Сизьым ӵыжы-выжыос

Удмурт Дунне
By Удмурт Дунне 7 декабря, 2011 08:06

Сизьым  ӵыжы-выжыос

Кузнецовъёс - тужгес удмуртлыко семья.

Ижысь удмурт нылпи садъёсы ветлӥсь пиналъёс анай-атайёсынызы ӵош пыриськизы «ӵыжы-выжы» фестивале. Асьсэлэсь быгатонлыкъёссэс возьматыны мылкыд кариз 21 семья, нош куноосты пумитазы 208-тӥ, Кузебай Герд нимо но 112-тӥ номеро нылпи садъёсын.

Та дырозь «ӵыжы-выжы» фестивале пыриськылӥзы удмурт нылпи садэ ветлӥсь пиналъёс гинэ, нош туэ со бурдъёссэ паськыт вӧлъяз. Удмуртлыкез гажась семьяос кырӟаны-вераны быгатэмзэс возьматӥзы, фин-угор выжыысь калыкъёсын тодматӥзы.

Вожвылъяськонэ 21 нылпи садысь тужгес адӟем карымон семьяос пыриськизы. Ваньзы ик кыллы устоесь вылӥллям, анай кылынымы сяна, фин-угор выжыысь калыкъёс сямен но кырӟаса-вераса лэзизы. Фестиваль «ӵыжы-выжы» шуыса нимаське бере, куд-ог тэшкылиос мумы-бубызэс гинэ ӧвӧл, апайёссэс, песянай-песятайёссэс но сьӧразы вайиллям. 105-тӥ нылпи садэ ветлӥсь Григорьевъёс понна висьыны лыктӥллям Ува ёросысь Итчи-Вамъя гуртысь сизьым кузя. Тӥни кыӵе ӵыжы-выжыос луыны кулэ!

Та ужрадлы рос-прос дасяськиллям 112-тӥ нылпи садын ужасьёс но. Та садикысь кивалтӥсьлэн воштӥсез Светлана Зубарева жаляса вера: адӟем карымон семьяоссы трос, нош ваньмыз фестивале пыриськыны ӧз быгатэ — куд-огзэ ужысьтызы ӧз лэзе. Нылпи садлэсь данзэ утизы Загребинъёс. Людмила но Андрей кузпалъёслэн Лиза но Максим нылпиоссы будо. Нылзы 1-тӥ классэ ветлэ, пизы — подготовительной группае. Быдэс семьязы крезьгурез гажа, тэшкылиос баянэн шудыны быгатэмзэс возьматӥзы.

Мукет семьяос но та фестивальлы тыро-пыдо дасяськиллям. Фин-угор выжыысь калыкъёс сярысь мадёнъёсты, кырӟан-эктонъёсты, пӧраськемъёсты Интернетысь бугыръяллям. ӵыжы-выжы луись калыкъёслэсь дӥськутъёссэс но шедьтӥллям ява. Куинь садын вожвылъяськон мынӥз бере, куинь тужгес удмуртлыко семья пусъемын. Сыӵе ним басьтыны удалтӥз Кузнецовъёслы, Дерендяевъёслы, Бурковъёслы. Шумпотэмзэ уг ваты ужбергатӥсь Олег Кузнецов.

— Пус чӧлтэммы бере тодӥмы: милемлы коми калык сярысь маке дасяно, — шуэ Олег Леонидович. — Калык азе потыса, кырӟанлэсь кылъёссэ вунэто кожасько вал. Ваньмыз радъяськиз, вормон басьтыны юрттӥзы висисьёсмы — 208-тӥ нылпи садын ужасьёс. Песянай-песятайёсмы но, оло, лыктысалзы, кыдёкынгес уло — Кизнер но Кез ёросъёсын. Гужемлы быдэ гуртэ бертылӥськомы бере, нылмы отын ик удмурт кыллы рос-прос дышиз.

Валентина Емельянова.

Туспуктӥз Владимир Беломорских.

Удмурт Дунне
By Удмурт Дунне 7 декабря, 2011 08:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<