Люкыт дор

Удмурт Дунне
By Удмурт Дунне 2 декабря, 2011 10:50

Кин ӧз улы общежитиын, со ӧй вал студент, шуылӥзы ми университетын дышетскон вакытэ, ог 30 ар талэсь азьло. Уго огъяулонниын котьма аспӧртэмлыко: бускельёсын кусыпъёс но, дырез ортчытон но, сиён пӧран но, сайкан но… Ма, яратон но. Соин, вылды, городысь эшъёсмы толэзьлы огпол ке но, милемлы вожъяськыса но амал шедьтыса, дорамы куное вуылыны тыршизы. Озьы вал. Нош туннэ кыӵе югдур?

Кутскон понна — кӧня ке лыдпус. Али элькунысьтымы 23 огъяулонниосы интыямын 7 сюрс 555 студент но 1 сюрс 39 дышетӥсь. Котькытынлэсь трос сыӵеос Удмурт кун университетын. Татысь 2 сюрслэсь трос егитъёслы общежитие луэ дор.

Но уно сю студентъёс сыӵе «шудэнызы» ушъяськыны уг быгато. 1 сюрс 712 дышетскись но 900 пала преподаватель, оло, туннэ ик «общагае» выжысалзы, но сыӵе луонлыксы ӧвӧл. Удмуртиысь вузъёсын интыос туж уг тырмо. Глазовысь пединститут гинэ огъя юртэ сэрег сётэ вань мылкыд карисьёслы.

Вылӥ дышетскон учреждениос сярысь сюлмаськыны кулэ Москва. Уго соос федерал министерстволэн «липетэз» улэ пыртэмын. Соиз «пиналъёсыз» понна чиньызэ гинэ вырӟытъя, шуыны луоз. Нош «мугорзэ» зуркатэмез уг поты.

Берло аръёсы федерал коньдон чотын ӝутэмын Глазовысь студентъёслы огдырлы улон юрт, выльдэмын УдГУ-лэн кык общежитиосыз. Ижысь медакадемиын ватсаса кылдытэмын 118 инты (палэнысь муртъёсты уллям но уже кутӥськисьтэм комнатаосты тупатъям чотын).

Туэ гужем Удмурт университетэ пырись Мувӧйя но газъя институтлы выль дышетскон юртэз усьтыку, «РуссНефть» компанилэн кивалтӥсез Михаил Гуцериев, мискинь студентъёсты жаляса, лэся, ялӥз выль общежитие лэсьтон сярысь. Со понна компания ог 300 миллион манет висъялоз но 2 ар куспын юрт ӝутоз. Но таиз ини кунлэн тыршемез ӧвӧл. Выль юрт кылдоз ужбергатӥсьёслэн но элькун кивалтӥсьёслэн бызьылэменызы.

Липет кулэ ваньмызлы. Студентлы но, сое визьнодасьлы но. Дышетӥсьёсты общежитиосысь поттыса, егитъёслы ватсаса интыос кылдысалзы. Вузъёсын ужасьёс пӧлын квартиралы кулэяськисьёс туж трос. Югдурез ӧжыт коть воштон понна Александр Волков ӵектӥз Ижысь Студенческой ульчаын нимысьтыз «Академический» улон юрт лэсьтыны. Валамон, отысь квадрат метръёс нокинлы но дунтэк уз сётӥське. Но власть кыӵе ке но коть капчиятонъёс малпалоз — уго туала преподавательлэн уждунэз банкирлэн мында ӧвӧл ай. Собере «Огъя Россия» партия кемалась ӧвӧл ӵектӥз выль проект. «Дышетӥсьёслы корка» нимаське со. Егитъёсты оскон кужмоятэ, шуо ӟучъёс. Мед пӧрмоз вылэм.

Со сяна, вузысь дышетӥсьёс но ужасьёс пырисько асьме Президентлэн программаяз, кудӥзъя Сбербанк сётэ пичи процентэн кредитъёс. Сыӵе амалэн ӝоген корка пырон ортчытозы УдГУ-ысь 22 егит семья, сельхозакадемиысь — 15, ИжГТУ-ысь — 9. Кызьы шуо: умой, но ичи.

* * *

Огъяулонниосын кылдэм югдурез алигес эскеризы элькунысьтымы Общественной палатае быръем муртъёс. Соос вуылӥзы ваньмаз сямен общежитиосы, тодматскизы отын улӥсьёсын. Данакез пусйизы: ӵош улон шулдыр, но секыт: котькытын сямен уг тырмо сиён пӧран, мисьтаськон, дӥсь куасьтон интыос. Студентъёслы туж люкыт: 3 муртлы чаклам комнатаын, кылсярысь, 4-5 адями интыямын. Жилищной кодекс косэ котькудӥзлы ичизэ 6 квадрат метр висъяны, нош асьмелэн со быдэн 4 сяна уг усьы. Со понна прокуратура ялан сэзъя вузъёслэсь ректоръёссэс, штраф тырытэ. Но ужпумез, егитъёсты ӧс сьӧры поттыса гинэ, тупатыны уг луы.

