Кыл дуннеын пуж-пуж пыласькисько

Удмурт Дунне
By Удмурт Дунне Январь 13, 2012 10:33

Кыл дуннеын пуж-пуж пыласькисько

Валентин КЕЛЬМАКОВ — Удмурт кун университетысь профессор, кылосбур тодосъёсъя доктор. Со дасо аръёслэсь кема ини кивалтэ Удмурт кун университетысь огъя но фин-угор кылтодонъя кафедраен. Удмурт кылэз котыр ласянь эскерыса, дышетон книгаос но монографиос дася, 40 ар ӵоже ини студентъёсыз но 15 ар пала аспирантъёсыз дышетэ. Солэн 350-лэсь ятыр печатлам но редактировать карем ужъёсыз, 50-лэсь трос нимаз книгаосыз но брошюраосыз. Удмурт кун университетын сяна, тодосчилэсь ужъёссэ куто Глазовысь, Сыктывкарысь но Пермьысь вузъёсын. Удмурт кылъя учебникеныз дышетско кунгож сьӧрысь (Финляндиысь, Венгриысь) студентъёс. Тодосчилэн азинлыко тыршемез пусъемын Удмурт АССР-ысь но Россия Федерациысь наука удысысь дано ужась нимын. Валентин Кельмакович — Удмурт кун университетысь кылосбур тодосъёсъя доктор диссертация утёнъя кенешлэн ёзчиез, Финляндиысь Фин-угор огазеяськонлэн дано ёзмуртэз. 2009-тӥ арын Удмуртиысь Писательёслэн огазеяськоназы кутэмын. 14-тӥ январе солы 70 арес тырме.

1940-тӥ арын Татарстанысь Кукмор ёросысь Тыло (Верхняя Юмья) гуртысь Кельмак Байметович финъёсын ожмаськиз. Дораз бертыса вуиз гинэ, Быдӟым тылож пуромиз. Та радаз воргоронлы семьяяз бертыны ӧз ни кылды: 1941-тӥ арын ноябрь толэзе бырыны шедиз. Нош кык толэзь ортчыса, 1942-тӥ арын, дунне вылэ Валей пиез вордскиз.

Тылоысь покчи классъем школаын дышетскыкуз ик, пияш понна вераськон кылъёс тунсыкоесь потылӥзы. Гуртсы вӧзын бигеръёс улӥзы. Война бере улон секытэн туж трос кураськисьёс кылдӥзы. Малы ке но соос ваньмыз сямен бигеръёс вал, шуэ тодосчи, пӧлазы удмуртъёс ӧз адӟиськылэ. Кураськисьёс доразы кӧланы но кыльылӥллям. Бускель Каньсар бигер гуртысь Тайба нимо нылкышно но Кельмаковъёс доры пыра вылэм. Со пелляськем-тунаськем карылэм. Со понна нылкышнолы гуртоос курегпуз но мар сётъяса лэзьылӥллям. Бӧрысь со шуэ, пе, вал: монэ удмуртъёс сюдӥзы-вордӥзы. Озьы ик Кельмаковъёс доры, шергес ке но, ӟуч выжыысь адямиос вуылӥзы. Кытӥ-отӥ соос кӧлазы но, малы ке шуоно пияшлэн анаез со вакытэ МТС-ын ужась трактористъёсты но комбайнёръёсты сюдыса улӥз. Тӥни озьы Валентин, пичи дырысеныз пӧртэм кылъёсты кылыса, будӥз. Котькуд выжы калыклэн вераськемез тунсыко потылӥз: ӟучъёс — нёжъясагес, поръёс — ӵыштым-пыштым, бигеръёс — лыпыр-лыпыр.

Валей пичи дыръя анаез шуылоз вылэм (со вакытэ туала арын сямен вордскем нуналъёсты ӧз пусйылэ): Вуж Выль ар понна перог пыжом. Шаньги но табань ӵем гинэ сиизы, нош перог — праздникъёсы гинэ. Та кылъёс но пичи пилэсь йырвизьзэ портылӥзы: малы Вуж но отын ик Выль ар?

