Поръясь шумпотон

Удмурт Дунне
By Удмурт Дунне 5 декабря, 2011 07:41

Поръясь шумпотон

Инвалидъёслэн нуналзылы сӥзьыса, кылем пятницае Ижысь цирке вуылӥзы шаерысьтымы вань ёросъёсысь но городъёсысь покчиос, егитъёс но арлыдоос. Пусйымон, таяз учыре коляскаын пукись нылпиос но тросгес адӟиськизы. Котьку сямен, вань учкисьёслы ческыт саламъёс сётӥзы. Удмуртилэн Президентэз Александр Волков тямысэтӥ арзэ ини шаерысьтымы сӧсыръёс понна таӵе кузьым лэсьтэ.

Чеберлыко адӟытон азьын шуге-леке сюремъёслы Удмуртилэн Президентэзлэн, Правительстволэн но Кун Кенешлэн нимынызы вазиськиз Правительстволэн Тӧроезлэн социальной ужпумъёсъя воштӥсез Людмила Чунаева. Люкаськемъёслы тазалык, юнлык сӥзьыса, со тау кариз Россиын но калыккуспо спорт ӵошатсконъёсын вормонъёс басьтэм  спортсменъёслы.

Людмила Анатольевна озьы ик вераз, сӧсыръёслы юрттон но улонзэс капчиятон понна республикаямы кутэмын нимаз программа. Сое улонэ пыӵатыса, 400 миллион манет пала коньдон кутэмын ни. Шаерамы та дыре 119 сюрслэсь ятыр инвалидъёс, со пӧлысь 5 сюрслэсь тросэз — нылпиос. Улон-вылонзэс капчиятон понна реабилитация но социальной юрттэт сётонъя центръёс ужало. Нош мылкыдэз ӝутыны юрттоз цирк но — уката ик Москваысь артистъёс вуэмын ке.

Зэмен ик, залын кичабонъёс ӧз чалмылэ. Вылэтӥ кыскем гозы вылтӥ ветлӥсьёсты шокатэк сямен учкизы пичиез но, бадӟымез но. Нош клоунъёслэн дауртэмзылэсь мӧйыос но пичи муртъёслы пӧрмизы кадь. Йӧспӧртэм пӧйшуръёсты но учкисьёс туж мыло-кыдо пумитазы.

Ветлыны шугъяськись пинал пияш Алексей Копысов шуэ:

— Цирке трос пол вуылӥ ни, но таосыз артистъёс тужгес но яразы. Эшъёсылэн но мылкыдзы туж умой. Туннэ ми татчы лыктӥмы Ижысь инвалид нылпиослэн анайёссылэн но опекунъёслэн «Ассоль» огазеяськонзы пыр. Пиналъёсты но анайёсты вераса, отчы та дыре 200-лэсь ятыр адями пыре.

Сӧсыръёс но висисьёс сярысь сюлмаськемез но таӵе шумпотон кузьмамез понна Александр Волковлы тау карон кылъёс вераны куриз Глаз ёросысь Пӧжы (Золотари) гуртысь Елизавета Баженова. Со кивалтэ муниципал кылдытэтысьтызы инвалидъёслэн огазеяськонэнызы. 49 мурт пыре отчы. Пӧлазы пиналэз но, егитэз но вань, пе, одӥгез ветлыны уг быгаты. Арлыдоос тросэз висёнъёсын курадӟо.

Сюлэмшугъяськонъёссэс но усьтӥз Е. Р. Баженова. Кулэ эмъюмъёс дыраз басьтыны шедьтытэк но сюрес дунлы уксё быдтэмен, тросэз инвалидъёс социальной пакетлэсь куштӥсько. Коммунальной юрттэтлы висъям коньдон но ӧжытгес усе, азьло аръёсы юрттэтэн ӵошатыса. Пу понна гинэ кӧня коньдон кошке.

Но пӧжыос висёнъёс но шуг-секытъёс вылэ чӧлскыса уг уло. Огазе люкаськыса, чай юонъёс ортчытъяло. Азьло дыре сельсовет ласянь коньдон висъяло вал, табере ас быгатэммыя люкаськиськом, шуэ Елизавета Романовна. Таяз субботае но ужрад ортчытыны чаклало, юрттэт курим, пе, муниципал кылдытэтысь.

Елизавета Романовна огазеяськонысьтызы мукет нылкышноосын ӵош арлыдоослэн «Пестро саес» ансамблязы ветлэ. Ансамбльлэн нимыз валлё (вашкала) дӥськутэн герӟаськемын, пе, пыдъёсамы кутъёс кутчамын. Удмуртсэ но, ӟучсэ но кырӟаськомы, шуэ.

Глазов палъёс Иже лыктыны потӥллям фельдшерен. Сюрес кузь, оло, кинлы ке юрттэт кулэ луоз. Циркын но трос гинэ эмъясьёс возьмаськизы, котькуд вазиськем муртлы соос ӝог юрттэт сётыны дасесь.

Лия Малых.

Удмурт Дунне
By Удмурт Дунне 5 декабря, 2011 07:41