Музъем вылтӥ ветлоно

Удмурт Дунне
By Удмурт Дунне 20 декабря, 2011 10:49

Музъем вылтӥ ветлоно

Республикаысь кивалтӥсьёс пӧлын Игорь Семёнов котьку висъяськылӥз мытэм ужзэ пумозяз вуттэменыз, «Мон ке ӧвӧл — кин?» ӧтёнъя улэменыз. Улон сюресэз капчи ӧй вал, но данзэ котьку возьыны тыршиз. Тужгес секыт выльдӥськон вакытъёсы Можга городлэн йырыз вал, бӧрысь — Кун Кенешлэн депутатэз, Кун Кенешлэн Тӧроез.

Депутат биньгозызэ Игорь Николаевич али но ӧз лэзьы на. Туннэ солы тырме 60 арес. Юбилееныз ӟечкыласа, кенешиськом улонысьтыз пӧртэм вакытъёс но шугъяськытӥсь ужпумъёс сярысь.

— Игорь Николаевич, та нуналъёсы 10 ар тырмиз Удмуртиын кун кылъёс сярысь законэз кутэм дырысен. ӵапак тӥ со вакытэ парламентлэн Тӧроез вал. Кыӵеен тодады вайиськоды со дырез?

— Уйин шуак сайкатӥзы ке но, ваньзэ пыр-поч вераны быгато. Законэз кутыны 3 пол выризы. Нырысь кык учыре номыр ӧз пӧрмы. Депутатъёс сое кулэ ӧз каре, тросэзлэн оло кулэлыксэ валамзы ӧз поты, оло эшшо маке. Куинетӥ учыре нырысетӥ лыдӟонъёсын закон кутӥськиз бадӟым шугъяськонъёстэк. Но азьланяз ватсанъёс-тупатонъёс ласянь огкылэ вуыны туж секыт вал. Ваньмыз вольыт мынэ ке, депутатъёс 70-72 куара сёто. Нош татын одӥг тупатъянъя куара сётыны курисько — 51 адями дурбасьтэ, мукетызъя — 52… Одӥг-кык куаралы луыса гинэ ватсанъёс кутӥсько, тани-тани ваньмыз куашкалоз, угось азьпалан эшшо шуггес юанъёс. Мынам пыдесъёсы ик куалекъяны кутскизы. Малпасько, всё: закон таяз рад но ӧз ке кутӥськы, авторъёсызлы берыктэмын луоз но быдэс ар ӵоже со борды выльысь кутскыны уз луы ни. Нош удмурт интеллигенция, дышетӥсьёс, тодосчиос сое сыӵе возьмало. Но… Озьы тупаны но кулэ ук! Принципиальной шуон тупатонъёсты депутатъёс азе поттон азьын электрон амалъя куара сётон система «гуньдӥз». Озьыен, вань депутатъёс куара сётоно луозы, киоссэс ӝутыса, шара. Та вакытэ мон, оскисьтэм адями, ас поннам вазиськи: «Осто, Инмаре!» Мукет азьын, оло, шара кеськысал но: удмуртъёсты быдӟым Инмармы ӧз кушты!

Депутатъёс, киоссэс ӝутыса, куара сётыны кутскизы но, адӟисько: 76 адями! Законэз кутонлы туж зол пумитъяськисьёс но кыштыр гинэ ӝуто киоссэс. Пумит ӧз луы одӥгез но!

— Кылъёс сярысь законэз улонэ пыӵатонъя программалэн одӥг люкетэз сӥземын кылмес узырмытонлы. Тӥ кылчи ӧвӧл ке но, кивалтӥды нимкылъёсъя но шонер гожъяськонъя комиссилэн уженыз. Шуо, отын туж пӧсь луылӥз.

— Мон дырозь та комиссилэн тӧроез вал Кун Кенешысь депутат Алексей Красильников. Мон ӧвӧл кылчи, но комиссие пыро вал кылэн герӟаськем тодосчиос, дышетӥсьёс, журналистъёс. Малы соосын ваче вуыны кулэ? Мон радъясь но азьлане ӝуткась вал.

