Тодӥсько: шонер лэсьтӥсько!

Удмурт Дунне
By Удмурт Дунне Декабрь 23, 2011 07:37

Тодӥсько:  шонер лэсьтӥсько!

Президент эшъяське таза улонэн.

25-тӥ толсуре Удмуртилэн Президентэзлы Александр Волковлы тырме 60 арес. Вордӥськемын со огшоры ужась семьяын, сизьым нылпи пӧлын, Брянск городын. Но 42 ар талэсь азьло улон сюрес вуттӥз сое Удмурт музъем вылэ. Вуоно Президент ужаз механикая Чепца заводын, лэсьтӥськон управлениын, 35 аресказ кивалтӥз ни Глазов городлэн исполкоменыз. Пумен-пумен тубатъёс вуттӥзы Удмуртиысь Министръёслэн Советазы, Россиысь Федерацияя Советэ, шаерысьтымы Кун Кенеше — вал солэн Тӧроез. 

Нош 2000-тӥ арысен Александр Волков Удмуртилэн Президентэз луэ. Мар воштӥськиз республикаямы та дыр ӵоже? Кыӵе мылкыдъёсын Президент пумита Выль арез но кыӵе йылпумъянъёс лэсьтэ аслаз ужезлы? Та юанъёслы валэктыны курыса, журналистъёс люкаськылӥзы Президентлэн резиденцияз.

— Александр Александрович, кыӵе дунъет сётӥськоды ортчем арлы?

— Лыдпусъёсты учкыса, адӟиське: ӟеч ужаськомы гурт удысъя. Республикаямы али 150 сюрс тонна йӧл кыско. Эскере ай Приволжск федерал округысь мукет республикаосты. Сыӵе лыдпусъёс ӧвӧл нокытын но. Вормон асьмелэн сюлмаськеммы бордысь потэ. Трос ик ӧвӧл сыӵе улосъёс, кудъёсыз йӧлын но сӥльын асьсэды быдэсак сюдыны быгато. Гуртъёсын пуктэмын выль школаос, ӟечгес луизы улон условиос, чагыр эстӥськон вуэ, гурт удысын техника выльдӥське, стадионъёс лэсьтӥсько. Со асьмелэн вормонъёсмы.

Улонлэн азинскемез адӟиське нылпиослэн вордскемзыя. Тае но туж ӟеч возьмато лыдпусъёс. 1991-тӥ арын шаерамы 24 сюрс нуны вордӥськиз вал. Вить ар ӵоже та лыдпус 14 сюрс 800-озь усиз. Малы? Ӵуказе нуналлы оскон быриз, ужтэк кылемъёслэн, начаръёслэн лыдзы йылӥз, улонысь кошкисьёс туж трос луизы. Россиын улӥсьёслэн лыдзы ар ӵоже 1 миллионлы кулэсме вал. Ваньмыз та возьматӥз кунмылэсь со вакытъёсы туж секыт югдуре шедемзэ. Жаль, Кун Думае берло быръён кампания дыръя со секыт югдурез калыкмы вунэтӥз, куараоссэ кызьы сюрем сётӥз. Озьы малпаськытэк ужам ке, азьло дыръёс выльысь берытскыны быгатозы.

Шумпотӥсько: берло аръёсы Удмуртиын вордӥськемъёслэн лыдзы кулэмъёслэсь тросгес луэ. Кык ар ӵоже ни вордӥськемъёс, улонысь кошкемъёсын ӵошатыса, 700 палалы тросгес луо ке вал, туэ 1 сюрслы уногес ни. Россиын 83 улосъёс пӧлын сыӵеос 25 гинэ. Приволжск федерал округын ми та ласянь нырысетӥ интыын, ми бӧрсьы — Башкортостан.

— Вераськонъёс ветло: вуоно арын кризис луоз. Талы оскиськоды-а? Кызьы ке дасяськиськоды-а?

