Кытын будэ пичи Вася?

Удмурт Дунне
By Удмурт Дунне Декабрь 6, 2011 08:54

Кытын будэ пичи Вася?

Янош Пустаи.

Венгриысь Сомбатхей университетысь профессор Янош Пустаи сюлмаськемъя Европалэн огазеяськонэз фин-угор кылъёсты азинтонлы коньдон висъяз. Таӵе юрттэтлы луыса удмурт, пор, мордва но коми кылъёсы берыктэмын вал уно терминъёс. Кызьы пыӵалозы соос удмурт школаосын? Удмурт кылэз утён но азинтон ласянь макем бадӟым соослэн пайдазы? Та юанъёс ӝутэмын вал Удмурт кун университетын ортчем пумиськонын.

Школаын дышетоно предметъёсъя нимкылъёсты (терминъёсты) удмуртэ берыктон радъяськиз эскерон чот. Со борды басьтӥськизы удмурт филология факультетысь дышетӥсьёс. Физикая терминъёсын ужаз Виктор Шибанов, обществознаниея но химияя кылъёсын — Ольга Тронина, историяя но биологияя терминъёсын — Ольга Стрелкова, математикая но информатикая нимкылъёсын — Надежда Тимерханова, удмурт кылъя терминъёсын — Нина Сергеева. Проектлэн удмурт люкетэзлэн координаторез луиз удмурт филология факультетлэн деканэз Любовь Фёдорова.

Янош Пустаи пусйиз: университетысь дышетӥсьёс зол тыршизы. Терминъёсты вакчи дыр куспын берыктӥзы. Соосты кӧнялы ке гинэ азьпалтӥзы комиос. Нялтас вераса, удмурт дышетӥсьёс тужгес но зол ужаллям нимкылъёслэн ӟечлыксы бордын. Кылсярысь, математикая терминъёсты комиос 25 процентсэ берыктыны пӧрмытӥллям, поръёс — 18 процентсэ гинэ, нош удмуртъёс — 35 процентсэ.

— Терминъёсты удмурт кылэ берыктонын ми пыкъяськимы кылем даурын 30-тӥ-50-тӥ аръёсы мытэм уж вылэ — соку но радъямын вал нимкылъёсты удмурт сямен пусъён, — веранзэ мытӥз Любовь Фёдорова. — Палэнэ ӧм кельтэ республикаысьтымы Терминъёсъя но шонер гожъяськонъя комиссилэсь туала вакытэ тыршемзэ. Шумпотымон, туннэ киямы возьыны быгатӥськомы ни котькуд предметъя дасям терминъёсты. Табере милемлы басьтӥськоно луоз кадръёсты дасян борды. Ӵапак соос мед тодозы но урокъёсазы кутыны мед быгатозы выль нимкылъёсты. Талы, валамон, дыр кулэ. Угось литературая но кылъя гинэ ӧвӧл, шуом, химияя, биологияя специалистъёсты но дасяно луоз. Венгриысь лингвист Жужа Шаланки ӵектэ тэшкылиослы чаклам шудонъёсы но удмурт нимкылъёсты пыртыны. Озьы соос ӝоггес вӧлмозы.

Ватсано: удмурт кылэ берыктэм нимкылъёсты нимаз бичетъёсысь гинэ ӧвӧл, Интернетысь но шедьтыны луоз. Соос пуктэмын луозы Удмурт кун университетысь удмурт филология факультетлэн сайтаз.

Терминъёсты удмурт кылэ берыктонлы вылӥ дунъет сётӥз нациосын ужан политикая министрлэн воштӥсез Лариса Буранова.

— Президент Александр Волков дорын алигес ортчиз удмурт шрифтъёслы сӥзем кенешон, — вера Лариса Николаевна. — Президент ужпум пуктӥз: туэ ар пумозь Интернетын кылдытоно шрифтъёслы сӥзем форум ресурс. Со сярысь мед тодоз калык. Мыло-кыдоос, отчы пырыса, асьсэлэн компьютеръёсазы лякытэн пуктыны мед быгатозы удмурт шрифтъёсты. Со сяна, отын ик кылдытоно удмурт нимкылъёслы сӥзем сэрег: мед радъяськозы соослы сӥзем ченгешонъёс, ӵошатсконъёс, мылкыдъёсты шараянъёс.