Споръяськонъёс туж лэчыт мынӥзы. Шуом, инты нимъёсты, указательёсты удмурт кылэ берыктонъя ик. Но бадӟым тау кареме потэ вань ужасьёслы. Нимысьтыз вераме потэ удмурт-ӟуч кыллюкам кылдытон ласянь. Отчы 55 сюрс кыл пыриз. Сыӵе бадӟым кыллюкамзы удмуртъёслэн ӧй вал на. Со бордын вакчи дыр куспын ужано луиз Историяя, кылъя но литературая Удмурт институт. Бордаз итӥськизы на Удмурт кун университетысь, Глазов пединститутысь дышетӥсьёс. Та ужен туж быгатыса кивалтӥз Историяя, кылъя но литературая институтлэн директорезлэн воштӥсез Галина Никитина. Со, дыр, Кун Кенешлэн юртаз мултэссэ пыраны ик кышкалляз ни, угось кыллюкамез поттыны туж вакчи дыр сётӥськиз. Малпасько вал, кыллюкамез дасян бордын ужам вань коллектив Удмуртилэсь Кун премизэ басьтыны дэмламын луоз. Сыӵе ужез республикалэн кивалтӥсьёсыз дунъяны кулэ.

Туж жалясько, мон кошкем бере комиссия кема дыр ӵоже ӧз люкаськылы.

— Туэ ар «Удмурт кенеш» огазеяськонлэн ӵектэмезъя ялэмын вал Трокай Борисовлэн ареныз. Соин валче трос пӧртэм ужрадъёс лэсьтӥськизы. Удмуртлыкез азинтонэ туж трос кужымзэс понэм удмуртъёсты, азьветлӥсьёсты Нациосын ужан политикая министерство пусйиз «Трокай Борисов» медален. Пӧлазы тӥ но.

Озьы ке но палэнысен куд-огез пыкылэ: малы, пе, азьвылзэ бугыръянэз, историысь кыӵе ке удмурт геройёсты ӝутонэз на…

— Историез уд вошты, выль сямен уд гожты. Кыӵе вань, сыӵе вань. Нокинлы ӧвӧл сётэмын право удмурт калыклэн йырвизьмысьтыз ӵушылыны К. Гердэз, Т. Борисовез, А. Окиез но трос мукет нимъёсты. ӵапак Трокай Борисов туж трос лэсьтӥз удмурт элькунмес кылдытон понна. Солэсь нимзэ берыктон но вӧлмытон — туж кулэ уж. Со дыре ик вунэтоно ӧвӧл туннэ нуналэз но. Шуом, удмурт тодосчиосмес ик пусъёно, ӝутыны тыршоно, соос асьсэ быгатонлыкъёссэс эшшо усьтыны мед пӧрмытозы.

Мон кема малпаськи: «Удмурт кенешлэн» 20 ар тырмон сӥё-дано юбилеяз мыноно-а? Кызьы пумиталозы удмуртъёс? Но кузпалы шуиз: ветлы. Туж шумпотӥсько, ветлӥ шуыса. Быдэс пушкы пачылаз, адямиосын, удмуртъёсын сюлмысь вераськи. Бурдъяськыса бертӥ.

— Таин валче туж вӧсь юан: «Удмурт кенешлэн» кивалтӥсез Николай Мусалимов Кун Думаысь депутат мандатэзлэсь куштӥськиз…

— Та ивор мон понна шундыё нуналэ шуак гудыртэм кадь луиз… Быръён кампания дыръя ми пумиськылӥм Николай Николаевичен Можгаын. Мон солэсь меӵак юай: вераськонъёс ветло, тӥ депутат мандаттэс сётыны чакласькоды. Кытысь, марысь сыӵе супыльтонъёс? Со валэктӥз: та пумысен мыным нокин ӧз вазиськылы, мон юри люкалляй «Удмурт кенешлэсь» исполкомзэ, соослы но валэктӥ: мандатме куштыны косыса, монэн нокин ӧз вераськы!

Уг тодӥськы, мар луиз, но мандатлэсь куштӥськыны номырысь но уг яра вал! Со — калыктэ вузан… Эшшо одӥг мыло-кыдо удмурт адями вылӥе ӝутскыны выриз на ке, дурбасьтоз-а солы калык? Мон ачим, «Огъя Россия» партилэн депутатэз, со понна куара сётыны курыса, вазиськылӥ. Табере кызьы адямиослэн синъёсазы учком?..

— Нош асьтэос кызьы бадӟым политикае шедиды, кызьы Можга городлэн йырыз луиды?

— Город йыр луон понна вожвылъяськыны монэ дэмлаз Можгаысь предприятиослэн директоръёссылэн кенешсы. Со вакытъёсы котькуд предприятилэн вуз поттонысьтыз табышезлэн 1,5 процентэз мынэ вал город бюджетэ. Соин ик соос туж сюлмаськизы: кин кивалтоз Можгаен. Улытозям быръёнъёсы трос пол пыриськылӥ, но соку, 1998-тӥ арын, кадь секыт ӧй вал ноку но.

