Зэмлыкез утчаны юрттӥсьёс кулэ

Удмурт Дунне
By Удмурт Дунне Январь 13, 2012 10:20

Зэмлыкез утчаны юрттӥсьёс кулэ

Туэ 290 ар тырме Россиын Прокуратура кылдэм дырысен. Та удысэз мытыса, Пётр I эксэй пусйиз: выль ёз чакланы кулэ кун властьлэсь законъёсты быдэсъямзэ.

Туннэ но, зэмлыкез утчаса, калык вазиське Прокуратураын ужасьёслы. Законлэсь быдэсъяськемзэ чакласьёс юртто сиротаослы но, анай-атайёслы но, ветеранъёслы но. Дауръёс ӵоже Прокуратуралы оскем ужъёс уг кулэсмо. Та удысын тыршисьёслы нуналмысь дышетсконо но будоно — уго закон кылдытон удысын выльдӥськонъёс но воштӥськонъёс туж ӵем луо.

Прокуратураын ужасьёслы берло аръёсы уногес эскероно луэ быдэ вуымтэосын но егитъёсын герӟаськем законъёсты быдэсъянэз. Кыӵе шуг-секытъёс пумисько та удысын? Та сярысь кенешиськом элькун Прокуратураысь отделлэн кивалтӥсеныз Ирина КОМАРОВАЕН.

— Кылем арын быдэ вуымтэослэсь но егитъёслэсь правооссэс тӥян 6 сюрс 304 учыр пусъемын, соосын валче 81 уголовной уж ӝутэмын. Тани котьку но сюлэмшугъяськытэ сиротаослы улон инты висъянэн кылдэм югдур. Мумы-бубытэк быдэсмем нылпиослы юрттыса, судэ дасямын 352 иск. Соя 265 улон инты висъямын. Талы луыса 273 муртлэн аслаз сэрегез кылдӥз.

— Ирина Сергеевна, сиротаослы улон инты висъян сярысь куронъёс ӵем уг вошъясько. Тодӥськом, анай-атайтэк будӥсь нылпиослы квартиралы черодэ султоно 23 аресозь. Нош кӧня квадрат метр висъяны кулэ государство нылпиослы?

— Таиз норма но воштӥськымтэ на — 18 квадрат метр, со огъя площадь луыны кулэ. Соин валче ваньмыз сиротаос уг быгато нимаз квартира басьтыны. Кинлы ке — коммунальной патерын сэрег, мукетызлы — общежитие выллем юртысь комната. Озьы ке но трос учыръёсын интыысь администрациос анай-атайтэк быдэсмись нылпиосты улон интылы черодэ гинэ но уг султыто. Шедьто трос пумо амалъёс.

Тани опекая ёзын ужасьёс мултэс уг сюлмасько. Кыӵе коркась шедьто нылпиез, отчы ик солэн улон интыез шуыса пусъё. Нош та сэрегын нылпилэн пропискаез но уг луы. Мар ини веранэз кыӵе ке асваньбурез (собственностез) сярысь. Нош улон интыез вань шуыса гожтэмын бере — интыысь администрациын юрттыны но уг малпало.

Кизнер ёросын луэм учырез ик мадёно ке. Татысь куинь пиналэз интернатэ келязы. Кыкез кун чотын быдэсмизы, дышетскизы ни. Бадӟымез — Ольга Маренкова — кӧня ке пол вазиськылӥз администрацие. Нош солы возьмато улыны ярантэм юрт шоры — тон, пе, отын прописать каремын. Кӧня ке дыр ортчыса, вуж корка воксё но ӝуаз. Озьы ке но нылмуртэз, 23 аресэз тырмытозь, нокыӵе черодэ ӧз пуктэ. Бӧрысь киоссэс вӧлъязы — табере государстволэсь патер басьтон правоед быриз ни.