Валейлэн ӵужмуртэз Ахмед Ганеевич Ганеев (анаезлэн выныз) дышетӥсь вал. Валеез но со покчи классъёсын дышетӥз ай. Быдэс гуртын солэн гинэ батареяен пичияк радиоприёмникез вал. Пияш ӵужмуртэз доры ӝутскем мылкыдын сое кылзыны ветлылӥз. Но радиоприёмник Удмуртиысь передачаосты малы ке секытэнгес басьтылӥз. Туж шер кутылӥз мордваосты. Ӵем луэ вал кылзыны поръёсыз, соин, лэся, Валентин соос бордыгес кыстӥськылӥз. Ачиз мар вераськемзэс ӧз но валалля, нош кырӟанъёслы валэктонъёс кулэ ӧй вал. Паймылӥз одӥгезлы: поръёслэн тросэз кылъёссы удмуртъёслэнлы матын чузъяськылӥзы. Огпӧртэм поръёсты кылзӥськыса пукемысьтыз, ӵужмуртэз пияшез алылэм: мар соослэн кылзылы ёрмид ини, всё равно пор деятель уд луы.

Витетӥ классэ ини Валентин вить иськеме Улынгурт (Ошторма-Юмья) школае мынӥз. Кык арзэ интернатын улӥз. Сизьыметӥ классысен, котькыӵе куазь мед луоз — жоб-кот-а, кезьыт-а — дораз бертылӥз. Тямысэтӥе выжемез бере классы суро луиз: удмурт, пор, бигер пиналъёс дышетскизы. Удмурт гуртын будэм пияш ӟуч кылын алама вераськылӥз. Поръёс, бадӟым акцентэн но янгышен ке но, умойгес лабыртылӥзы. Таослэн вераськемзы пияшез эшшо но золгес бордаз кыскиз. Собере соосын эшъяськиз, кылыз тупаз. Бигеръёсын артэ улэмысьтыз, лэся, соослэн кылзылы сокем паймонэз ӧй вал ни. Пор кылэз ӟечгес тодон понна пичи гинэ кыллюкам лэсьтӥз. Удмурт кыл вӧзы ӟучсэ гожтӥз, собере, пор эшъёсызлэсь юалляськыса, соослэсьсэ пыртӥз. Со вакытэ радио но, телевидение но ӧй вал, езтыл сярысь веранэз ик ӧвӧл. Уйёсы, гуртэ ужзэ лэсьтыса, Валентин лампаен кема пукылӥз на. Бер ӝыт гинэ школаысь бертыса, пу вандоно, пильылоно, сое корка пыртылоно, лымы мычоно, юрт котырын анаезлы юрттоно. Лыдӟиськыны дырыз ӧз кыльылы ни. Уката ик художественной литература сярысь веранэз ик ӧй вал: произведениосыз киям ик ӧй кутылы, шуэ тодосчи, удмуртсэ шедьтыны ик уг луы вал. Со понна бӧрысь сое кӧня лыдӟоно луиз!

* * *

Дас классэз йылпумъямез бере Валентинлэн туж потэ вал фин-угор калыкъёслэсь кылъёссэс дышетэмез, но соку сыӵе луонлыкъёс ӧй вал на. Со кылъёсты дышетон сярысь вераськонъёс ик ӧз ӝутскылэ. Ма, асьсэос но дышетӥсьёс фин-угор дунне сярысь ӧз ик тодылэ, луоз.

— Школаын дышетскыкум, шоро-куспо классъёсын удмурт кылъя урокмы ӵемысь шудонлы пӧрмылӥз, — пичи дырзэ тодаз вае тодосчи. — Сыӵе амалын ик ортчылӥзы куд-ог предметъёсъя урокъёс но. Милемын ӵош кык-куинь ареслы бадӟым пиналъёс дышетскизы, соос ик шаянтӥзы…

5-тӥ-6-тӥ классын дышетскыкуз, Валентин нырысьсэ лыдӟиз калыкъёслэн выжыоссы сярысь «СССР-лэн географиез» (удмурт кылын печатламын вал со) книгаысь. Отысь со тодӥз: СССР-ын лыдзыя нырысетӥ интыез басьто славянъёс, кыкетӥ — тюркъёс, нош куинетӥ интыын ветло фин-угоръёс. Та учебник Валентинлэсь синъёссэ усьтӥз. Фин-угоръёс пӧлы, пе, удмуртъёс но пыро. Та сярысь мургес тодэмез потӥз.

