Тодӥськом но дунъяськом!

Удмурт Дунне
By Удмурт Дунне Декабрь 7, 2011 08:11

Тодӥськом но дунъяськом!

Трокай Борисовлы сӥзем медаль.

Шаерамы туэ ар ортчиз Трокай Борисов югдытӥсьлы 120 ар тырмон улсын.  Та пумысен 2010-тӥ арлэн пумаз ай, 29-тӥ октябре, кутэмын вал Удмурт Республикалэн Президентэзлэн 187 номеро указэз. Соку, оло, куд-огез ӧз но оскы, Т. Борисовлэсь чылкыт нимзэ калык пӧлы берыктыны луоз шуыса. Но тани ортчизы толэзьёс…

Трокайлы сӥзем ар мытэмын вал Алнаш ёросын 2010-тӥ арын 1-тӥ декабре. Нош аспӧртэм йылпумъян лэсьтэмын вал туэ 1-тӥ декабре ик. Соку Алнашын Трокайлы но «Удмурт кенешлы» 20 ар тырмонлы сӥзем бадӟым ужрад ортчиз.

Т. Борисов нимо ёрос премиосын пусъемын удмурт азьветлӥсьёс Михаил Крылов но Михаил Соловьёв. Та ужрадын ик тужгес быгатӥсь пиналъёс пусъемын Г. Ходырев нимо ёрос премиен.

 

Алнашын ик туэ туж паськыт радъямын вал «Трокай» фольклор фестиваль. Со ортчиз 29-тӥ октябре. Отчы республикалэн пӧртэм ёросъёсысьтыз 18 коллективъёс пыриськизы.

 

Туэ Дышетонъя но наукая министерство студентъёс понна кылдытӥз Т. Борисов нимо стипендия. Сое басьтыны быгатозы котыр ласянь адӟем карымон студентъёс, «ньыль-витьёслы» дышетскисьёс но со дыре ик общественной уже мыло-кыдо пыриськисьёс.

 

«Удмуртия» издательствоын арлэн кутсконаз поттэмын Трокайлы сӥзем бичет. Нош ар пумын — книга. Издательстволэн кивалтӥсез Юрий Кузнецов верамъя,  азьланяз эшшо зӧкгес книга поттыны чакламын.

 

Арлы быдэ ортчылӥсь Герд лыдӟонъёс туэ быдэсак сӥземын вал Трокай Борисовлы, солэн К. Гердэн но мукет удмурт азьветлӥсьёсын кусыпъёсызлы. Туэ конференция ортчиз Ижысь Эшъяськон юртын 17-тӥ феврале. Сюлэмез бугыртӥсь докладъёс лэсьтэмын вал. Люкаськемъёс ортчем даурлэн кутсконэз сярысь, удмурт интеллигенцилэн со вакытъёсы ӝутскемез но шуге-леке шедемез пумысь кенешизы. Трокай сярысь чузъяськем тужгес тунсыко докладъёс печатласькизы «Герд» номеръёсамы.

 

Борисовлы сӥзем конференциын ик возьматэмын вал юромо Трокайлэн арезлы шуыса лэсьтэм фильм. Со бордын ужаз «Мынам Удмуртие» телерадиокомпания (журналист Елена Слесарева.) Та фильмез учкыны луиз телевизор пыр но. Со сяна но иворъёсты вӧлмытон ёзъёсын Трокайлы сӥзем трос ивортонъёс вал, газетъёсын — нимысьтыз статьяос.

 

Т. Борисовлы сӥзем Герд лыдӟонъёс, конференциос, ӝытъёс ортчизы шаерысьтымы тросаз ёросъёсын, куд-ог школаосын, библиотекаосын. Отчы вуылӥзы «Удмурт кенешлэн» кивалтӥсез Николай Мусалимов, писатель Николай Кузнецов, Трокайлэн ӵыжы-выжыез Раиса Корепанова.

 

Туэ ар пумын Трокайлы сӥзем кык бадӟым конференция радъяськиз. 30-тӥ ноябре — Удмурт кун университетысь журналистикая факультетын. 2-тӥ декабре —  Можгаысь Т. Борисов нимо педколледжын. Отын но, татын но трос тунсыко ивортонъёс, докладъёс лэсьтэмын.

 

Республикаысьтымы школаосын дышетскисьёс пӧлын ортчытэмын Т. Борисовлы сӥзем сочинениослы конкурс. Йылпумъянъёс та нуналъёсы лэсьтӥсько ни. Со сяна, дышетӥсьёслы вазиськемын вал Трокайлы сӥзьыса нимысьтыз урокъёс орчытыны куронэн.

 

Нациосын ужан политикая министерство кылдытӥз «Трокай Борисов» медаль. Сое суредан-лэсьтон бордын тыршиз тодмо удмурт суредась Юрий Лобанов. Кинэ пусъёно со медален? Сыӵе вазиськонэн потэмын вал удмурт огазеяськонъёс азе. Нациосын ужан политикая министерство аслаз сайтаз интыяз та медалья положениез. Дэмлам адямиос юнматэмын Нациосын ужан политикая министерстволэн коллегияз. Соосты,15 муртэ, сӥё-дано пусйизы «Удмурт кенешлы» 20 ар тырмон ужрадын, Удмурт театрын.

 

Т. Борисовлы синпелет пуктон вылысь счёт усьтэмын. Отчы коньдон келян понна удмурт артистъёс благотворительной концерт пуктӥзы. Туннэ нуналлы коньдон бичан азинске. Синпелетлэн гипслэсь макетэз дась ни. Ассэ памятникез пуктон вуоно арлы чакламын.

 

* * *

Вань та но мукет ужъёс юрттӥзы Трокай Борисовлэсь нимзэ калыклы матэгес карыны. Валамон, кемалась вунэтэмзэ, калык йырвизьмысь кужмысь ӵушылэмзэ одӥг ар ӵоже гинэ уд берыкты. Но «Удмурт кенешын» пусъё: та ай кутсконэз гинэ…

Елена Миннигараева.

Удмурт Дунне
By Удмурт Дунне Декабрь 7, 2011 08:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<