— Кризисэн кышкатъяло асьсэлы асьсэос оскисьтэмъёс. Кризис луыны быгатэ котькудӥзлэн ас пушказ. Берло митингъёс пумысен верано ке, отчы потэмъёс пумысь али нуныяса сямен верасько. Но та учыр шоры туж сак, малпаськыса учконо. Куд-огез вунэтӥз ни обязанностьёсмы сярысь, правоосыныз гинэ дан поттэ. Вань сыӵеос но: юри калыкез бугыръяло, кесясько: вот, ваньмыз урод! Но пичи ке но малпаськоно ук: маин та ваньмыз калык понна берытскоз?! 1917-тӥ арын кӧня ке адямиослэн бугыръяськемзы сэрен революция пуромиз. Кытчы бӧрысь со быдэс Россиез вуттӥз? Кӧня адями быриз?! Нош 1991-тӥ арын со выллемгес ик югдур ӧз кылды-а? Кӧня ке бугыръяськись адямиосын сэрен кунмы, экономикамы куашказы, со бӧрсьы аръёсы калык понна номыр ӧз лэсьтӥськы ни. Нош ик сыӵе вакытъёс кулэ-а?

Ойдолэ ай та югдурез асьме республикамы вылын чакласа потом. Власть лэсьтэ выль школаос, нылпи садъёс, 10 ар ӵоже оглом 500 пала социальной юртъёс пуктӥз ни. Со понна-а сое пыкылоно?  Берло аръёсы Ижын гинэ лэсьтэмын вӧл-вӧл бадӟым Эшъяськон юрт, ӵыжак выльдэмын Удмурт театр, пуктэмын выль Мунё театр, Иж тымет котыр, зоопарк кыӵе зол ӝутэмын, нош кӧня вужмем юртъёс выльдэмын, нырысьсэ асфальт сюресъёс вӧлдӥмы азбаръёсы! Нош городъёс, тау карон интые, «Огъя Россилы» 35 процент сяна куара ӧз сётэ. Но «Огъя Россия» — со властьлэн партиез ук!

Нош мар лэсьтӥзы мукет партиос? Кылынызы гинэ оломар но шуизы. Малы куараез сётоно номыр лэсьтымтэос понна? Малы соослэн укыр ӟеч сӥзёнъёссылы, пӧямъёссылы осконэз? 1990-тӥ аръёсы шаерамы одӥг объект но пуктэмын ӧй вал! Выль Россиын улытозямы, берло 10 арзэ гинэ азинскыны, лэсьтӥськыны кутским. Нош азьланяз эшшо 10 ар ӵоже ма но лэсьтыса ум вуттэ! Мон, властьысь адями, та ласянь кылме сётӥсько!

Кун Думае ортчем быръёнъёс сярысь верано на ке, калык дорозь ӧм вуэ, «Огъя Россилэн» зэмос ужъёсыз сярысь умой-умой ӧм вералэ. Соин ик одӥг мандатмес ыштӥмы. Азьвылаз Кун Думаын «Огъя Россия» партилэн нимыныз 3 депутатмы вал ке, табере 2 гинэ кылиз. Но кыкез но соос республика понна бадӟым пайда вайыны кулэ. Шуом, Николай Аброськин азьвыл но туж зол юрттэ вал выль объектъёс лэсьтыны. Со пыр лэсьтӥськон удысэз эшшо золгес радъяны луоз.

—  Кам шур вамен выж лэзён пумысен кема вераськон мынэ ни. Маке лэсьтӥське-а?

— Вуоно арын ини Кам вамен выж лэсьтонъя ужъёс кутскозы. Ваньмыз умой радъяськиз ке, 4 ар ортчыса, выж луоз. Со 14 миллиард манет пала усёз. 27 процентэз — федерал кисыысь но Удмуртилэн бюджетысьтыз. Нош бадӟым люкетэз — конкурсын вормисе потэм инвесторлэн уксёез. Матысь дыре Правительство ивортоз, кин пуктоз та выжез.

