Бордаз биниз Пуклё

Удмурт Дунне
By Удмурт Дунне 13 января, 2012 10:37

Бордаз биниз Пуклё

Кин кытын аслэсьтыз шудзэ шедьтэ. Удмуртиысь тазалыкез утён удысысь дано ужась Вера АНКУДИНОВА, Алнаш ёросысь Актэмыр гуртын вордӥськем нылкышно, пумитаз сое Гракын. Тапалась Пуклё гуртысь медпунктэз ӝутоно кариськиз но кошкыны ӧз ӵыды ни. Ёросазы но, солэсь палэнын но туннэ та кышномуртэ тодӥсьтэмез ӧвӧл. Ас вакытаз Вера Андреевналэн нимтулыз республикамылэн Данъян пул вылаз пыртэмын вал. Ёросысьтызы Вылӥ Эгра муниципал кылдытэтлэн депутатэз луэ. Та нуналъёсы со пусъе 55 арессэ.

Пичи дыръяз Вера Андреевна сюлэмаз ялан нуллӥз одӥг малпанзэ: кырӟась луо. Та сярысь анаезлы но вераны шедьтӥз: Ижысь культпросветучилищее, пе, мыно. Нош мумиз куаретӥз гинэ: быдэс улондэ, пе, кырӟаса-эктыса ортчытод-а? Умойгес, пе, малпаськы ай, Можгаысь медучилищее йыгаськы. Кырӟамед калыклэн огетӥз пельтӥз пыроз, мукеттӥз потоз, дордэ-семьядэ но рос-прос адӟылытэк, гуртъёстӥ концертэн поръялод. Нош эмъясь луид ке, тонэ ваньзы Инмар чот карозы, ачид но кинэ ке бурмытыны быгатӥд ке, асэныд данъяськод.

Анаезлэн тазьы индылэмез бере, лэся, Вера ӵемгес учкылыны кутскиз гуртысьтызы ик медпунктын ужась Нечаева Зоя апай шоры. Гурт кузя сумкаен вамыштэ. Вылаз котьку тӧдьы халат. Чылкыт. Бордысьтыз лӧсъяське эмъюм зын. Муг сюрыку, Вера одно дораз бызьыса лыктэ ни вал. Укол кызьы пуктэмзэ чаклалляз. Кырӟан-эктон сярысь ик вунэтӥз, шуыны луоз. Зэм, хоръёсы пыриськемысь ӧз дугдылы. Но улоназ со нырысетӥ интыын ӧй вал ни. Нылаш уйвӧтъёсаз но ассэ эмъясен адӟылӥз.

Сыӵе бадӟым мылкыдын улӥд ке, кызьы сое уд быдэсты? Медучилищее капчиен пыриз, капчиен сое йылпумъяз. Вылӥ тодон-валан басьтэмез потэ на вал. Но адӟонэз мукет вылэм.

— Аслым дусым шедьтӥ уго. Бызи но, институт кулэ ӧйлась ни, — серектэ Анкудинова. — Но аслым шуи: нылпиосме одно ик врачлы дышето.

Нялтас вераса, куинь пиналыз пӧлысь кыкез — эмчиос, эмеспиосыз но йӧнатон удысын бергало. Нош ачиз сярысь ке верано, 1976-тӥ арын распределениен Грак ёросысь Пуклё гуртэ шедиз но отысь пегӟыны воксё дась вал. Алнашысь из сюрес вылтӥ ветлыны дышем мурт Гракысь дэри шоры сапкем кадь потӥз. Пуклёетӥ зор-кот дыръя сапеген уд поты. Эмъюмлы, тракторе пуксьытэк, Гракозь уд вуы.

— Дунне пуме вуи кожаса, зар-зар бӧрдӥсько, — тодаз вае нылкышно. — Татысь одно ик кошко, шуисько. Санитаркаын ужась Марья апай буйгатэ: нуныкае, татчы ик кылёд ай.

Кылиз. Висисьёсты жаляз, лэся. Ма, медпунктын ужась ӧвӧл дыръя мар карыны кулэ гуртоос? Адямиослэн шерезлэн машинаез вань. Медпунктэ вазиськисез Грак больницае келяны транспорт ӧвӧл. Озьыен, калыкед быдэсак ас вылад.

