Пичикай возьма черодзэ…

Удмурт Дунне
By Удмурт Дунне 24 января, 2012 10:33

Ижысь нылпи садэ путёвкалы черодэ табере султыны луэ, дорысь потатэк, Интернет пыр. Удмуртиез азинтон программа чотын кылдытэмын «Мынам нырысетӥ черодэ» проект.

Город администрациысь нылпиосты школалэсь азьло визьноданъя управленилэн кивалтӥсез Надежда Варламова верамъя, 33 сюрс мурт электрон черодэн тодматскем ни. Пӧлазы ӧжыт ӧвӧл нылпи садэ куриськон гожтэмъёс но. Матысь дыре кылиз на электрон но улэп черодъёсты огазеяны, путёвка сётон радлыкез чакланы. Но та анай-атайёсты медаз сюлмаськыты, пе, интыосты люкылон дыр вылын со уз шӧдӥськы.

Городын али 213 нылпи сад. Со тырмыт ӧвӧл. Соин ик бадӟым уж нуиське покчиослы нылпи учреждениосы интыос усьтон ласянь. Озьы кылем арын ватсаса 50 группа кылдытэмын — 1 сюрслы тросгес тэшкыли нылпи садэ вамыштӥз. Нош ваньмыз-ӧвӧлэз 7 сюрс 721 пиналлы путёвка висъямын. Та вакытэ черодлэн кузьдалаез — ог 1 но ӝыны сюрс адями.

Туэ ватсаса 500 инты усьтыны чакламын. Ужаны кутскозы кык нылпи сад: Ильфат Закиров урамын со ӵыжак выль, Широкий пролкаын — тыро-пыдо тупатъям бере.

Нылпи садэ черодъёсты быдтон вылысь мукет но амалъёс кутӥсько. Озьы али усьтӥськозы нимаз адямиослэн луись, частной, нылпи садъёс. Но кызьы верало нылпиосты школалэсь азьло визьноданъя управлениысь специалистъёс, таосызлы но, муниципалитетлэн луисьёсызлы но огкадесь куронъёс пуктӥськозы.

— Куд-ог анай-атайёслэн юанъёссы кылдо, нылпи садъёс автономной луэм пумысен, — пусйиз Надежда Варламова. — Талэсь кышкано ӧвӧл. Муниципальной луисьёсызлэсь соос висъясько, кунлэн луисьтэм банкъёсын ужаменызы гинэ. Нылпи садэ лыктӥсь коньдонэз ас мылкыд каремзыя кутыны быгато на, учредительёсынызы та ласянь огкылэ вуыны одно кулэ ӧвӧл.

Анай-атайёслы ватсаса тыриськонъёс тупатыны автономной учреждениос уг быгато. Автономной, муниципальной но казённой нылпи садъёс понна огкадь тыриськон чакламын — толэзяз 925 манет. Нылпи учреждение кыӵе ке удысъя нимысьтыз ужа ке — толэзяз 944 манет, нылпиез визьноданъя центр луэ ке — толэзяз 1 сюрс манет тупатэмын.

Элина КУМАЧЁВА.

Удмурт Дунне
By Удмурт Дунне 24 января, 2012 10:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<