Кытын ке но кин ке весь шукке кусозэ…

Удмурт Дунне
By Удмурт Дунне 5 декабря, 2011 07:46

Кытын ке но кин ке весь шукке кусозэ…

Владислав Кирилловен (Кирла Ладиен, Герман Ладиен) нырысетӥ пумиськылонъёсмес бус пыр выллем тодам вайисько. Милемыз, гуртын вордскем пинал юнкоръёсыз, 1970-тӥ аръёсы Ижкаре кык-куинь нуналлы ӧтчаллязы. Даниил Яшин тодосчилэн, кылбурчилэн секцияз огпол артэ сюрим. Владик нылпиослы сӥзем кылбуръёссэ лыдӟиз, сое трос ласянь ми «визьманы» тыршим, нош со, паймоно кадь, ӝоже ӧз усьы, пушказ гизьыос гыбдазы ке но. Котьма ке но секция дэмлаз Кирла Ладилы нимаз книгазэ дасяны.

Удмурт университетэз ми одӥг аре йылпумъямы, ог-огенымы сессиос дыръя ӵем пумиськылӥм ке но (Владик заочно дышетскиз), умой эшъёс луимы шуыса, уд вера на. Матысь-матысь артэ вуттӥз милемыз кысык вакыт — диплом уж. Со вал 1984-тӥ аре тулыс. Владиклы кулэ вал юрттэт — диплом ужезлы огазеян-йылпумъян лэсьтоно, нош мыным кулэ вал печатлан машина аслэсьтым ужме бичан понна. Тӥни озьы ӝытлы быдэ ми пумиськылӥм Кирилловлэн одӥгаз ужан интыяз — УдНИИ юртын. Владик отын сторож луыса ужаз, институтлэн директорез К. Куликов солы улон висъет сётӥз, отын ӝӧк но кык раскладушка сылӥзы. Ужан вискамы со ӵем гинэ институт юртъерез эскерыны поталляз. «Мороз-воевода дозором обходит владенья свои», — мыньпотыса шуисько вал мон, соку ини одӥгнам шылтыр-шылтыр печатланы кутскылӥ.

Сторож — со Владиклэн одӥгез гинэ ужез вал. Со дыре ик «Дась лу!» газетын но тыршиз, магазинын грузчик но вал, автобусъёсын контролёр луыса но бызьылӥз, суредаськон искусствоосъя музейын возьмаськись но вал. Уг вераськы ни УдГУ-ын студент луэмзэ. Котькуд манетэз-коньыез дунъяны быгатэмез котькинэ паймытылӥз, дыр. Та пумысен мукет учырез тодэ вайыны кулэ.

Герман Лади паймымон умой тодэ вал ёросъёсысь удмурт кылын потӥсь газетъёсты. Мон азьын ик отчы кылбуръёссэ ыстылӥз. Одӥгзэ кылбурзэ «Молот» журнал уг печатла, весь ӝегатэ но ӝегатэ. Со кылбурын герой лудкечез кутыны турттэ но уг пишмыты. ӝож мылкыдзэ буйгатон понна шуэ: ай быжыз солэн вакчи на, «мед будоз на кӧня ке». Нош «Молотын» соку умой гонорар тыризы, кылбурезлы Владик тямыс манет дун возьма ни вал. Тӥни соку пияш со коньдонэз ёрос газетъёс пыр «бичано» кариськиз. Манетэн-манетэн сомында гонорар люказ — «Молотлэсь» дунзэ ортчиз. Озьы ке но журналэ мынытэк ӧз чида: учкелэ, пе, мынэсьтым кылбурме быдэс республикаын тодо, нош тӥ туннэозь уд дунъяське. «Молотын» но печатлано луизы!

