ӟеч ивор гожъяны ӟеч

Удмурт Дунне
By Удмурт Дунне 13 января, 2012 09:39

ӟеч ивор гожъяны ӟеч

«Удмурт дунне» газетысь журналистъёслэн нуналмысь ужзы.

Тиражмы тужгес сюлэмшугъяськытэ вылэм, ту-уж паймоно — газетэз лыдӟисьтэмъёсты. Ужлы ёрмисьёслы, меӵак вераса. Кызьы но, мар но ӧз ни выре милемыз возьдаськытыны. «Удмурт дунне», пе, урод ужа лыдӟисьёсты кыскон ласянь. Озьыен, сӥзьыл куспын шаерысьтымы 40 гуртэ потаса, калыкен пумиськылон — урод уж? 5 сюрс экземпляр тираж — урод уж? Бен, нокин но уг споръяськы, со трос ӧвӧл. Но шара верам потэ: «Удмурт дуннелэн» мында подпиская зэмос тиражез туннэ нуналлы элькунысьтымы одӥг ӟуч газетлэн но ӧвӧл! Таиз вормонмы меӵак тӥ бордысь потэ, гожтӥськисьёсмы. Жаль бен, кин туэ лыдӟиськонлэсь куштӥськиз, но кин ке вунэтыса яке кыӵе ке мукет муген кылиз ке, тӥляд вань луонлыкты газетэз мукет толэзьысен басьтыны. Зэм, февральысен басьтон понна дыртоно луоз — подписка лэсьтозы 14-тӥ январёзь. Мартысен газет вуоз, 14-тӥ февралёзь ке гожтӥськиды. Ижын улӥсьёслэн югдурзы лякытгес — гожтӥськыны мылкыдды кылдӥз ке, жингыртэ редакцие, газет шедьтом.

Творческой вормонъёс сярысь ке, тулыс ик воректӥз Любовь Тихоновалы — со Ашальчи нимо премилэн лауреатэз луиз. Зэм, гужемез Любовь Ивановналэн гудыриё вал — 2-тӥ июне со сюриз Пугачёвоысь пуштылонъёс улэ. Отысь кӧшкемыт югдур сярысь Л. Тихонова «Удмурт дуннее» трос гожъяз, мукет журналистъёс ивортӥзы но вунэтӥзы, нош милям газетмы Выль арозь чаклаз со палан улӥсьёслэсь улон-вылон условиоссэс, юрттылӥз вылӥ ёзъёсы вазиськыны. Но тужгес дуноез — со шимес уе Любовь Ивановна кузпалэныз Георгий Кармановен валче калыкез палэнэ поттыны юрттӥз, асьсэ машинаенызы соос тэль пыр кык пол берытскылӥзы Пугачёвое, шуге-леке сюрем адямиосты Ижысь квартираязы вайыса, буйгатӥзы, кӧлтӥзы. Журналистъёслэн кышкасьтэм луэмзы ар пумын пусъемын Россиысь МЧС-лэн «Кышкыт югдурез палэнтонэ пыриськем понна» гадьпусэн.

Туэ элькунамы журналистъёс пӧлын нырысетӥзэ ялэмын вал Э. Батуев нимо премилы конкурс. Ньыль вормисьёс пӧлын одӥгез милям — со егит гожъяськисьмы Елена Фёдорова.

Эшшо одӥг нырысетӥ инты — удмурт веб-сайтъёс пӧлын радъяськем «Зарни вотэс» конкурсын егитъёслы «Дарт» приложенимы вормись луиз. Нялтас вераса, со удмуртлыкен но шаерысьтымы оглом журналистикаен герӟаськем вань проектъёс пӧлысь ар ӵоже одӥгез яркытэз луиз. «Удмурт дуннелэн» сайтэз миым чылкак выльдэмын вал, соин ик пыралэ, тодматске, асьтэлэсь малпандэс гожтыса кельтэ.

Газет сяна, редакция арлы быдэ тырше калыклэн куремезъя кыӵе ке тунсыко книга яке журнал поттыны. Озьы сӥзьыл йӧндырим йыртӥянъёсын «Шутэтскон сэрег» журнал. Отын тужгес дуноез — лыдӟисьёсмылэн творчествозы.

Ӟечомизы ужан луонлыкъёсмы — табере ми тӥ доры командировкае выль машинаен вуиськом, югытгес кабинетъёсын пукиськом, выль техникаен ужаськом.

Редакциын ужасьёс пӧлын вал кузпалъяськисьёс, нуны вайисьёс, выль корка пырисьёс, соин ик — ваньмыз ӟеч! Удыс праздникамы ми асьмелы но, тӥледлы но сӥзиськом арбыт ӟеч иворъёс гинэ!

