Утемын мед луом!

Удмурт Дунне
By Удмурт Дунне 13 декабря, 2011 08:54

Удмуртилэн Президентэз Александр Волков пыриськиз Россилэн Приволжск федерал округъя оскем муртэз бордысь Кенешлэн ужаз. Ужрад ортчиз Марий Эллэн шоркараз — Йошкар-Олаын.

Приволжск федерал округе пырись улосвылъёслэн йыръёссы, валтӥсь федеральной инспекторъёс, Россиысь но улосъёсысь министерствоосысь но ведомствоосысь адямиос вераськизы улосъёсын кышкытлыклэсь утиськонэз юнматон сярысь. Кенешонэн кивалтӥз Приволжск федерал округъя оскем мурт Григорий Рапота. Со пусйиз:

— Кышкытлыклэсь утиськон усьыны кулэ ӧвӧл полицейскойёс вылэ гинэ, та понна мед кыл кутозы властьлэн быдэсъясь ёзъёсыз но.

ООН-лэн лыдпусъёсызъя Россиын адями виён учыръёс, Европаысь но СНГ-ысь странаосын ӵошатыса, шӧдскымон тросгес. Уноез йыружъёс лэсьтӥсько кудӟем-усыкмем йырын. Калык пӧлын юалляськонъёс ортчытыса, тодмо луиз: ог 50 процентэз адямиос урамын асьсэды утьымтэен шӧдо, полицейскойёслы соослэн осконзы туж пичи.

Григорий Рапота улосъёслэн йыръёссылы вазиськиз: йыртэман учыръёсты алонъя ужпумъёс ӝегатскытэк кутоно. Трос калык люкаськон интыослэн кивалтӥсьёссы азе кышкытлыклэсь утиськонъя чурытэсь куронъёс пуктоно.

Эшшо одӥгез валтӥсь ужпум — коррупциен нюръяськон. Та ласянь пусйымонэз вань ини: куд-ог улосъёсын кылдытэмын калыклы услугаос сётонъя центръёс, кутэмын коррупциен нюръяськонъя улосвыл программаос.

Элина Васильева.

Удмурт Дунне
By Удмурт Дунне 13 декабря, 2011 08:54