 

* * *

Владислав Германович Кириллов Можга ёросысь Атабай ӟуч гуртын вордӥськиз. Но пинал дырысеныз ик пӧртэм-пӧртэм интыосын улоно луиз. Татарстанысь Ошторма-Юмья (Улынгурт) — соос пӧлысь одӥгез пусйымонэз. Атаез Герман Кириллов тодмо дышетӥсь но кылбурчи бере, соос доры Ошторма-Юмьяе ӵем гинэ куноос вуылӥзы, кылсярысь, кылбурчиос Гай Сабитов, Александр Вотяков, тодосчи Георгий Архипов, аспирант-этнограф Владимир Владыкин но трос мукетъёсыз. Пичи пияш понна сыӵе пумиськонъёс яркыт пытьы кельтӥзы. Нырысь гожтосъёссэ Владик газетъёсы ысъяны но уг быгаты на вал, конвертъёссэ атаез эскерылӥз. Нырысетӥ  кылбурез («Нырысь май») «Советской Удмуртия» газетын потӥз.

Владислав трос печатласькылӥз ке но, писательёслэн огазеяськоназы кутыны сое ӧз дыртэлэ. Кылбур книгаосыз шоры «Удмуртия» книгапоттониын но кырыжгес учкылӥзы. Но Кириллов пушкысь улӟем тылгизьыез кысыны уг луы ни вал. Флор Васильев 1974-тӥ аре гожъяз вал: «Кылбур малпамын ке, со малпан поэтической образъёс пыр возьматэмын ке, лыдӟисьлэн сюлэмаз биниське. Сыӵе кылбуръёсыз В. Кирилловлэн но, ӧжыт ке но, вань… Тани со огаз кылбураз гожтэм: «Етӥз буран лымылэсь куэм дэра» яке «Май кизе возь вылэ сяськаос». Владимир Романов 1980-тӥ аре пусъе: «Владислав Кирилловлэн нылпиослы сӥзем кылбуръёсын рукописеныз тодматскыса, шумпотӥ. Малы? Егит автор улонысь, пиналъёслэн шудонъёсысьтызы, асьме удмурт кылысь шедьтыны быгатэ туж тунсыко ситуациос… Отын вань ини кылбурлэн тысез, отысь ӝужалоз ӟеч кылбур. Шумпоттӥз соиз: автор пичи лыдӟисьёссэ меӵак дышетыны уг туртты». В. Романов пусйиз, В. Кириллов нылпиос сярысь гинэ уг, нылпиос понна гожъя шуыса.

 

* * *

1985-тӥ аре Кирла Ладиез Писательёслэн огазеяськонзылэн чеберлыко литератураез вӧлмытонъя (пропагандая) бюрояз ӧтизы. Куинь толэзь ортчыса, та бюролэн кивалтӥсез луиз. Пусйыны кулэ, совето вакытысен пропагандая бюроос хозрасчёт амалэн ужазы: уждун потэ вал коньдон поттэм бордысь. Кирла Лади доры тужгес но кыстӥськылӥзы сыӵеосыз, кинъёслы ужзы ласянь кыӵе ке но шуг-секытъёс кылдытэмын вал. Кылсярысь, Владимир Романов, кудзэ со вакытэ уггес печатлало вал, литература уже уг куто. Секыт югдуре шедьылӥзы, шуом, Александр Лаптев, Слава Сергеев, Никвлад Самсонов, Пельтэм Илья, Рената Иову, соос но Кирла Лади борды кыстӥськыны тыршизы. Кудӥз, оло, малпа вал, татын уж емышо, коньдоно но капчи шуыса, но озьы вылымтэ. Ачиз Владислав, ужан удысэзлэсь пайдазэ-дэлетсэ шедьтыса, ӝегатэм кылбур книгаоссэ арлы быдэ сямен печатлаз: «Лымы корка» (1988), «Бадьпу сайка» (1989), «Нылашлы кузьмай сяська» (1990). Ёросъёсы ӵем потаз бере, элькунын Кирла Ладиез умой тодӥзы. Данакез, дыр, оско ни вал, удмурт литератураын тани-тани яркыт ним ӝуатскоз шуыса. Но улонамы Ельцин вакытъёс вуизы, бадӟым воштӥськонъёс кутскизы. Соос кылбурчилэн ужезлы-утчанъёсызлы бадӟым шуккет сётӥзы (Россиысь тросэз писательёс та вакытэ кемалы чалмизы). Кирла Лади но ас творчествозэ мукет ӧре выжытӥз — литературая ужбергатонэ но коньдонбергатонэ. Озьы ини: огвакытэ ик та кык лудкечъёс сьӧры (творчество но уксё) уйиськыны уг луы, шӧдске.