Одӥг пол географиен дышетӥсез Шагей Мамашевич Мамашев пияшлы Москваысь куинь пӧртэм кыллюкам (словарь) ваем: ӟуч-эстон, венгер-ӟуч но пор-ӟуч. Со кузьымлы пияш сокем шумпотӥз! Но венгер но эстон кылъёсын озьы гинэ ужаны ӧз быгаты: секытэсь вылэм соос. Соин ик пияш пор кыл борды ик кыстӥськиз. Фин-угор факультетэ пырон понна Ленинградэ дышетскыны мыноно вылэм, но кин сое тодӥз ай соку. Ма, собере сьӧрлось городэ кошкон понна кисыяд кузь уксё луыны кулэ. Школаез йылпумъян араз, «Советской Удмуртия» газетысь ялон адӟыса, Валентин Иже кошкиз. Тодон-валан басьтыны пединститутысь филфаке пыриз. Улон секыт, уксё уг тырмы, нош дышетскыны кулэ. Кӧт сюмаса уд улы. Студентлы эшъёсыныз ӵош ӵемысь вокзалэ вагонъёсты ӝоктыны ветлоно луылӥз. Озьы ке но дышетскон вакытъёс шулдыр ортчизы. Книгаос пушкы выем сяна, Валентин яратылӥз кырӟаны-вераны. Группаысьтыз эшъёсыныз ӵош концертъёсын гуртъёсы поталляз. Калык соку капчи вал, шуэ тодосчи, ог-огенымы тупаса улӥмы.

— Нырысетӥ курсын ог 70 процентэз дырмы быре вал, дыр, КПСС-лэсь историзэ дышетонлы, — ортчем дырзэ жаляса, вера Валентин Кельмакович. — Нош философиез кӧня йыръёно луиз! Фин-угор кылъёсты дышетыны одӥг спецкурс но, материал но ӧй вал. Озьы ик со вакытэ нимысьтыз ӧй вал на диалектология, исторической грамматика но данак со выллем курсъёс, мае али милям студентъёсмы кылзо.

Кельмаков студентлэсь пӧртэм кылъёсын тунсыкъяськемзэ соку ик валаз дышетӥсез — Иван Васильевич Тараканов быдэс арлы сое Йошкар-Олае, поръёс доры, пединститутэ дышетскыны келяз. Кельмаков отын ассэ туж умой шӧдӥз: угось пор кылэз кӧня ке вала ни вал. Одӥг пол пор студентъёсын ӵош диктант гожтэм. Поръёс куд-огъёсыз «2» но «3» басьтӥллям, нош Кельмаковлы «4» пуктӥллям. Практикае но Валентин Кельмаков пор школае ик шедиз. Нылпиосты ӟуч кыллы дышетӥз. Пиналъёсын ӵош колхозын но ужаса вуттӥз. Туж, пе, тупаса улӥмы.

Институтэз йылпумъямез бере Валентин Кельмаковичез Алнаш палъёсы, Варзи-Ятчи шор ёзо школае, келязы. Татын но со ӟуч кыллы дышетӥз. Туж кельшиз ужез: нылпиосын кылыз тупа, урокъёсыз ӟеч пӧрмо, коллектив умой, кельше.

Но ӵапак со вискын Иван Васильевич Тараканов жингыртэ: октябрьлэн пумаз, пе, СССР-ысь Тодосъёсъя академилэн Кылтодонъя институтысьтыз аспирантурае экзаменъёс сётыны Москвае мыноно. Нош Кельмаковлэн уг поты ни школаысь кошкемез, нылпиосын ужан но дышетон планъёсыз верантэм бадӟымесь но устоесь. Тараканов пумитаз шуэм: берло луоз на меда таӵе луонлык?

* * *

Аспирантурае пырыку, КПСС-лэн историезъя, немец но удмурт кылъёсъя экзамен сётоно вал. Ижысь пединститутын немец кылэз озьыгес дышетӥзы: кыкетӥ курсозь гинэ вал со. Озьы ке но со вакытысь куронъёсъя Кельмаков институтын ӟеч дышетскисен лыдъяськылӥз.

— Немец кылысь ӟуч кылэ Герман Пауль сярысь статьяез берыктыны сётӥзы, — егит дырзэ серекъяса тодаз вае Валентин Кельмакович. — Туж секыт вал со. Пуки, пуки, пуки — берыктыны ӧй быгаты. 60-тӥ аръёсы институтын немец лингвист сярысь верась но, мар но ӧй вал. Мӧйы нылкышно преподаватель шорам учке, собере азьвыл оценкаосы шоры мыкырске. Кин со Герман Пауль, юасько.