Сирота нылашлэн аслаз улонэз но туж ӧз удалты. Бызиз, нылпи вайиз, нош картэзлэн семьяяз сое мултэс карыны кутскизы. Озьы вож нуныен кышномурт социальной центрын но улӥз. Отын валэктӥллям — республикаысь Прокуратурае приёме мын. Татын басьтӥськимы ни солы юрттыны. Тодӥмы, Ольгалэн эшшо выныз вань на — соизлы но ӝоген 23 арес тырмоз, таизлэн но сэрегез ӧвӧл. Ярам, пияшлы Кизнер ёросысь Прокуратура юрттыны быгатӥз. Ортчиз ни суд. Табере ёрос администрация пилы патер сётыны кулэ.

— Со вакытэ ик ӵемысь шараясько сиротаослы куашкам улон сэрег висъян учыръёс но. Тодмо луиз вал Кияса, Ува ёросъёсысь, Вотка городысь чиновникъёслэн та югдур шоры чиньы пыртӥзы учкемзы сярысь.

— Кылем арын но таӵе учыръёс кыре потӥзы. Тани Ува районысь Нылга черкогуртын, сиротаослы шуыса, нимысьтыз 4 квартираем юрт пуктӥзы. Интыысь администрация конкурс радъяз. Отчы келям документъёс йӧн-йӧн лэсьтэмын, вӧзаз чебересь туспуктэмъёс. Адске — юрт ӵыж-выль. Нош зэмзэ ке — улыны ярантэм.

Огаз квартирае интыязы сирота нылэз. Со отчы сыӵе шумпотыса мынӥз. Нош мылкыдыз нырысь нуналъёсаз ик куашказ. Квартираез шунтыны чакламын электроконвекторъёсын гинэ. Нош тыл кысӥз ке? Туала нуналэ газ но, мукет гур сярысь но тодазы ӧвӧл. Раковина пуктӥллям — нош со улын сифонэз но ӧвӧл, канализация лэсьтымтэ, кранысь вуэз но уг бызьы. Нылаш ульчае вулы потэ — нош татын колонкаос но ӧвӧл. Со сяна, электроплиталы, розеткаослы заземление лэсьтымтэ. Тужгес паймымон соиз — коркалы фундамент но кисьтыны жаляллям. Юрт музъем вылэ пуктэмын, выжез, пе, бетонэн кисьтэмын. Озьы сирота нылпи улыны кулэ музъемлэсь ог 20 сантиметр ӝуждалаын.

Лэсьтӥськисьёс тыршизы дунтэмгес улон инты пуктыны. Сиротаослы патер басьтонъя конкурслы та квартира матын но уг тупа вал. Нош конкурс ортчытӥсь комиссия огпол ке но та патерез учкыны потаз-а? Ветлӥз ке, малы синзэ кыниз таӵе тырмымтэос шоры? Валамон, корка улыны уг тупа. Чирковалы мукет гуртэ — Бызарае (Узей-Тукляе) — улон инты басьтӥзы. Нош администрациысь 4 чиновникез дисциплина понна кыл кутытӥзы, быдэн 6 сюрс манет тыриськон лякизы.

— Нош кыӵе шугъяськонъёсын пумисько анай-атайёсын быдэсмись нылпиос?

— Таяз учыре сюлмаськон сюре мумы-бубыослы. Соослэн но йырвисёнъёссы лачак. Тани Сарапул ёросысь кӧня ке нылпи садъёслэн уксё портэмзы сярысь анонимкаос вуылӥзы. Гожтэт вань бере — эскероно. Анай-атайёс ӝожтӥсько: нылпи садын оломар понна но коньдон куро. Но нырысь ик верам потэ: таӵе тыриськонъёсты дышетон заведение малпа ке, со законэз тӥян луэ. Нош анай-атайёслэн комитетсы сыӵе ӵектонэн потэ ке, та пумысен собрание ортчытэмын ке, протокол улын кинюртэмъёс вань ке — озьыен, анай-атайёс соглаш луэмзэс верало.