1991-тӥ аре Москваысь ужкагаз вуиз, Удмуртиысь Писательёслэн огазеяськоназы нимысьтыз ёзэт кылдытоно шуыса, со Россиысь Литфондлэн удмурт ёзэтэз луыны кулэ, пе. Огъя кенешонын фондлэн положениез кутэмын вал, берлогес уставез юнматэмын. Соку ик Кирла Лади со фондлэн кивалтӥсез (директорез) луиз. Мар лэсьтӥз со фонд? Кызь ар куспын Кирла Лади 40-лэсь ятыр писательёслы книгаоссэс печатланы юрттӥз. Озьы ик творческой ӝытъёс, лыдӟисьёсын пумиськонъёс ортчытъяз. Начар улӥсь писательёслы коньдон юрттэт висъялляз. Трос удмурт писательёслэн ужъёссы Литфонд пыр ӟуч кылэ берыктэмын, ӟуч лыдӟисьёс пӧлы вӧлмытэмын. Крезьгурчиос но журналистъёс озьы ик та фонд пала кыстӥськыны ӧдъязы, угось книгаос татын дунтэмгес но чалякгес пото. Ваньзэ тае верано луисько таӵе муген: Литфондлэн удмурт ёзэтэзлы ӵапак туэ, 2011-тӥ аре, 20 ар тырмиз. Владислав Кириллов оске, та фондлэн кулэлыкез туннэозь ӧз быры, азьланьын но шӧдӥськоз ай. Али со малпа удмурт кылбурчиослэсь антологизэс дасяны, сое  ӟуч кылэ берыктыса, печатланы.

Бюролэн ужамез пумысен Кирла Лади трос тунсыко учыръёсты тодаз вайылэ. Кылсярысь, огпол Кузонысь вуылӥз прозаик Максум Насибуллин, асьме дорын со туала бигер литература сярысь мадиз. Со тодматскиз Риф Насибуллинэн, кудӥз возьматӥз аслэсьтыз бигер кылэ берыктэмъёссэ. Озьы Максум П. Кубашевлэсь но Н. Васильевлэсь «Ой тӥ, чебер нылъёс» кырӟанзэс одӥгаз бигер журналын печатлаз. Макем зол вӧлмиз со кырӟан бигеръёс пӧлы, али веранэз ӧвӧл ни, лыдӟисьёсмы сое умой тодо. Котьма ке но, Литфонд калыкъёс куспын эшъяськонэз юнматон бордын но пайдаё тыршиз.

Кирилловлэн кылбуръёсыз сизьым кылъёсы берыктэмын, та уж бордын 30 пала берыктӥсьёс тыршизы. Но тужгес но яркытэз — Анатолий Демьянов, кудӥз Владиславлэсь «Ива неплакучая моя…» (2004) кылбур бичетсэ ӟуч лыдӟисьёс понна дасяз.

 

* * *

Кирла Ладилэсь чуръёссэ тужгес но мур эскериз, мынам тодэмея, Евгений Самсонов. «Бадьпу сайка» бичет пумысен со тунсыко малпанъёс вераз: «Та книгалэн лирической героез — со ӧжытак кескичгес яке валамтэ улэ аналтӥськемъяськись, уж борды ас сяменыз мылысь-кыдысь кутскись, дунне улонэн тунсыкъяськись яке адямиосыз валаны турскись, чеберез, инкуазез но эшъёс доры кыстӥськись но вордӥськем гуртсэ яратӥсь бадӟым «адями»! Нылпиослы хрестоматиосы пыртымон усто гожтэмын, Евгений Самсоновлэн малпамезъя, «Нянь юдэс» кылбур. Тани со текст:

Сюрес дурын — ӟег нянь юдэс —

Кинлы ай нянь луэм мултэс?

Шат куштэмын ӟег нянь гинэ?!

Сэрпалтэмын тылси, лысву,

Калыкмылэн сюлмаськонэз,

Пӧсь уж, шунды, дун ву,

Сэрпалтэмын чебер ӟардон,

Зарни ӵукна но чилектон…

Сюрес дурын — ӟег нянь юдэс,

Кинлы ай нянь луэм мултэс?

