Ёросэн кивалтоз Крестьянинов

Удмурт Дунне
By Удмурт Дунне 13 декабря, 2011 08:57

Ёросэн кивалтоз Крестьянинов

М. Крестьянинов.

Быръён нунал ортчиз. Нош со сярысь вераськон-кенешон весь мынэ на. Москваын сюрсъёсын адямиос, карлудэ потыса, быръёнлы йылпумъянъёсын соглаш луымтэзэс возьмато. Нош асьме элькунын ёрос депутатъёс асьсэлы йыр быръё.

Кылем арня вискын тодмо луизы ӝыныезлэн ёросъёслэн выль дырлы валтӥсьёссы. Кызьы тодмо, туала законъя районын нырысетӥ адями луэ вань калыкен быръем депутатъёс пӧлысь ӵектэм мурт. Со понна куаразэс сётыны кулэ депутатъёс нырысетӥ сессиязы. Дэмлам адямиос пӧлысь кудӥз уногес куара бича, сое ик юнмато кивалтӥсе.

Радъясь сессия котькытынлэсь азьло ортчиз Киясаын. Татысь али гинэ быръем депутатъёс кивалтӥсе кык муртэ ӵектӥзы — кылемаз ӧтчаме интыысь кенешен но быдэс ёросэн кивалтэм Александр Максимовез но «Коммун-сервис» предприятилэсь директорзэ Сергей Кулаевез. Но бюллетене одӥг гинэ фамилия пыртэмын вал. Озьы чырмыт ужась удмурт воргорон таяз ӧтчаме но кивалтоз киясаосын.

Четверге ӵукна сессия ортчиз Гракын. Татын туэ тулыс аспӧртэмлыко югдур кылдӥз. Азьло созывысь кӧня ке депутатъёс йырзэс вылэ урдӥзы, ужаны пӧрмытымтэез понна Владимир Сабуровез интыысьтыз улляны малпазы. Вожвылъяськон кема кыстӥськиз. Кивалтӥсь ужысь кошконо луиз, нош укыр дӥсьтӥсь депутатъёс мандатъёссэс ӝӧк вылэ понӥзы. Озьы ёрос апрельысен властьтэк улӥз, шуыны луоз.

4-тӥ толсуре гракъёс дэмен лыктӥзы быръён участокъёсы. Списоке пыртэмъёс пӧлысь 70 процентлэсь уноез куаразэс сётӥзы. Ёрос депутат быръёнъя таӵе югдур кылдӥз: 60 процент люказ «Огъя Россия», коммунистъёслы дурбасьтӥз 14 процент, сомындагес ик куара люказы ЛДПР-лы синмаськемъёс, «Зэмлыко Россия» пала кариськизы ог 9 процентэз бырйисьёс. Озьы валтӥсь партилы шедиз 8 мандат, быдэн кык басьтӥзы коммунистъёс но Жириновскийлэн адямиосыз, одӥг депутат луиз Мироновлэн партиысьтыз.

Со сяна, 12 инты сётэмын вал одӥг мандатъем округъёслы. Кин уногес куара октӥз, со ик депутат луиз. Вуж Эгралан, кылсярысь, ёрос кенеше шедён понна куинь мурт нюръяськиз. 76 процентлэсь уноез бырйисьёс дурбасьтӥзы гуртысь хозяйстволэн тӧроез понна. Озьы «Родина» тодмо СПК-лэн кивалтӥсез нош ик быръемъёс пӧлы шедиз.

Депутатъёс ӵапак сое ӵектӥзы ёрос йыре. «Михаил Арсентьевичез мон 40 ар пала тодӥсько ни, — шуиз мӧйыез депутат Алексей Белов. — Со возьматӥз производствоез котькыӵе шуг вакытъёсы радъяны быгатэмзэ, ужась калыкен огкылысь луыны тыршемзэ. Оскисько, ёросэн но быгатыса кивалтоз, уго сое ӟеч тодо элькунамы, солы усьтӥсько бадӟым кивалтӥсьёслэн ӧсъёссы».

