Кытчы ышизы Пегась но Лётчик?

Удмурт Дунне
By Удмурт Дунне 9 декабря, 2011 11:37

Кытчы ышизы  Пегась но Лётчик?

Вашкалаос валэн улӥсь кузёез узыр адямиен лыдъяллязы. Ваньбурез лыдъясь-чотасьёс но гожъянзэс нырысь ик  вал бордысен кутскылӥзы. Собере ни мынӥзы скал, парсь но мукет пудо, тылобурдо. Россиын вал туж дуно сылӥз. ӟеч выжыысь валъёс понна купечъёс коньдонзэс жалятэк жильдылӥзы. Макем вал ӟеч, сокем дано но узыр адями.

Тушмонъёсты валъёсын вормылӥзы Александр Невский, Пётр Первый, Александр Суворов. Сарапулын вордскем герой Надежда Дурова но аслаз гожъямъёсаз макем ӟеч вера валэз сярысь. Гордъёс но тӧдьыос куспын ожмаськонъёс пӧрмылӥзы валъёслэн ваче ожмаськонъёссылы. Быдӟым войнаын но валлэн данэз ӧз ышы. Колхозъёсысь миллионъёсын валъёс оже кутэмын вал. Коллективизация аръёсы вань бусы ужъёсты быдэсъяз та пудо.

Улон воштӥськемъя валэз вордыны кутскизы сӥльлы но йӧллы (кумыслы), уже кутӥськизы куэз но гонэз. Азинскыны ӧдъяз валэн ворттылонъя спорт.   

Асьме шаерын вал вордон удыс ӝутскылӥз. Но 50-тӥ аръёсы лябӟиз. Валэз кутылӥзы на, пудоез возьмаку, гидъёс котырын ужаку, бакчаез гырыку-кизьыку. Нош али тазэ но шергес адӟод ни. Ува ёросысь Выль Мултан муниципал кылдытэтлэн йырыз Олег Дмитриев мылкыдзэ кисьтэ:

— Гуртамы 200 пала улон юртъёс ке но, валъёс ӧвӧл ни, шуыны луоз. Пудо гидъёсын ужан понна куинь-ньыль вал возе гурт огазеяськон, сомындагес ик калыклэн.

Пичи дыръям эшъёсыным весь валъёс котырын бергаллям. Тужгес но бадӟым шумпотон луылӥз ужпиез ворттылыны-ужаны дышетон. Та понна ми вожмаськылӥм. Паймымон нимъёс сётъямы валъёслы: Пегас, Пегась, Лётчик, Таймыр, Беркут… Табере Ожмос-Пурга вордскем гуртам вал гид быдтэмын, валъёс кӧня ке йыр гинэ кылемын на.

Валъёслы пудо сиён дасян дуно усемен (яратоно сиёнэз солэн сезьы), уноез гурт хозяйствоос вал вордонэз пайдатэмен лыдъяло.

Эгра ёросысь «Чутырский» СПК — азьветлӥсь хозяйство. Музъемъёсызъя но ваньбурезъя Удмуртиын тужгес бадӟымъёсыз пӧлы пыре. Техниказы кужмо ке но, вал уллёзы ог дасо аръёс огвыллем — 60 йыр котыр. Та пумысен хозяйстволэн кузёез Пётр Перевощиков вера:

— Пайдаез ӧвӧл, соин матысь дыре валъёсмес кулэстом. Дэбес ёросысь «Тыловай» гурт огазеяськонын, Можга ёросысь «Россия» хозяйствоын — 86 йыр. Ува ёросысь «Дружба» хозяйствоын, кызь арлэсь ятыр валъёсын ужам сяна, усьтэмын вал тӥрлык лэсьтонъя цех. Но со ворсаськиз.

Ижевскысь ипподром усьтӥськиз 1949-тӥ арын. Пӧртэм выжыысь валъёсты отчы вайизы Удмуртиысь фермаосысь но Россиысь заводъёсысь. Ипподром пушйыны кутскиз 1954-тӥ арысен. Соку Москваысь зоотехнической институтлэн зооинженерной факультетэз Ижевске выжтэмын вал. Соин ӵош асьме шаере та удысэз ӟеч тодӥсь специалистъёс вуизы. Озьы вал вордонэн ӵош ӝужаны кутскиз валэн ворттылонъя спорт но. Али ипподромын будэто ӟеч выжыысь ужпиосты.

Мукетыз вал вордӥсь хозяйство «Граховский конный племзавод». Ипподромын но та гурт предприятиын ньыль выжы вал будэто: секыт нуллӥсь ӟуч, гонӟыр (юрго) ӟуч, гонӟыр орлов но вятка. Инты шедьто ни асьме шаерын ганновер выжыысь валъёс но. 2010-тӥ арын Удмуртиын 4 сюрс 842 вал пусъемын, кылем арын — 4 сюрс 229. Одӥг ар ӵоже уллё кулэсмиз 613 йырлы. Туэ хозяйствоос пудо сиён бусьтыр люказы. Тужгес удалтӥз сезьы. Таин сэрен вал возисьёс, оло, уз люкиське яратоно удыссылэсь.

Ува ёросысь «Дружба» гурт огазеяськонлэн кивалтӥсез Олег Кочуров сюлмаськемзэ вера:

— Вал вордонын кыӵе ке табыш поттон сярысь веранэз ик ӧвӧл. Ми тани орлов но ганновер выжыосысь эрвалъёсты будэтӥськом. Та дырлы ужмы дыго-мого мынэ.

2008-тӥ арын та хозяйствоен кивалтыны кутскемез бере Олег Георгиевичлэн бадӟым малпанъёсыз вал: ӟеч выжы будэтыса, палэнэ вузано, валэн ворттылон инты усьтоно, кумыс лэсьтоно, спортэн выроно. Но номыр ӧз пӧрмы.

Грак ёросысь вал будэтонъя завод али бадӟым ыштонъёсын ужа, соос араз 3 миллион пала люкасько. Кӧс 2010-тӥ арын огъя ыштонъёс вуизы 10 миллион манетозь. Огазеяськонлэн учредительёсыз 5 миллион манет висъязы. Но кулэ 50 миллион. Сое сётӥсь уг шедьы.

Вал вордон удыс выльысь улӟыны быгатоз кун ласянь юрттэтлы луыса гинэ. 2007-тӥ арын сое пыртӥзы Россиысь агропромышленностья комплексэз азинтонъя нацпроектэ. Берло дыре арлы быдэ ортчыло Россиысь Президентлэн призэз понна ӵошатсконъёс. Саклык висъяны кутскизы та удыслы куд-ог республикаос но улосъёс. Туэ Татарстан Республикаын бадӟым кенеш ортчиз вал вордон удысъя. Угось та шаерын вал чутрак кулэсмыны кутскем — 78 сюрс йыр пӧлысь кылем на 33 сюрсэз гинэ. Президентсы Рустам Минниханов ужпум пуктӥз: вал возёнлэсь данзэ выльысь берыктоно. Асьме республикаын но та ласянь ужрадъёс мед кутӥськозы вылэм.

  Иван Аркашев.

Удмурт Дунне
By Удмурт Дунне 9 декабря, 2011 11:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<