Озьы Кирла Лади нылпиослы возьматэ, та дуннеямы ваньмыз ог-огеныз герӟаськемын, кытын ке но маке урод уж лэсьтӥськомы ке (сюрес дуре нянез сэрпалтӥськом), со мукет интыосын трос палъёсыныз адӟиське но шӧдӥське. Пусйымон луэ «сюрес» но, кудӥз кылбурлэн кутсконаз но пумаз кык пол потылыса, быдэс гожтосэз огазея, кульчоя.

Нимысьтыз висъямоноосыз пӧлы пыре Кирла Ладилэн мукетыз ужез — «Нылашлы кузьмай сяська». Та кылбурлы ньыль усточиос ньыль пӧртэм крезьгур гожтӥзы ини. Текст аслаз огшорыеныз бордаз кыске, мукет сямен вераса, солэн инъетэз — огшоры луисьтэм огшорылык. Возьдаськись пияш нылмуртлы сяська кузьма, номыр вератэк, сюлэмзэ шара усьтытэк. Пияш оске, сяська ачиз пимурт понна ваньзэ вералоз шуыса:

Нылашлы кузьмай сяська,

ӧй но вера гажамме.

Мон малпай, чебер сяська

Шӧдскытоз яратэмме.

Сяськалэн но пиштэмез

Адӟиськоз сайкыт синмаз,

Гажамме нош верамез

Юмшась тӧл нуоз сьӧраз.

Улонэз сяськаелэн

Туж вакчи, одӥг дырлы.

Сюлэмам кенжем тыллэн

Гомамез даурелы.

Нырысь-валысь учконо ке, лыдӟисьёс понна та кылбурын номыр вылез ӧвӧл кадь: синмаськыку сяська кузьмаськом, котьку но яратонмылэн «дауръёслы гоманэзлы» оскиськом. Но татын пусйымон луэ лирической геройлэн образэз, верамтэ кылъёс интые кылдӥсь подтекст, кудӥз со геройлэсь пуш дуннезэ усьтыны юрттэ.

Берло дыре мон выль сямен лыдӟи Владислав Кирилловлэсь «Эмезь гурезь» кылбурзэ. Автор меӵак тодытэ улоназ кылдэм шуг-секытъёс сярысь:

Улонлэсь выжызэ валаны тыршыса,

Улонлэн пыдэсаз вуэмме шӧдыса,

Мылкыды кыстӥське та эмезь гурезе…

Кылбурчи романтизм амалэн ваче пумит пуктэ кык дуннеосты — цивилизациен кылдытэм туала ёросэз но инкуазьлэсь чебер сэрегзэ, кудӥз, вылаз ик, геройлэн пинал дыреныз герӟаськемын. «Эмезь гурезь» дуннеын нылъёслэн «Шулдыр куаразы сюлэмез позыртэ, /Синъёсысь пӧсь-кузьыт синвуэз пызьыртэ». Со вакытэ ик татын «кулон» но аслаз тодмо тодметъёсыныз аслыксэ возьматэ ни:

Кытын ке но кин ке весь шукке кусозэ.

Со оло нош сопал дуннеысь кылӥське?

Огласянь, кулон — со кышкыт маке, кытын ке но матын шӧдӥське («кусо» символ огдыре ик тодмо но, тодмотэм но луэ); со дыре ик, кулонлэн матын луэмез героез буйгатэ: «Нош малы сюлэмы сокем гань-гань луиз…» Та кылбуръя ини вераны быгатӥськом, Кирла Лади берло вакытэ кыӵе ке но мукет гожъяськон ӧре выже кадь, выль «куараосты» кылзӥське но кылэ, выль сяменгес гожъяськыны тырше. Мар бен, та удысъя авторлэсь выль но выль утчанъёссэ (вормонъёссэ но ыштонъёссэ) возьмаломы.

 

* * *

Владислав Кириллов — Кузебай Герд, Иван Михеев но Айво Иви нимо премиослэн лауреатсы. Владислав Германовичез сюлмысь ӟечкыласьком 55 арес тырмеменыз, выль азинсконъёс, вормонъёс но кылбур книгаос сӥзиськом.

Виктор Шибанов.

Удмурт Дунне
By Удмурт Дунне 5 декабря, 2011 07:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<