— Сое но уд тодӥськы бере, малы аспирантурае лыктоно! — шуэ дышетӥсь. Собере, одӥг-ог капчигес юанъёс сётэм карыса, «3» пуктӥз ик.

Удмурт кылъя экзаменме кутӥзы удмурт но коми тодосчиос Тамара Ивановна Тепляшина но Василий Ильич Лыткин. Лыткин мынэсьтым удмурт кылэз тодэмме пыр-поч эскериз, бӧрысь со ик кивалтӥсе но луиз. Малы сокем удмурт кылэз тодэме сярысь сюлмаськиз, берло валамон луиз: одӥг пол аспирантурае Глазов пединститутысь студент лыктэм, нош удмурт кылэз, пе, уг тоды. Сыӵе муртэ кызьы дышетскыны кутозы?

Аспирантурае вуыса, Валентин Кельмаков, вуэз адӟылымтэ ӵӧж кадь, дышетскон борды ӝабыр-ӝабыр басьтӥськиз. Лекциосын сяна, ӵукнаысен бер ӝытозь Ленин нимо библиотекаын пукылӥз. Аспирантлэн отын аслаз дышем пукон интыез вылэм. Мукет ӝӧк сьӧры пуксьыса, лыдӟиськеме иназ ӧз мынылы, шуэ тодосчи. Умой вылэм соиз: библиотекалэн подвал этажаз столовой ужаз, мукет азетӥ кӧттырон утчаса ветлонэз ӧй вал.

Валентин Кельмаковлэн Москваын дышетсконэз узыр но пайдаё ортчиз: конференциос, кенешъёс, защитаос, лекциос. Нокин косытэк, со ачиз сыӵе ужрадъёсы пыриськылӥз. Ваньмыз солы тунсыко потылӥз.

Нырысетӥ араз ик тулыссэ Валентин Кельмаковлы шуак секыт луиз: йырыз уг но висьы кадь, но лыдӟемысьтыз йыраз-визьмаз номыр уг кыльы. Ярам, академилэн аслаз больницаез вал. Кык арня пала курадӟыса ветлэмез бере врач доры мыноно кариськиз. Эмчи шуиз: дышетскондэс куштоно луоды. Валентин Кельмаков юзыр-кезьыр луиз: солэн сыӵе малпанэз ӧй вал. Эмчи дэмлаз лысэн ваннаын пукыны, ӝыт но ӵук кезьыт вуэн пыласькыны, кӧлыны выдон азьын ураметӥ калгыны. Йырды жадьымон лыдӟиськонлэсь чакласьконо, шуиз.

Куинь ар ӵоже аспирантураын дышетскон висказ Валентин Кельмаковичез арлы армие басьтылӥзы. Одӥг гинэ бумага вылэ гожтӥськыса, луэ вал солэн сурон сапеглэсь мозмытскемез. Но гуртаз мар вералозы? Вазен армие ветлымтэ пиосмуртэ воргорон ӧвӧл шуылӥзы. Ма, собере дышетсконлэсь но ӧжытак йырзэ шутэтскытоз. Служить карыны Туркмение шедиз. Отӥяз, берен Москвае вуыса, «Удмурт кыллэн кукмор диалектэз» диссертацизэ гожтӥз, 1970-тӥ арын кылосбур тодосъёсъя кандидат луиз. Егит тодосчиез ӧтё вал Комие ужаны, фиктивной брак лэсьтыса, Москвае кыльыны но дэмлазы, но со Иже ик берытскиз. Кӧня ке арзэ Удмурт научно-исследовательской институтын ужаз. Егит тодосчи соку чебересь малпанъёсын дор палъёсаз вуиз. Тани солэн диссертациеныз тунсыкъяськозы, оло, печатланы но ӵектозы, нош институтын нокыӵе ӧз кариське — тодосчилы синтаксис бордын ужаны ӵектӥзы.

1971-тӥ арын, Иван Васильевич ӧтемен, Валентин Кельмакович Удмурт пединститутэ ужаны выжиз. Нырысетӥ араз ик удмурт кылэз нуись преподавательёс куиньназы ик кошкизы Европа котыртӥ круизэ, вань часъёссэс Кельмаковлы кельтӥзы. Валентин Кельмаковичлы соку уен-нуналэн, лекциос дасяса, пуконо луиз. Москваын дышетскыкум, сомында ӧй ке дасяськысал, конспектъёс ӧй ке гожъясал, мон сое ӧй вормысал, шуэ тодосчи. Секытъёс пыр потыса, Валентин Кельмакович кыдаз, наука сюрестӥ юн но оскымон вамыштӥз. Пединститут университетлы пӧрмем бере удмурт кылъя но финно-угроведениея данак выль предметъёс ватсаськизы. Соку но Кельмаков ӧз кышка, нокинлы ӝожтӥськыса ӧз ветлы, ваньзэ вормиз. Ассэ ачиз буйгатылӥз: котькытын но выль лыктэм адямилы секытсэгес ужез сёто уго.