Городлэн йырыз луыса ужакум, нунал кутске вал одӥг юан бордысен: кытысь шедьтоно уксё? Нуналлы быдэ телефон пыр вераськоно луылӥз Пенсиосъя фондлэн кивалтӥсеныз: кӧня уксё туннэ висъяськоз? Кӧня ӵуказе? Валасько вал: кытын ке пӧяськид ке, азьланяз нокин уз оскы ни. ӝыны ар ужаса вуттӥ, 10 номеро школаысьтымы дышетӥсьёс пумиськонэ ӧтизы. Юанзы одӥг: ку ворсалоды уждунъя пунэмъёсты? Мон югдурез валэктӥсько, ваньзэ пыр-поч. Вераськонме йылпумъясько, со вискын огез дышетӥсь ӧс вискы пуксе но нош ик: ку ми вань уждунмес быдэсак басьтом? Тӥни озьы — ньыль час ӵоже. Дышетӥсьёслы кельшиз, лэся, мукет дыръя дораз ӧте 6 номеро школа, собере — мукетыз. Котькытын кӧня ке час ӵоже вераськоно, валэктоно. Малпай, всё, тазьы ужаны уг луы! Дорам ӧти вань школаослэсь, садикъёслэсь, эмъяськон юртъёслэсь, пӧртэм профсоюз огазеяськонъёслэсь кивалтӥсьёссэс. Ваньзы азьын вань зэмлыкез верай.

ӵапак со вакытэ кутэмын вал шаерысьтымы парламентлэн постановлениез: 1-тӥ январёзь сётоно 2 толэзьлы чаклам вань уждунэз. Ми вань луонлыкъёсты эскерим, город кисыысь кытысь кызьы коньдон шедьтоно, кыӵе статьяысь выжтоно — люкаське одӥг но ӝыны толэзьлы гинэ. Коньдон ужпумъёсъя отделлы график лэсьтыны косӥ: отын нуналэн мед пусъёзы, кызьы но кӧня уждун сётыны быгатом. Пумиськонэ люкаськем директоръёс пӧлысь быръемын вал 6 адями — актив. Соос нуналлы быдэ эскеризы: быдэстэ-а город ас вылаз басьтэм ужпумез, кызьы тыре уждунэз? Соку но мон Инмарлы вазиськылӥ, графикмес быдэстыны мед быгатомы шуыса. Быгатӥм, векчи копейкаозь ик.

Секыт вал нылпи пособиос тырон ласянь. Кӧня ке пол люкалляй предприятиослэсь кивалтӥсьёссэс, юрттыны курыса. Огполаз сиён поттонъя комбинат вань продукцизэ поттӥз. Калык трос люкаськиз. Водителе саестӥм кыска: Игорь Николаевич, уд кышкаське-а, али калык тӥледыз кесялоз. Уг, шуисько… Тӥни со вискын огез кышномурт монэ адӟиз но ӵашетыны кутскиз: малы татын дуногес дунын вузало?! Мукет ларёкъёсын дунтэмгес! Сылэ ай, шуисько, али ик татчы ӧтелэ огазеяськонлэсь валтӥсь бухгалтерзэ, директорзэ. Та кышномуртэ сьӧрам кутӥсько, азяз вань бумагаосты вӧлдӥськом: возьматэ, кытын дунъёс ӝутэмын? Кытын талэсь пичиесь? Нылкышномы ишкалскиз но ну пегӟе ук! Калык бӧрсяз кесяське: юнме бугыръяса улӥськод татын.

Пусъё на: нылпи пособиосты сётъянэз эскерон туж урод мынӥз. Шуом, соцзащитая отделэ лыктэ егит кышномурт, дуно шубаен. Тодӥсько, картэз азинлыко ужбергатӥсь, нош бумагаосъя — ужтэк пукись. Кышномурт начар улӥсьёслы чаклам пособие басьтэ. Та учырез шарае поттӥмы. Зол пушнерам, лэся. Пособие курисьёслэн лыдзы 30 процентлы кулэсмиз, ваньмыз умой-умой радъяськиз.