— Калыклэн юанъёсызлы берлозэ валэктыкуз, Владимир Путинлэсь кин ке юаз: малы, пе, сыӵе «хреново» Сарапулын. Тӥ кызьы малпаськоды — малы?

— Жаль, Сарапулын сыӵе мылкыдъёссы шуыса. Но, малпасько, та юан герӟаськемын Сарапулысь радиозавод котырын кылдэм югдурен. Та заводлэн кивалтӥсез — нимаз адями — сое куашкатӥз, нош ми, власть, табере ӝутӥськом. Малы сарапулъёс со югдурзы сярысь 2 ар ӵоже шып улӥзы? Табере малпало: туж ӝог ваньзэ улӟытыны луоз. Выжыкылын гинэ озьы луэ. Та заводъя кӧня пумиськонъёс ортчытъяй ни Россиысь Президент дорын но, премьер дорын но, обороная, промышленностья министерствоосын. Поттэмын Россиысь Правительстволэн распоряжениез, соя Сарапулысь завод стратегическойёс пӧлы пыриз. Табере федерал кисыысь отчы коньдон висъяськоз, асьмелы но заказъёс чырмытгес утчано.

Нялтас вераса, быдэс ар ӵоже ми бадӟым саклык висъяны тыршим промышленность удысысь предприятиосты ӝутонлы. Йыры тужгес висе вал куинез предприятимы понна: «ИжАвто», Сарапулысь радиозавод но «Ижмаш». «ИжАвтоез» кризисысь поттыны быгатӥм. Вуоно арысен кутскомы ни Lada Granta автомобильёсты бичаны. Кык ар ӵоже та модель машинаосты гинэ 90 сюрс пала поттомы.  Нош оглом учконо ке, али толэзьлы быдэ предприятие 10 сюрс автомобиль бича ни. Сыӵеез 20 ар ӵоже ӧй вал. Нош кутскимы вал 2-3 сюрс бордысен. Со — коллективлэн вормонэз. Матысь ар ӵоже ми тазьыгес ик ужалом. Нош со вискын калыкез, специалистъёсты дышетомы Nissan автомобильёсты бичаны. 2016-тӥ арозь быгатомы ни араз 300 сюрс автомобиль поттыны. Та планэз умоен лыдъяз ачиз премьер Владимир Путин.

Нош «Ижмашын» югдур секыт возиське на. Сое «эмъюмтэк» катьяны уз луы. Оскисько,  югдурез тупатыны быгатом.

— Тӥляд сюлмаськемдыя республикаямы трос объектъёс пуктэмын. Кудӥз бадӟым шугъяськонъёсын лэсьтӥськиз но кудӥз асьтэлы тужгес но сюлэмдыя?

— Тау Инмарлы, огез но бадӟым шугъяськонъёсын ӧз лэсьтӥськы. Туж кельше циркмы. Но, малпасько, сое монтэк но пуктысалзы. Зэм, али кадь, оло, ӧй но пӧрмытысалзы. Туж сюлэмыя Свято-Михайловской собор. Эшшо — зоопарк. Тазэ ини, меӵак верасько, мынам туж бадӟым мылкыдылы луыса гинэ лэсьтӥм. Ма, калыкез бугыръясьёс, зоопарк кулэ ӧвӧл шуыса, кесяськизы, 2 сюрс пала кинюртэмъёс люкаса, келязы вал Россилэн Президентэзлы. Но сыӵе пумитъяськисьёс ласянь мон ӧй куректы. Угось тодӥсько вал: шонер лэсьтӥсько!

Таин валче тодам вайисько гуртысь песянаелэсь верамзэ. Со трос визьмо мадёсъёсты тодэ вал. Вот, шуэ, пичи кунян вордӥське, солэн сиемез потэ. Кунянэз анаез доры нуо, нош со аслэсьтыз шудзэ уг вала, пыкиське, ӵыжаське. Улонын но сыӵе ик югдур кылдэ ук.

— Городъёс кытӥяз пыкыло: укыр бадӟым саклык висъяськоды гуртын объектъёс пуктонлы.