Калыкмылэсь историзэ, улон-вылонзэ, вераськон диалектъёссэ эскерыса, кӧня экспедициосы ветлэмын! Гуртын улӥсьёслэсь юалляськыса, омыръяса, узыр материалъёс люкамын-ваемын.

Доктор диссертацизэ утён вакытэ Валентин Кельмаковичлы Финляндие ӧтён вуиз. Удмурт Элькунысь ньыль мурт пӧлысь Кельмаковез бырйиллям. Хельсинкиын но Туркуын со кык ар ӵоже ужаз. Кунгож сьӧрын удмурт кылэз дышетон понна соку учебник ӧй вал. Материал люкан понна кӧня дасяськоно луылӥз! Но тыршемез юнме ӧйлась: отын со кык книга поттӥз. Финъёсты удмурт кыллы дышетэм сяна, ачиз но соослэн кылынызы вераськыны дышиз.

1993-тӥ арын «Удмурт диалектъёслэн фонетиказылэн кылдэмез но азинскемез» темая Валентин Кельмаков доктор диссертацизэ утиз.

Пичи дырысеныз пӧртэм выжы калыкъёслэн кылынызы тунсыкъяськись Кельмаков туннэ нуналлы дасо пала кылъёсты тодэ шуимы ке, ум янгышалэ: удмурт, ӟуч, пор, бигер, коми, венгер, немец, фин… Англи кылэз дырыз дыръя дышетыны ӧз кылды шуыса, ӧпкеле со, угось туала улонмы быдэсак со пала берытскемын.

Фин-угор калыкъёс дунне вылын 30 миллион пала. Нош ог-огдэ валан, калыкен ӟеч кусып возён понна кылъёсты тодыны кулэ, шуэ тодосчи. Удмурт но быдэс фин-угор кылтодонысь одӥгез валтӥсь но тодмо тодосчи арлы быдэ сямен пыриськылэ пӧртэм фин-угор симпозиумъёсы, конференциосы, кенешонъёсы.

Валентин Кельмаковлэн ужезлэн емышез, егитъёсты будэтон сярысь сюлмаськемез син азьын: солэн 10 аспирантэз кылосбур тодосъёсъя кандидат луиз, одӥгез — доктор. Со — Наталья Владимировна Кондратьева. Кельмаков дорын дышетскиз Финляндиысь Эса-Юсси Салминен. Али ке но дышетӥсь но дышетскись ӟеч кусып возё.

* * *

Семья ласянь Валентин Кельмаковичлы удалтӥз. Кузпалыз Людмила Николаевна ас палъёсаз ик вордскемын, быдэ вуэмын Глаз ёросысь Понино черкогуртын. Со дышетӥсь. Ижысь 23 номеро училищеын историлы, собере улон воштӥськемъя философилы дышетӥз. 8-тӥ машиностроительной лицейын 20 арлэсь кема директорлэн визьнодан ужъя воштӥсез вал. Валентин Кельмакович кузпалызлы тау каре сое валамез но юрттэмез понна. Кузпалъёслэн Наташа нылзы — врач, нылпиосты эмъя. Кузпалэныз ӵош Степан но Митрей пиоссэс будэто, Валентин Кельмакович но Людмила Николаевна нуныкайёссэс туж ярато. Асьме нылпиосмылэсь будэмзэс ужаннамы ӧм ик шӧдэ, шуо. Нош Алёша пизы Санкт-Петербургын улэ. ИжГТУ-эз йылпумъяса, программист луыса тырше. Яратэ Валентин Кельмакович Нева шур дурысь городын улӥсь пиез дорын кунояны. Отын шутэтскисько, шуэ. Калык но, пе, сюлэмъям, туж лякыт.

Любовь ТИХОНОВА.

Туспуктӥз Владимир БЕЛОМОРСКИХ.

Удмурт Дунне
By Удмурт Дунне Январь 13, 2012 10:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<