнерлэсь уно ю тысь кутсазы. Та удысэз нуэ валтӥсь агроном Марина Исаева.

— Эштос тырмыт пудо сиён дасяз. Юнме уг шуо ук: скаллэн йӧлыз кыл вылаз. Кызьы сюдод, озьы ик кыскод, — шуэ Марина Леонидовна.

Тӥни озьы жужгесъёс тыршо, каллен гурезе тубо, вормонъёссэс юнмато, нянь будэтӥсьёс но пудо утисьёс пумен тросгес уждун басьто.

Геннадий РОМАНОВ.

Туспуктӥз Владимир БЕЛОМОРСКИХ.

Удмурт Дунне
By Удмурт Дунне Январь 24, 2012 11:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<