Сизьым аръем тубатъёс кузя

Удмурт Дунне
By Удмурт Дунне 13 декабря, 2011 09:12

Сизьым аръем тубатъёс кузя

Михаил Егоров Россиысь Журналистъёслэн огазеяськонзылэн ёзчиез, Удмуртиысь сӥё-дано журналист, Удмуртиысь Кун премилэн лауреатэз. Туспуктылон уженыз со трос пол вуылӥз фин-угор калыкъёс доры. Соослы сӥзьыса, фотоальбомъёс но книгаос поттэмын, уно пӧртэм адӟытонъёс ортчытъямын.

Та нуналъёсы Ижысь 56-тӥ гимназиын но Национальной библиотекаын ужасьёс, Михаил Егоровлэн 65 аресэзлы сӥзьыса, адӟытон усьтӥзы. Отчы уно калык люкаськылӥз. Михаил Васильевичлэн синмаськымон ужъёсыз сярысь мадиз Удмуртиысь Журналистъёслэн огазеяськонэнызы кивалтӥсь Людмила Прокошева. Солэсь творчествозэ сэрттӥзы-пертчизы нылпиос. Соос воксё абдразы: кызьы одӥг адями сомында интые вуылыны но пӧртэм калыкъёсын тодматскыны быгатэм?!

Карнан интые — фотоаппарат

65 ар талэсь азьвыл Пичи Пурга ёросысь Тыло (Сырьезшур) гуртысь Василий но Ефросинья (гуртоос соосты Обреч но Оби шуылӥзы) Егоров кузпалъёслэн Миша пизы вордскиз. Эшъёсызлэсь со номырин ӧз висъяськылы: шумприч будӥз. Школаын но пиёк умой дышетскиз.

Миша быдэ вуон вакытэ гуртысьтызы тросэз пиос Можга педучилищеын дышетско ни вал. Егоров соослэсь адӟем кариз: Эдэйгуртысь 7 классъем школаез йылпумъяса, Можга педучилищее мынӥз. Но шудэз вылымтэ —  пырыны ӧз быгаты. Берен  тямыс классэ йыгаськиз. Таиз ини школа кыдёке, Уча (Ильинск) черкогуртэ интыяськемын вал. Одӥг арзэ отын дышетскыса, нош ик педучилищее вамыштӥз. Таяз радэ пырыны быгатӥз ни.

Педучилищеын пияшлы тунсыко потӥз. 3-тӥ курсысен бордаз кыскиз фотокинодело урок. Сое быгатыса нуиз Иван Гаврилович Матвеев. Туспуктылон понна пияшлы фотоаппарат шедьтоно вал. Нош колхозын ужась анай-атаез уждун трос ӧз басьтылэ. Уката ик педучилищеын дышетскон вакытаз Женя выныз вордӥськиз на. Миша соку шальтыртӥсьсэ поттон амал шедьтӥз: арнянуналъёсы дядяезлэсь лэсьтэм карнанъёссэ Можга базарын вузаса сылылӥз. Озьы Егоров малпанзэ быдэстӥз, аслыз «Смена» фотоаппарат  басьтӥз.

Миша мае но, кинэ но туспуктылэме ӧз шуккылы! Собере соосты эшъёсыныз ӵош бумага вылэ уйбыт поттылӥз. Син азьын адями тус но, инкуазь но, пӧйшур но кылдэ. Макем тунсыко! Классысьтызы вань эшъёссэ туспуктылӥз.

Михаил Васильевичен одӥг группаын дышетскемъёс  бӧрысь тросэз тодмо адямиос луизы: Юрий Медведев, Георгий Юсаев, Виктор Марков, Николай Курбатов, Нина Таланова. Классэнызы кивалтӥсен но соослы удалтӥз — Дмитрий Лукьянович Лукьянов быгатыса нылпиосын ужаз. Со ик удмурт кыллы но литературалы дышетӥз.

13 нунал   дышетӥз но…

Педучилищеез йылпумъямез бере Михаил Егоровез Каракулино ёросысь Кулюшево гуртысь школае келяло: географиен но физкультураен, пе, дышетод. Но егит  визьнодасьлы выль интыын кема ужаны ӧз кылды — 13 нунал ортчыса, сое армие басьтӥзы. Куинь ар служить кариз Подмосковьеысь Одинцово городын. Отын но фотоаппаратэзлэсь ӧз люкиськылы.

Армиысь бертыса, дышетон удыс Егоровез бордаз ӧз кыскы ни. Ужаны «Ижмаш» заводэ интыяськиз. Пияшлы тунсыко потӥз Калашников автоматлы магазин лэсьтыны. Озьы ке но егит мурт одӥг интыяз пукыны ӧз чида. Кытысь ке кылӥз: квартира, пе, сётъяло кирпич поттон заводын. Отчы ветлоно кариськиз. Куинь ар ужамды бере квартира басьтыны быгатоды, пе. Но таиз но ужез Мишалэн сюлэмызъя ӧй вал.