— Эшеным шулдыръяськыны-эктыны ӝыт клубе потӥм, — веранзэ азьланьтэ Анкудинова. — Дӥнямы шок-пуль бызьыса вуиз воргорон. Кышноез пияны кутскем. Мар кароно? Дыр 23 час. Дыртӥм гусеничной тракторлэн кузёез доры. Сайкатӥм. Шоре кесяськоз меда ни лумбыт ужам пиосмуртэд, изьыны уд сётӥське шуыса? Но юнме кышкаськеммы. Со югдурез валаз. Секытэн кышномуртэ кузове интыямы, асьмеос дӧдьые пуксимы. Гракозь 18 иськем. Сокем ик кыдёкын но ӧвӧл кадь. Нош трактор гызмыльтэ. Вуттомы я ум? Татын ик нылкышноед анай уз луы-а? Ой-ой-ой, мар кароно та? Валэз сюлоен но шуккод, чалякгес мед ворттоз шуыса, нош трактор ялан гызмыльтэ. 4 час ӵукна вуэ ни. Ярам, нылкышно чидаз, сюлэм улаз кылдэм пиналыз но валаз, югыт дуннее куриськыны ӧз дырты ни — нылпи ваён юртозь вуттӥмы ик. Нырысетӥзэ вайыны кемагес курадӟо уго кышноос. Нош кыкетӥеныз секытэн луысал ке, тракторын ик пиясал ни.

Тӥни озьы уен-нуналэн, шуыны луоз, ужысьтыз ӧз поталля Вера Андреевна. Республикаысьтымы Данъян пул вылэ дас ар талэсь азьло ик солэсь нимтулзэ пыртӥзы. Пуклёысь медпунктсы уго ёросазы нырысетӥ юрттэт сётыны быгатэменыз котьку азьпалан вал.

— Картэлы тау, — шуэ нылкышно. — Со монэ ӧй валасал ке, семьяез уд ик адӟылӥськы шуыса, огпол коть пыкылысал ке, собыдӟа вормонъёс ӧй басьтысал.

Кузпалыз солэн шофёр. Пичи дыръяз Вера Андреевналэн льӧль малпанэз вал уго: картэ машинаен луоз. Ачиз уго весь вожъяськыса будӥз «корт валлы». Удалтӥз: сизьым ар ӵош улэмзы бере машина басьтӥзы. Но Анкудинова огпол но ӧз шӧдылы калыклэсь шораз вожъяськыса учкемзэ. Ачиз гуртоос пӧлысь ноку ӧз поталля бере, сое гажамысь ӧз дугдылэ.

— Ужме туж яратӥсько, но сюлэмы куддыр туж вӧсь луэ таӵе малпанлэсь: нырысетӥ юрттэт сётыны уксё ӧжыт висъяло, — шуэ Вера Анкудинова. — Со но кварталлы огпол вуэ, нош азьвыл та коньдонэз район толэзьлы быдэ келя вал. Быдӟалаез 3 сюрс манет котыр люкаське. Кварталлы быдэ 6 сюрс манет ке но луысал ке, трослы капчиен шокчысалмы. Пуклёын 340 улӥсез. Дӥнямы лыкто но, милям бинтмы гинэ но куддыр уг сюры. Коть вӧзазы пуксьыса бӧрд — сокем жаль пото.

Пуклёысь медпунктэн кивалтэм сяна, Анкудинова луэ Вылӥ Эгра муниципал кылдытэтлэн депутатэз. Берло аръёсы кылдытэтазы пырись гуртъёсы тыл, асфальт вуиз. Табере гуртоос чебер катаен Граке лыкто ке, сопалан улӥсьёс долкало: ми резина сапегмес ум куяське, нош тӥ туфлиен шат? Медпунктъёссэс но выльдӥзы.

Нялтас вераса, районазы огкылысь ужаса, куинь ар талэсь азьло вань медпунктъёссэс утьыны быгатӥзы, огзэ но ӧз быдтэ. ФАП-ёсты кулэстыны косэмын ке но вал. Зэм, калыклэсь лыдзэ басьтыса, кытын но отын фельдшеръёслэсь уждунзэс кулэстӥзы ик. Но со понна гуртоос шуге-леке ӧз сюре, соос тау каро Анкудиновалы но. Собыдӟа ужпумез ӝутыкузы, со но палэнэ ӧз кыльы уго.

Ваньмон дыръяз но Вера Андреевна калык пӧлын: я муниципал кылдытэтысьтызы нылкышно кенешен кивалтэ, я «Удмурт кенеш» огазеяськонлэн Грак ёзэтаз ортчылӥсь ужрадъёсы пыриське. Пичи дыръяз сямен ик, туннэ но мыло-кыдо кырӟа. Сад котыраз берганы яратэ. Нылпиоссэ но нуныкайёссэ шутэтскон нуналъёсы пыжиськемен пумита. Таос мыным азьлань вамыштыны кужым но оскон сёто, шуэ.

Елена САРАМАТОВА.

Удмурт Дунне
By Удмурт Дунне 13 января, 2012 10:37