— Валасько: школаостэк, нылпи садъёстэк ми гуртэз ум ӝутэ. Школа ке вань, егитъёс но гуртысь кошкыны уз дыртэ. Та муген ик тыршиськомы ёрос центръёсын стадионъёс но пуктыны. Али кутскиськом ни бассейнъёс борды. Нырысетӥез луоз Вавожын. Азьвыл та сярысь вӧтъёсамы но ӧм малпаськылэ.

3 ар ӵоже нылпи садъёсы черодъёс бырыны кулэ, нош 5 ар ортчыса — нылпи яслиосы но. Вуоно арысен ми рос-прос та борды басьтӥськом. Уваын выль нылпи сад пуктӥм ук, тӥни сыӵе типовой шуиськись садикъёс ик ёросъёсын лэсьяломы. Басьтӥськомы малокомплектной школаос лэсьтон борды но. Одӥг липет улын луозы дышетӥсьёслы чаклам улон инты но школа.

Городъёсын но ужмес кужмоятӥськом. Ижын, 2 ар ортчыса, луоз Егит учкисьлэн театрез. Иж тымет котырез лэсьтыса йылпумъялом. Машиностроитель микрорайонын вуоно арысен ини пуктыны кутском бюджет удысын ужасьёслы чаклам 200 квартираем юрт. Отын улозы дышетӥсьёс, эмъясьёс, культура удысын ужасьёс. Та — республикалэн проектэзъя.  Нош дышетӥсьёслы трос этажо корка пуктӥськоз федерал проектъя Ижысь ик «Столичной» комплексын.

— Россиын али лэчыт ужпум мигрантъёсъя. Нош Удмуртиын соин герӟаськем шугъяськонъёс вань-а?

— ӧвӧл. Оскисько, уз но луэ. Палэнысь адямиос дорамы уногес лыкто лэсьтӥськыны.  Но, азьвылэн ӵошатыса, сыӵеос али трос ӧвӧл. Та ужез рос-прос радъя Миграцияя службалэн управлениез. Лыктӥсьёс кусып тупато шаерысьтымы диаспораосын. Югдурез чакласа возьыны юрттэ Нациосын ужан политикая министерство но.

Меӵак верано ке, республикаямы асьме ужасьёсмы тырмо. Азьланяз но, оскисько, озьы луоз. Но монэ сюлмаськытэ мукетыз: егит адямиос кошко Россилэн шоркаръёсаз, ӧжытэз мыно асьме заводъёсы. Кадръёсъя политика бордын ужано. Предприятиосын, заводъёсын тыршись адямиос ӧжыт уждун уг басьто ук. Но туала егитъёслэн «пӧсямзы» уг поты.

Мон ваньзэ та улонын ас киыным лэсьтыны быгатӥсько. Урод ужаме ноку уг луы вал. 10 ар талэсь азьло вералляй аслам чагыр малпанъёсы сярысь. Но инмын лобаса ӧй ветлы, со малпанъёсме ачим ик быдэстӥ, зоопарк но, цирк но, мукетъёссэ но лэсьтӥ. Президент луи бере, озьыен табере уй но нунал тыршоно.

— Кыӵе кузьым возьмаськоды вордӥськем нуналады?

— Зэмзэ вераса, вордӥськем нунал сярысь малпаськыны, солы дасяськыны дыр ик ӧй вал ай, быръёнъёсын вырим ук. Но арнянуналэ люкало ӵыжы-выжыосме, эшъёсме. Пуком, кырӟалом. Мар кузьмалозы, солы ик шумпото. Но пумит ӧй луысал выль куасъёслы. Гурезь куасъёс кузьмалом шуыса, оскытӥзы ни. Тол куазен нискылан сяна, гужемзэ яратӥсько чорыганы. Соин ик, оло, кин ке выль спиннинг кузьмалоз — шумпотысал.

Удмурт Дунне
By Удмурт Дунне Декабрь 23, 2011 07:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<