Одӥг пол газетысь ялон адӟиз: фотографъёсты, пе, дышето. Отын со 8-9 толэзь ӵоже тодон-валанзэ муромытӥз. Удмуртбыткомбинатэ туспуктылӥсе интыяськиз: школаостӥ, нылпи садъёстӥ туспуктыса ветлылӥз. Озьы Михаил Васильевичлэсь чебересь туспуктэмъёссэ синйылтӥзы загсын ужасьёс — ужаны ӧтизы. Но ӵапак та вакытэ Михаил Егоров доры фотокорреспондент Паша Замараев вуэ. «Удмуртской правда» газетын, пе, интызы буша, отчы мынэме потэ. Ачиз со ӟуч пияш,  «Советской Удмуртия» газетын ужа вылэм. Тон мон интые лыкты, пе. Озьы Михаил Васильевич редакцие вамыштӥз. Фотоаппаратэныз быдэс Удмуртиез котыртӥз. Сизьым ар газетын тыршиз.

Кышно утчаны — пединститутэ

Ужан висказ Егоров Удмурт институтэ дышетскыны пыриз. Удалтӥз солы: пединститутын со аре удмурт группа усьтӥськем. Тачак удмурт нылъёс но пиос отчы лыктӥллям. Студентъёс ог-огенызы семья кадь тупаса улӥзы. Занятиос бере люкаськылӥзы кылбурчиос Галина но Володя Романовъёс дорын. Отысен ик Миша матысьгес тодматскем Алнаш ёросысь Пероггуртысь Граня нылэн. Тӥни озьы, пединститутэ мон кышно утчаны пыри, серекъя кибашлы.

Михаил Васильевичлэн туж трос ужъёсыз люкаськизы. «Удмуртия» издательство но, туспуктэмъёссэ курылыса, ӵемысь вазиськылӥз. Нош газет ужен ваньзэ вуттыны уг луы вал. Ӵапак со вакытэ УдНИИ-лэн кивалтӥсез Кузьма Куликов Егоровез дораз ужаны ӧтиз. Татын ини ваньмон дыр тросгес сюрылӥз. Калык пӧлы потаса, ӟеч туспуктэмъёс вайылӥз. Фин журналистэн Лиса Линсисэен ӵош соослы потаны кылдӥз Ханты-Мансийске, Чечняе, Байкалэ.

УдНИИ-ын 7 ар ужаса, Михаил Васильевич «Удмуртская правдае» интыяське. Отын но 7 ар тырше.

1987-тӥ аръёсы Михаил Васильевич эркын уже кошке. Соку со нош ик вуылэ хантыос но мансиос доры. «Ханты, манси — кто мы?» книга поттэ. Собере мукетыз — «Парма Прикамская» — книгаез вордӥське. «Устинов», «Удмуртия» но «Ижевск» альбомъёсыз пото. 1989-тӥ арын «Удмуртское народное искусство» книгаез понна Михаил Егоровлы Кун премия сёто. Солэн туспуктэмъёсыз печатласькизы Россиысь пӧртэм журналъёсын но газетъёсын. Выставкаосыз пӧртэм аръёсы возьматэмын Ижевскын, Ханты-Мансийскын, Сыктывкарын, Кудымкарын, Йошкар-Олаын, Эстониын, Финляндиын, Венгриын.

Писпу мерттэмын, пи вордэмын, корка ӝутэмын

Егоров кузпалъёс Коля, Вася но Максим пиоссэс будэтӥзы. Тэшкылиоссэс  пичиысен анай кылэз яратыны дышетӥзы.

Трамвайын удмурт сямен вераськыкумы, калык шорамы шумпотыса но паймыса учкылӥз, — шуэ Михаил Васильевич. — Пиосмы куиньназы ик Москваын дышетскемын. Коли но Васи Полиграфической институтэз йылпумъязы, Максим — полиграфической техникумез. Колилэн аслаз семьяез вань ини, Алёша, Петя, Савва пиоссы будо.

Михаил Васильевич Москваысь одӥгаз фотоательее ужаны интыяськылӥз вал. Отын но 7 ар тыршиз. Собере берен Иже берытскиз. Аграфена Максимовна пенсие потыса, кузпалъёс Тыло пала  улыны шонтӥзы, корка пуктӥзы, вужзэ но ӧз кесялэ. Табере корка пушказы  вашкала арбериос шокало. Михаил Васильевич соосты утьыны тырше. Анай-атайлэсь синпель, шуэ.

Егоровлэн бакчаяз ас киосыныз будэтэм писпуосыз тулыслы быдэ сяськаяло. Соос табере кемалась емышсэс сёто ини. Тужгес но удалтэмын грушапузы. Сӥзьылзэ Михаил Васильевич кисьмам емышсэ ульчаысьтыз вань бускельёсызлы люкылэ.

Михаил Васильевичлэн атаезлэн кадь ик киосыз зарни. Инкуазь Тыло палъёсын туж чебер. Гурт вӧзазы ик бызе Дада ошмессы. Соин ик, дыр, отысь пото данъяськымон адямиос.

Любовь Тихонова.

Туспуктӥз Владимир Беломорских.

Удмурт Дунне
By Удмурт Дунне 13 декабря, 2011 09:12