— Отчы но татчы вуылыса, мылкыд урод кылиз, — котӝожзэ уг ваты Общественной палатаысь дышетонъя, наукая но культурая комиссие пырись спортсмен Сергей Чибирев. — Студентъёс уг лыдӟисько, газет-журнал уг басьто. Политикаез кулэ уг каро. Малпалод, Интернет но шулдыръяськон сяна, соослы номыр кулэ ик ӧвӧл. Мар люкетэ егит адямиослы улон интызэс ас киынызы умоятон борды басьтӥськыны, котырзэс ӧжыт ке но шулдыр карыны?.. Общежитиосын кылдытэм кенешъёслэн (студсовет) кужымзы ляб. Соос уг дӥсьто воксё палэнысь лыктэм адямиосты тузыны, урод сямъёсын, шуом, кысконэн нюръяськыны.

Чылкак мукет суредэз синйылтэм та комиссие ик быръем Андрей Ураськин, Удмурт театрлэн кивалтӥсез:

— Уд оске, но сельхозакадемилэн общежитиосыз мыным туж кельшизы — аслам но отчы выжыны мылкыды ӝутскиз. Ми пинал дыръя сыӵе чылкытлыкез адӟыны ӧз кылдылы. Студентъёс ваньзэ утялтыса, чакласа возё, асьсэос дышетскон, шутэтскон, мугорез кыдатон инты радъяло, субботникъёсы потало. Бен, татын но шуг-секытъёс вань. Тужгес но Киров урамысь вашкала общежитиын. Отын тупатъян ужъёс совето вакыт бере ӧй вал на. Юртлэн уно ёзъёсыз — пулэсь. Соосты вошты вал — уксё уг окмы. Манет уг тырмы «Купол» заводлэсь азьло поликлиниказэ но огъяулоннилы пӧрмытон понна. Ректор Александр Любимов кытчы гинэ ӧз вазиськылы ни со пумысен — пайдаез уг шӧдӥськы.

Общежитиосын югдур лэчытомиз… ЕГЭ-ен валче но. Кызьы ивортӥз Семён Бунтов, УдГУ-лэн ректорез, татын берло аръёсы 3 пол йылӥз Ижевсклэн палэнысьтыз вуэм студентъёслэн лыдзы. Азьло сыӵеос ог 25 процент вал ке, али куинь ньыльмосэз студентъёс вуо гуртысь яке мукет городысь. Огласянь, умой кадь. ЕГЭ дыръя басьтэм баллъёс ваньмызлы огкадь луонлык кылдыто. Но шоркар сьӧрысь лыктэмъёслы кытын ке но улоно ук! Общежитие уг тырмы. Патере пырыса улон уноезлы вормонтэм, тужгес но та ласянь курадӟо огшоры гурт семьяосын будэмъёс.

— Таин валче ми кышкаськом ни, дорамы кужмо абитуриентъёс вазиськемысь дугдозы шуыса, — вера Семён Бунтов. — Сыӵеос кошкозы мукет городъёсы, шуом, бускель Казане. Отысь валтӥсь университетын общежитиын интылы нокин уг ёрмы.

Вузъёслэн кивалтӥсьёссы озьы ик ӝожтӥськизы, огъяулонниосысь кулэтэм адямиосты поттыны уг луы шуыса. Куд-ог эшъёс дышетскон заведениен кусыпъёссэс ог дасо ар талэсь азьло ыштӥзы ни, нош ялан кыстасько студентъёслэн юртазы. Жаляса верано луэ, ректоръёслы та ласянь суд юрттӥсь уг луы. Со дурбасьтэ нимаз адямилы. Тани ИжГСХА-лы сётӥзы Первомайский посёлокысь общежитиез. Умой кадь. Но 53 комнатаез бушатыны уг луы. Закон уг лэзьы татчы выжы лэзем муртъёсты ӧс сьӧры кельтыны.

* * *

Кылдэм югдур пумысен Общественной палаталэн кенешаз ас мылкыдзэ шараяз Удмуртилэн Президентэз.

— Вузъёсын дышетскисьёслэсь шуг-секытъёссэс тодытэк ми улӥське, — шуиз со. — Но котькуд общежитие дорозь кимы уг сузьы на. Уго нырысь ми ужпум пуктӥм республикамес пулэсь ӝутэм вашкала школа юртъёсты выльёсыныз воштыны. Берло аръёсы ог сю школа усьтӥськиз. Табере тани выриськом покчи пиналъёс понна: куке но ыштэм юртъёсты пичиослы берыктоно. Оскисько, матысь аръёсы нылпи садэ путёвкаослы ёрмисьёс асьмелэн уз ни луэ. Отӥяз Москваен, ужбергатӥсьёсын (спонсоръёсын) ӵош басьтӥськом огъяулонниос борды. Эн шугъяське, со дыр матын ни.

Люкаськемъёс вераськизы общежитиосын но вузъёсын ужасьёслы улон инты висъянэн герӟаськем ужпумъёсты чакланъя нимысьтыз комиссия кылдытыны. Нош тӥ мар ӵектысалды та пумысен, гажано эшъёсмы? Кызьы луоно югдурез умоятыны?..

Сергей ЗАХАРОВ.

Удмурт Дунне
By Удмурт Дунне 2 декабря, 2011 10:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<