Асьмелэн кызьы луэ? Адямиос нырысь коньдонзэс сёто, собере ӝожтӥськыны кутско. Мон чакласько тазьы: уг поты тыремед — эн сёты. Таин валче астэ но, пиналдэ но ултӥ уз каре. Ӧвӧл кышкано. Шуом, котькуд толэзь нылпи садын добровольной юрттэт куро. Та косон ӧвӧл, озьы бере — эн сётэ. Шуом, толалтэ нылпи садысь лымыез мычыны-утялтыны нимаз уксё бичало. Талы но правозы ӧвӧл, уго штатын вань дворник, со ужзэ быдэсъяны кулэ. Зэм, одӥг мурт вань шудон интыосты сузяса уз вуы. Соку участокъёсты мычыны косо анай-атайёсты. Таӵе правоез но нылпи садысь администрацилэн ӧвӧл. Мумы-бубыослы ӵектысал дӥсьтӥсьгес кариськыны, вань косонъёслы «я» шуыны эн дыртэ.

Якшур-Бӧдья ёросысь огаз школаын туэ тунсыко документъёсты шараямы. Отын мумы-бубыослы «думиллям» школа азбарез но котырзэ утялтон-возёнэз. Мукет акт дасяллям на — соя котькуд анай-атай толэзьлы быдэ 100 манет вайыны кулэ школалы юрттон вылысь. Та выллем ик учыръёс кыре потӥзы Ижысь Ленин но Индустриальной ёросъёсын, Сарапул городын.

— Туэ сӥзьыл куд-ог ёросъёсын шарае потӥз выль ужпум. 1-тӥ классэ мынӥсь нылпиослы учебник басьтыны интыысь администрациос ӧз дыртэ. Та ужпумез нош ик анай-атайёс бергатоно луизы.

— Озьы, республикаысь 1-тӥ классэ вамыштӥсь вань тэшкылиослы кӧня ке учебник басьтыны уксё чакламын вал — котькуд пиналлы ог 500 манет тыр. Но Кияса но Сарапул ёросъёсын тае тодытэк ик кылиллям. Соин валче школа директоръёс Дышетонъя но наукая министерствое заявка лэсьтыса вуиллямтэ. Валамон, выль дышетскон ар азьын книга басьтон сярысь сюлмаськизы мумы-бубыос. Бӧрысь ужпум кылдӥз учебникъёслы быдтэм коньдонэз берыктон ласянь. Ярам, компенсация чотын со тыриськиз ни.

Нялтас вераса, туэ республикалэн бюджетысьтыз коньдон висъяськыны кулэ ни 2-тӥ классъёслы куд-ог учебникъёс басьтыны. Оскем потэ, таяз радэ кивалтӥсьёс тыро-пыдогес ужалозы шуыса, выль дышетскон ар азьын выль ребусъёс медаз кылдэ.

— Кыӵе эскеронъёс витё на туэ дышетон заведениосты?

— Бадӟым саклык висъяськоз школаосысь столовойёсты чакланлы. Тани выль дышетскон арын ини 4 пол шараяськылӥзы сиёнэн валче шугомем нылпиос. Учыръёс тупаллязы районъёсын. Эн малпалэ — мултэс бадӟым куронъёс школаос азе пуктэмын ӧвӧл. Дышетон юртъёс ваньмыз вылесь ӧвӧл, луонлыкъёссы выль столовой усьтыны уг кылды. Озьы ке но нырысь ик куронъёс пӧлын — школаын чылкыт медло, сиён пӧрасьёс медосмотрез ортчемын мед луозы, пӧртэм сиён-юонъёсты возён но висъян куронъёсты чаклано. Нош кытын ке та огшоры куронъёсты но тӥяло. Огаз школаын шараяськиз стафилококк — уго столовойысь ужасьлэн та через вылэм.

Соин азьланяз но сак эскеромы та удысэз. Туэ учкомы, кыӵе транспортэн нуо-ваё пиналъёсты, кыӵе водительёслы оскемын школа автобуслэн рулез. Одно ик ум вунэтэ сюресъёсты — уго соос кузя транспорт пиналъёсты вуттэ дышетскыны, нош тросаз районъёсын сюресъёс куронъёслы матын но уг тупало.

— Тау кенешемдылы. Праздникен тӥледды!

Алёна ИОНИНА.

Туспуктӥз Владимир БЕЛОМОРСКИХ.

Удмурт Дунне
By Удмурт Дунне Январь 13, 2012 10:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<