Зинаида ВАХРУШЕВА,

валтӥсь редактор.

Тиражмы тужгес сюлэмшугъяськытэ вылэм, ту-уж паймоно — газетэз лыдӟисьтэмъёсты. Ужлы ёрмисьёслы, меӵак вераса. Кызьы но, мар но ӧз ни выре милемыз возьдаськытыны. «Удмурт дунне», пе, урод ужа лыдӟисьёсты кыскон ласянь. Озьыен, сӥзьыл куспын шаерысьтымы 40 гуртэ потаса, калыкен пумиськылон — урод уж? 5 сюрс экземпляр тираж — урод уж? Бен, нокин но уг споръяськы, со трос ӧвӧл. Но шара верам потэ: «Удмурт дуннелэн» мында подпиская зэмос тиражез туннэ нуналлы элькунысьтымы одӥг ӟуч газетлэн но ӧвӧл! Таиз вормонмы меӵак тӥ бордысь потэ, гожтӥськисьёсмы. Жаль бен, кин туэ лыдӟиськонлэсь куштӥськиз, но кин ке вунэтыса яке кыӵе ке мукет муген кылиз ке, тӥляд вань луонлыкты газетэз мукет толэзьысен басьтыны. Зэм, февральысен басьтон понна дыртоно луоз — подписка лэсьтозы 14-тӥ январёзь. Мартысен газет вуоз, 14-тӥ февралёзь ке гожтӥськиды. Ижын улӥсьёслэн югдурзы лякытгес — гожтӥськыны мылкыдды кылдӥз ке, жингыртэ редакцие, газет шедьтом.
Творческой вормонъёс сярысь ке, тулыс ик воректӥз Любовь Тихоновалы — со Ашальчи нимо премилэн лауреатэз луиз. Зэм, гужемез Любовь Ивановналэн гудыриё вал — 2-тӥ июне со сюриз Пугачёвоысь пуштылонъёс улэ. Отысь кӧшкемыт югдур сярысь Л. Тихонова «Удмурт дуннее» трос гожъяз, мукет журналистъёс ивортӥзы но вунэтӥзы, нош милям газетмы Выль арозь чаклаз со палан улӥсьёслэсь улон-вылон условиоссэс, юрттылӥз вылӥ ёзъёсы вазиськыны. Но тужгес дуноез — со шимес уе Любовь Ивановна кузпалэныз Георгий Кармановен валче калыкез палэнэ поттыны юрттӥз, асьсэ машинаенызы соос тэль пыр кык пол берытскылӥзы Пугачёвое, шуге-леке сюрем адямиосты Ижысь квартираязы вайыса, буйгатӥзы, кӧлтӥзы. Журналистъёслэн кышкасьтэм луэмзы ар пумын пусъемын Россиысь МЧС-лэн «Кышкыт югдурез палэнтонэ пыриськем понна» гадьпусэн.
Туэ элькунамы журналистъёс пӧлын нырысетӥзэ ялэмын вал Э. Батуев нимо премилы конкурс. Ньыль вормисьёс пӧлын одӥгез милям — со егит гожъяськисьмы Елена Фёдорова.
Эшшо одӥг нырысетӥ инты — удмурт веб-сайтъёс пӧлын радъяськем «Зарни вотэс» конкурсын егитъёслы «Дарт» приложенимы вормись луиз. Нялтас вераса, со удмуртлыкен но шаерысьтымы оглом журналистикаен герӟаськем вань проектъёс пӧлысь ар ӵоже одӥгез яркытэз луиз. «Удмурт дуннелэн» сайтэз миым чылкак выльдэмын вал, соин ик пыралэ, тодматске, асьтэлэсь малпандэс гожтыса кельтэ.
Газет сяна, редакция арлы быдэ тырше калыклэн куремезъя кыӵе ке тунсыко книга яке журнал поттыны. Озьы сӥзьыл йӧндырим йыртӥянъёсын «Шутэтскон сэрег» журнал. Отын тужгес дуноез — лыдӟисьёсмылэн творчествозы.
Ӟечомизы ужан луонлыкъёсмы — табере ми тӥ доры командировкае выль машинаен вуиськом, югытгес кабинетъёсын пукиськом, выль техникаен ужаськом.
Редакциын ужасьёс пӧлын вал кузпалъяськисьёс, нуны вайисьёс, выль корка пырисьёс, соин ик — ваньмыз ӟеч! Удыс праздникамы ми асьмелы но, тӥледлы но сӥзиськом арбыт ӟеч иворъёс гинэ!
Зинаида ВАХРУШЕВА,
валтӥсь редактор.

Удмурт Дунне
By Удмурт Дунне 13 января, 2012 09:39