Кандидатураез умоен лыдъязы коммунистъёс но. Нош азьлояз ӧтчаме «Огъя Россилэсь» быръем депутат, нош али ЛДПР-е кӧчем мурт Анатолий Кобелев ас выжыысьтыз потэм муртлы оскымтэзэ вераз. Тодӥсьтэм калык, солы, оло, оскысал, нош сессиын депутатлэн куараез омыре ик сылмиз. Уго татын ӟеч валало, кинэн сэрен куашказ ёросын власть.

Крестьяниновлы дурбасьтӥз сессие лыктэм Александр Волков но. Со умоен вераз Михаил Арсентьевичлэн быгатонлыкъёсыз, адями сямъёсыз сярысь. Собере куриз выль кивалтӥсь котыре ваньмызлы огазеяськыны.

— Тырмоз ни тӥледлы, эшъёс, политикаен шудыны, — шуиз со. — Кӧня ке депутатъёслэн мыдланьяськеменызы ёрос ыштӥз дорады спортъя гурт шудонъёс ортчытыны луонлыкез. Озьыен, тӥ дорын пуктыны чаклам стадионэз мукет интыын лэсьтом. Ӝегаз выль социальной юртъёсты ӝутон но. Бен, котькудӥзлэн правоез вань аслаз Инмарезлы оскыны, сояз яке таяз партие пырыны. Но, мон сямен, куке вераськон мынэ районлэн огъя кулэяськонъёсыз пумысен, ас сярысьтыд гинэ сюлмаськонэз палэнтоно, вожвылъяськонэз вунэтоно. Сотэк тӥ воксё бере кылёды.

Сессилэн ужаз пыриськем 24 депутат пӧлысь 21-ез Крестьянинов пала кариськиз, куинез солы пумит луэмзэ вераз. Озьы куамын ар пала элькунысьтымы тужгес но зол азинскем хозяйствоен кивалтэм мурт табере Грак ёрос муниципал кылдытэтлэн йырыз луиз. Михаил Арсентьевич — газетмылэн эшез. Ми ӟечкыласьком сое выль «сиесэн», оскиськом, газетмес лыдӟыны со таяз удысаз но дыр шедьтоз шуыса.

Та нуналэ ик люкаськылӥзы Алнашысь депутатъёс. Ёрос берло дас ар ӵоже туж воштӥськиз. Алнашез Швейцариен но ӵошатӥсьёс вань ини. Уго райцентрын сомында выль юртъёс ӝутскизы, сокем со юн чеберскиз.

Озьы ке но Удмуртилэн Президентэз, сессиын быръёнлы йылпумъянъёс сярысь вераськыкуз, алнашъёсты курлаз. «Мон уг валаськы, малы тӥ валтӥсь партилы сокем мылкыдтэк дурбасьтӥды? — шуиз со. — Тани Чем.-Куюке туэ выжыкылын кадь чебер школа пуктӥм, Шайтангуртэ сюрес лэсьтӥм, нош отын улӥсьёс ӟеч лэсьтэмез ӧз валалэ, шӧдске. Куаразэс сётӥзы сыӵе партиос понна, кудъёсыз ёросэ одӥг коньы но ӧз вае на. «Огъя Россилы» ляб дурбасьтэменымы, асьмеос ыштӥм Кун Думаысь огзэ мандатмес. Мултэс луысал шат со? Кинлы урод лэсьтӥм? Ойдолэ та ласянь воштӥськом, мукет сямен малпаськыны кутском. Уго тулыс вылтӥ асьмемыз выль быръён вите».

Ёросысь 26 депутат куаразэ сётӥз Сергей Токарев понна. Со районэн 2002-тӥ арысен кивалтэ ни. Ужез пӧрме. Соин ик адямиос но со пала карисько.

Унояз ёросъёсын кивалтонэ кылё азьлоосыз йыръёс. Воштӥськон луиз Эгралан. Татысь азьло йырзэс Олег Гаринэз вазенгес ай сюрес хозяйствоя но транспортъя министре юнматӥзы. Табере ёросэн кивалтоз Валерий Прохоров. Толон радъясь сессия ортчиз Уваын но Пичи Пургаын. Отын кутэм решениос сярысь ивортом ни вуоно номерын.

Сергей ЗАХАРОВ.

Удмурт Дунне
By Удмурт Дунне 13 декабря, 2011 08:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<