— Котькуд политик борды лякиське ужзэ возьматӥсь кыл. Шуом, Президентмы — «лэсьтӥськись», Кун Кенешлэн али Тӧроез — «дорожник», тӥ  — …

— «Коммунальщик». Мон пичи но уг возьдаськиськы талэсь. Улонэлэсь бадӟым люкетсэ мон со удысын тырши ук, Можгаысь ЖКХ-лэн предприятиеныз кивалтӥ. Кун Кенешын огшоры депутат дыръям но котьку ӝутылӥ ЖКХ-ен герӟаськем юанъёсты. Коньдон ужпумъёсъя министр выль бюджетэн тодматон азьын котьку кышкаса витиз коммунальной удысэ коньдон висъянъя юанъёсме.

Нош Кун Кенешлэн Тӧроез луэме бере мон ӵем ветлӥ ёросъёстӥ. Тросгес ӝутылӥ ни гуртэн, пӧртэм выжы калыкъёсын герӟаськем ужпумъёсты. Малпасько, Президент туж ӟеч лэсьтӥз, республикаямы Нациосын ужан политикая министерство кылдытыса.

— Парламентлэн Тӧроез луон понна тӥ удмурт адямиен ик, Павел Вершининэн, вожвылъяськиды. Та пумысен али мар малпаськоды?

— Кун Кенешлэн Тӧроез луоно кариськи Президентлэн А. Волковлэн ӵектэмезъя. Удмурт адямиен вожвылъяськисько шуыса, туж ик ӧй малпаськы. Угось тодӥсько вал, ялан ужась комиссиосын, фракциосын мон пала дурбасьто. Озьы, нырысь куара сётыса ик, монэ бырйизы. Малпасько, со бадӟым аванс вал, уйвӧтам но та сярысь малпаны ӧй дӥсьтысал. Нош Павел Вершининэн кусыпъёсмы ӧз тэшкалэ, со мынам воштӥсе луиз.

— 2007-тӥ арысен тӥ — отставкаын. Политикаын куарады зуч-зуч уг кылӥськы ни. Со малпаськыса лэсьтэм сюрес яке..?

— Ачиз Президент но, мукет кивалтӥсьёс но дэмлало вал пӧртэм бадӟым интыос — постъёс. Мон пумит луи. Азьланяз будӥсь нунокъёсы, выжые понна мынам ужъя книжкаям берпуметӥ гожтэмез луоз: Кун Кенешлэн Тӧроез, мукетыз кулэ ӧвӧл.

Али мон пенсиын, кузпалы Светлана Петровна талы туж шумпотӥз. Солы юрттӥсько. Ижын ужатозям, со Можгаын ик улӥз, ужбергатонэн выриз. Туэ 40 ар тырме кузпалме 1 номеро магазинлэн директорез каремзы дырысен. Али солэн дасо пала магазинъёсыз, 3 ар талэсь азьло кафе усьтыны быгатӥм. Кузпалылы юрттыны кутскеме бере пайми: кызьы со ваньзэ тае огназ бергатӥз? Хозяйствомы но бадӟым вал ук: скал, парсь вордӥмы, кролик, курег. Али 15 гинэ куреге, одӥг атасэ. Кемалась ӧвӧл Татарстанысь Менделеевск ёросын дача басьтӥм. Табере отын пӧртэм емышъёс, бакча сиёнъёс будэтӥськом. Туж удалтэ. Азьвыл но, али но шуисько: выжыкылын улон сярысь малпаськоно ӧвӧл, музъем вылтӥ ветлоно, ужано.

Будэтӥмы 6 пинал. Тау кареме потэ школа директорлы Фаина Никифоровна Сорокиналы. Со туж зол юрттӥз покчиоссэ будэтонын. Ми ӧвӧлтэм дыръя чаклаз, дорамы ӵем вуылӥз. Кун Кенешлэн Тӧроез луэме бере нылпиосы воштӥськизы: дисциплиназы золгес луиз, верамъёсме соку ик санэ басьтылӥзы. Али ваньзы быземын, кышнояськемын ни. 7 внуке. Пӧлазы вань туж визьмо кылбур гожъясез, спортэн вырисез, олимпиадаосын нырысетӥ интыос басьясез.

Нылпиосмы доры али шер ветлӥськомы, юбилейёссы дыръя гинэ. Соос трос бере, огез доры мынӥськод, мукетыз доры уд вутскиськы — куатасько. Соин ик табере асьсэос дорамы ӵемгес вуыло. Тани вордӥськем нуналам но люкаськозы. Мон понна солэсь бадӟым кузьым ӧвӧл.

Елена Миннигараева.

Туспуктӥз Владимир Беломорских.

Удмурт Дунне
By Удмурт Дунне 20 декабря, 2011 10:49