Ӵошатон пыр улон

Удмурт Дунне
By Удмурт Дунне 31 января, 2012 10:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ӵошатон пыр улон

Та нуналъёсы 55 арессэ пусъе Удмурт кун университетысь огъя но фин-угор кылтодонъя кафедраысь методист, «Удмурт дунне» газетлэн матысь эшез Зинаида Байбекова.

— Зинаида Борисовна, газет лыдӟисьёс тӥлесьтыд нимдэс ӟеч тодо шуимы ке, ум янгышалэ. Тӥ угось трос гожъяськоды очеркъёс, тодэ ваёнъёс. Со гожъямъёстэс огазе люкаськоды-а?

— Кызьы сотэк. Мынам соос маке мында, 32 адями сярысь гожтӥськем ини. Кин тодэ, оло, азьпалан нимысьтыз книга но поттыны кылдоз ай. Вань сыӵе малпанэ. Нимаськоз, дыр, со «Удмурт кылэз азинтӥсьёс» шуыса.

— Пичи дыръяды гольык пыд бызьылэм интыды сярысь вералэ ини. Удмурт шаермылэн кыӵе сэрегаз со интыяськемын?

— Вордӥськи мон Пичи Пурга ёросысь Тыло (Сырьезшур) гуртын, туж шулдыр интыосын. Гуртмы вӧзтӥ Дада ошмес жильыртэ. Ой, со пичи дырез малпано ке, мар но тодэ уг лыкты. Мон ведь шимес шаян вылӥськем. Быдэс гуртысь нылпиосын шудӥсько вал. Оломалы пиос бордыгес кыстӥськылӥ. Аслэсьтым трослы бадӟым Самсонов Микаляен но Коляен шудэмме тодӥсько на. Кызьы мемеен тятя чидало вылэм сыӵе нылзэс? Одӥг нунал но мугоры вӧсь луытэк яке дӥськутэ кеськытэк уг кыльы вал. Сыӵе дыръя кыл но сюре вал ини мыным.

Мемеен дядяймы — туж лачмытэсь адямиос. Али ке но кыштыр гинэ тупаса уло. Дядяймы, Борис Ильич, милям уката но лякыт. Мар ке борды кутске ке, йылысеныз пумозяз лэсьтэ. Шутэтскыны потытозяз, колхозын тыршиз. Гуртамы мӧйыез но, пичиез но сое Шофёр Микол гинэ шуо. Мемеймы фермаын скал кыскиз, ялан солы юрттыны ветлӥськом вал.

— Мемейды тодмо выжыысь луэ. Сыӵе пушъетысь потэменыды тӥ но данъяськиськоды, луоз?

— Милям мемеймы, Парасковья Александровна, Семён Самсонов писательлэн сузэрез луэ. Тодӥсько на, агай-вынъёсыз сое вакчияк «дыды» гинэ шуылӥзы. Ми солэсь нимзэ, быдэ вуытозямы, ӧм тодылэ. Соослэн семьязы бадӟым вылэм: 7 нылпи. Семён Александровичлэн Андрей но Владимир вынъёсыз но кылбур гожъязы. Ми анай-атаймылэн куинь нылпиос: мон, Катя но Володя. Володямы (Возняков) но кылбурчи луиз.

Котькыӵе уж борды кутскемысьтым но радъяны быгатэмысьтым, лэся, школаез йылпумъякум, мемей шуиз: тон, Зина, дышетӥсь луод. Нош Катя бӧрдӥсь, нылпиос солэсь уз кылзӥське, со эмчие дышетскоз. Улонын озьы ик луиз, Катя висисьёсты йӧнатэ. Нош мон ке… Пичи дыръям туж потэ вал агроном луэме. Гуртамы егит ныл агроном вуиз. Мотоциклэн бусыостӥ ворттылэ вал. Сыӵе мон со шоры вожъяськыса учкылӥ. Таӵе мылкыдме тодыса, мемей пуштӥз: пиосмурт кадь луэмед потэ-а? Тонялы синмаськеме али ке но ортчемын ӧвӧл.

Эдэйгуртысь (Бобья-Уча) укмыс классэз йылпумъяса, Можга педучилищее дышетскыны пырыны малпай. Но баллэ ӧз тырмы, берен доре бертӥ, 9-тӥ классэ вамыштӥ. 10-тӥ класс бере Удмурт кун университетэ пырон азям Володя ӵужмуртэ монэ нуналлы быдэ сямен диктант гожъятъяз. Соку со висе ни вал, султылытэк кыллиз. Монэ юри дораз серекъятон понна ӧтчалляз кадь потэ, олокыӵе но анекдотъёс вералляз. Пичи дырысеным туж зол серекъясько вал.

— Сыӵе ӟеч визь-нод сётӥсь вӧзын будыса ик, дышетӥсе пыриды?

— Озьыгес луыса кошке. Кышкатэк ини Удмурт кун университетысь филология факультетэ йыгаськи. Отчы вуи но, эшъёсы мынэсьтым но шаплыесь вылэм, ваньзы туж визьмоесь потӥзы. Мон соос вӧзын асме лапкем курег кадь шӧдӥ. Угось тросэз нылъёс но пиос педучилище бере лыктэмын. Улон шоры учконзы ик соослэн мукетгес вал ини. Кема со ӧре пырыны курадӟи. Эш но озьы гинэ ӧй шедьты. Ӵош дышетскыны шуд усиз Анастасия Гребинаен, Владимир Михайловен, Роза Кузнецоваен. Удмурт шаер понна ваньзы соос тодмо адямиос луизы.