Лариса Буранова шараяз на мукет тунсыко иворез. Матысь дыре шаерамы усьтӥськозы «METRO» гипермаркетъёс. Соос быдэс дуннее вӧлмемын, табере выжыяськозы Удмуртие но. Та бадӟым магазинлэн кивалтӥсьёсыз санэ басьтытэк ӧз кельтэ шаермылэсь кун кылзэ — удмуртэз. Вазиськизы Нациосын ужан политикая министерствое, гипермаркетъёсысьтызы ёзъёссэс удмуртэ берыктыны курыса. Удмурт нимкылъёсты улонэ пыӵатон азьланяз эшшо но паськытгес вӧлмоз, осконзэ вераз министрлэн воштӥсез.

Мылкыдзэ шараяз Пичи Пурга ёросысь Шор Кечол гуртысь удмурт кылъя но литературая дышетӥсь, удмуртоведъёс пӧлын туэ ортчем ӵошатсконын вормисе потэм Нина Ермокина:

— Тодам вайисько урокысьтым одӥг учырез. Пиналъёслы уж сётӥ: василёк, гвоздика, анютины глазки сяськаослэсь ӟуч нимъёссэс удмурт кылэ берыктоно. Одӥгез пияш соосты тазьы пусъем: василёк — пичи Вася, гвоздика — пичи кортӵог, анютины глазки — Анялэн синъёсыз. Туж шумпотӥсько терминъёсты удмуртэ берыктонъя проектлы. Азьланяз асьмелы эшшо но паськытгес вӧлмытоно словарьёсты. Отысь кылъёс мургес мед пыӵалозы вераськонамы. Медаз луэ «пичи Васяос» но «пичи кортӵогъёс».

Удмурт нимкылъёсты вӧлмытон пумысен вераськиз УдГУ-ысь Дышетонэз азинтонъя институтысь наукая ужась Валентина Ившина:

— Кема аръёс ӵоже пыриськи Терминъёсъя но шонер гожъяськонъя комиссилэн ужаз — мон та удысысь ветеран. Тодам вайисько: удмурт нимкылъёсты школаын пыӵатонэз эскерон чотын мытӥмы вал Алнаш ёросысь Кузебай школаын. Шараяськиз: пиналъёс удмурт нимкылъёсты нимаз валало, огъя контекстын соосты валамысь дугдо. Ӝоген та эксперимент дугдытэмын вал. Тодӥськомы, терминъёсты удмурт сямен валэктонын бадӟым уж нуиз Кузебай Герд. Но соку та уж номырин воштонтэм вал. Угось удмурт гуртъёсысь удмурт пиналъёс, ма, арлыдоос но, ӟуч кылэз шер кылылӥзы. Туала вакытэ, зэмзэ вераса, удмурт терминъёсты вӧлмытыны секытгес луоз. Угось туннэ удмурт пиналъёслэн вераськоназы мур пыӵа ӟучез. Но уж мытэмын, соин ик сое йылозяз-пумозяз вуттоно. Пайдаез одно шӧдӥськоз.

Таӵе ик мылкыдыз Пичи Пурга ёросысь Уром каргуртысь физикая дышетӥсьлэн Геннадий Петровлэн но. Со шуэ: удмурт терминъёсты кутонлы пумитъяськисьёс одно ик луозы, но таӵеез пумиськылэ котькуд выль ужын. Солэсь кышкано ӧвӧл.

Нимкылъёсты удмуртэ берыктонын шӧдӥськизы туала вакытлэн куронъёсыз. Удмурт пиналъёс кыстӥсько Интернет, ивор технологиос борды. Соин ик та удысысь терминъёсты удмуртэ берыктон ӝоггес радъяське. Кызьы ивортӥз Историяя, кылъя но литературая Удмурт институтысь наукая сотрудник Александр Егоров, ӵапак солы оскемын вал информатикая терминъёсты удмуртэн пусъён — та ужын со пыкъяськиз огъёзъёсызлэн «емышъёссы» вылэ. Кылсярысь, «ВКонтакте» сайтын кемалась мытэмын ни компьютер-Интернет кылъёсты удмурт кылэ берыктон. Удмурт сайтъёс пӧлын ортчись «Зарни вотэс» конкурсэз радъян но бадӟым вамыш луэ ини.

Елена Тугашова. 

Удмурт Дунне
By Удмурт Дунне Декабрь 6, 2011 08:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<