Университетэз йылпумъяса, дышетыны келязы Эгра ёросысь одӥгаз 8 классъем школае. Туж трос предметъёсты нуыны сётӥзы: историез, географиез, кырӟанъя урокез, ӟуч кылэз но литератураез. Кызьы мон тае ваньзэ вормом шуыса, пайми. Ар ужаса, вуттӥ ик, собере школамес ворсазы. Мон мукет школае ӧй ни мыны, аслам ёросам ик берто, шуи.

Пичи Пурга роноын ужасьёс Норья шор ёзо школае келязы. Отын мыным соку ик класс сётӥзы. Нылпиосын кылмы тупаз. Котькыӵе ужрадъёсты мыло-кыдо ортчытъямы. Одӥгез гинэ умойтэм вал: мыным история предметэз сётӥзы. Нош сое тодон понна нимысьтыз визь люкано. Нылпилэн юанэзлы валэктон ӧд ке сёты, кыӵе дышетӥсь тон луод, возьытэ гинэ усёд ук. Озьы мон малпамтэ шорысь Кировысь Ленин нимо педагогической институтэ заочно дышетскыны вуи. Нош нылпиосы 10-тӥ классэ выжемзы бере, кызьы соос госэкзамензэс сётозы шуыса сюлмаськеменым, воксё но школаысь кошконо кариськи.

Норьяын Володя нимо пиен тодматски вал. Огазеяським. Со колхозын тракторист луыса ужаз. Милемлы улон инты но висъязы ни вал. Мон кошкисько бере, Володялэн но гуртэ кылемез ӧз поты ни. Озьы ми городскойёс луимы. Володя ТЭЦ-2-е ужаны интыяськиз. Нош мон — со организацилэн общежитияз воспитателе. Милемлы соку ик улон инты висъязы. Егит дырмы общежитиын ортчиз. Тужгес шудо вакытъёсмы вал, дыр, соку. Мон отын кыӵе но ужрадъёс ӧй ортчытъя. Ачим ик сценарийёс гожъялляй. Мыным со уж секыт ӧй вал. Угось пичи дыръям эшъёсыным ӵош концертъёс дасяллям, спектакльёс пуктылӥм.

— Тӥ «Ӟечбур!» газетын но тыршиды. Малы отысь кошкиды? Гожъяськись муртлы киыз но пыдыз кадь газетын ужаны.

— Одӥг вакытэ Володя Возняков выны «Ӟечбур!» газетлэн редакторез луыса ужаз. Кыкез ужасьёсыз дышетскыны но пинал вайыны кошкиллям. Оло, ми дорын ужаса, эскерод, ӵектӥз со. Мон сое жаляса кадь мыноно кариськи. Нырысь ик Алевтина Аймановаен Дэри ёросысь одӥгаз школае потамы. Отысь нылпиос сярысь гожтэмме Володялы возьматӥ, со лӧпкытӥз: пӧрме, ужа, шуиз. Собере трос командировкаосы потай, мыло-кыдо ужай, трос гожъяськи. Газетлэн котькуд номераз сямен материалъёсме печатлазы. Но куд-ог газетчиос уродъяськыны кутскизы: газетэз, пе, семейной кариськоды. Кошки мон отысь. Удмурт кун университетэ лыктӥ. Нырысь ик лаборантэ кутӥзы, собере методист луи. Со вакытэ кафедраен кивалтӥз Галина Николаевна Лесникова. Со монэ туж умой пумитаз, вань ужасьёсын тодматӥз, ужаны дышетӥз. Али ке но солэн ӟеч мылкыдызлы тау шуэме потэ. Мон та ужам котьку но шумпотыса лыктӥсько. Паймисько егитъёслэн визьмо будэмзылы. Тани кафедраысьтымы Наталья Владимировна Кондратьева профессор луиз ини. Ачиз востэм гинэ кадь, егит, нош сомында тодэ!

Мон уг жаляськы, улонын созэ но, тазэ но веръяй шуыса. Адями котькытын аслэсьтыз ӧрзэ шедьтыны быгатэ вылэм. Пӧрмысал, дыр, мынэсьтым умой дышетӥсь но, егит дырысен удмурт кылэз но литератураез дышетон бордын ужасал ке. Журналистика удысын но асме шедьтӥ ни вал кадь потэ. Воспитатель луон ласянь ке… Ижысь усточиослэн школа-интернатазы но анай-атайтэк кылем нылпиослэн интернатазы али ке но ужасько. Соин ик мынам вань улонэ ӵошатон пыр кошке: заводысь калык но тодосчиос, усточи нылпиос но анай-атайтэк кылемъёс. Соос чылкак пӧртэмесь.

— Нылпиосты нош кинъёс луизы?

— Настя нылмы ИжГТУ-ын программистэ дышетскиз. Сергей атаезлэн удысэзъя мынӥз, солэн предприятияз ик машинист луыса ужа. Дышетсконзэ азинтэ УдГУ-ын экономической факультетын.

— Анай-атайдылы но матысьёстылы сяна, кинлы та улонын тужгес но тау каремды потэ?

— Нырысь ик Эдэйгуртысь удмурт кылъя но литературая дышетӥсьме Парасковья Кузьминична Кузьминаез верасал. Со табере улонысь кошкиз ини. Милемлы со анай кылэз яратыны юрттӥз. Удмурт шаерлэн тодмо пиосыз но, Самсонов писатель вынъёс, та кышномуртлэн киосыз пыр потэмын. Вӧзамы трос сыӵе адямиос мед луозы.

Любовь Тихонова.

Удмурт Дунне
By Удмурт Дунне 31 января, 2012 10:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<