Калыкез пумиталом пальышаса!

Удмурт Дунне
By Удмурт Дунне 2 декабря, 2011 07:55

Калыкез пумиталом пальышаса!

Дэри ёросысь Якшур черкогуртысь быръёнъёсъя участокын ужасьёс О. Анисимова но П. Романов.

Дэри ёросысь Якшур черкогуртын быръёнъёсъя участок интыяськемын культурая юртын. Отын куаразэс сётозы Якшур поселение пырись 8 гуртын улӥсьёс. Кызьы отын мынэ быръёнъёслы дасяськон? Та юанлы валэктэ Якшурысь быръёнъёсъя комиссилэн кивалтӥсез Пётр Романов.

Якшурысь быръёнъёсъя комиссие пыре 10 адями. Пӧлазы вань пенсие потэм мӧйыос но, быръёнъёсты радъянэ нырысьсэ пыриськись егитъёс но. Якшур гуртысь библиотекалэн кивалтӥсез Ольга Анисимова быръёнъёсъя комиссилэн ужаз та дырозь ӧз пыриськылы вал на. Ужаны ӵектэмзылы пумит ӧз луы.

— Татын ӵукнаысен ӝытозь пукиськомы, юанэн вазиськисьёслы валэктон сётӥськомы, — шуэ Ольга Владимировна. — Та нуналъёсы кӧня ке мурт открепительной удостоверение басьтыны вуылӥз. Соос татын уло, но ужаны нуналлы быдэ Ижевске ветло. Быръён нуналэ, пе, куарамес Якшурын сётыны ум быгатэ, нош открепительной удостоверениен Ижысь кыӵе ке участокын куаразэс сётозы. Таӵе удостоверение курыса вазиськисьёс пӧлысь тросэз — югдурез утисьёс. Соослы угось быръён нуналэ уй-нунал ужано луоз.

Якшур поселениысь быръёнъёсъя участоклэн кивалтӥсез Пётр Романов куара сётонэз радъянын кыдам адями. Ма, мӧйыосын но, егитъёсын но огкыл капчиен шедьтэ угось. Пётр Геннадьевич 17 ар ӵоже ини Италмас каргуртысь шор ёзо школаын машиноведениен дышетэ.

— 4-тӥ декабре милемлы, жадёнэз тодытэк, ужано луоз, — шуэ Пётр Геннадьевич. — Поселениямы 8 гурт пыре, соосты автобусэн ваёзы-нуозы. Озьы комиссие пырисьёслы ӝог ужано луоз. Бускель гуртын тани чиганъёс уло, кандидатъёс пумысен тодон-валанзы сокем ӧвӧл, но асьсэлэсь правозэс тодо — куаразэс сётыны лыкто. Милемыз валэктыны куро, кандидатъёс пӧлысь кин ай, пе, тужгес но оскымон? Нош милемлы та ужен вырыны уг яра. Ми — быръёнъёсты радъясьёс гинэ.

Куара сётон пумысен калыклэн трос юанъёсыз кылдыло, пусъе П. Романов. Озьыен, калыкмы тырше политикаез мургес тодыны но странамес азинтонэ мыло-кыдо пыриськыны.

— Кӧня пол быръёнъёсты радъянэ пыриськисько ини, котьку синйылтӥсько: ӵукна вазь ик — тямыс часысь кӧня ке минут потыса — участоке дырто мӧйыос. Мар шуод: соослэн дисциплиназы туж вылӥын, — шуэ Пётр Романов.

Быръёнъёсъя котькуд участокъёсы туннэ вуозы ни бюллетеньёс. Комиссие пырисьёс котькудаз бюллетене печатьсэс, кинюртэмъёссэс но нимысьтыз акциззэс (подделкалэсь утись пус) пуктылозы. Со сяна, пыр-поч эскерозы куара сётӥсь адямиослэсь списоксэс. Угось берло нуналъёсы улонысь кошкемъёс но луыны быгатозы. Кызьы ивортӥз Пётр Романов, соослэсь нимтулъёссэс списокысь куштыны луэ, кулэм сярысь свидетельство вылэ пыкъяськыса.

Якшурысь быръёнъёсъя комиссилэн ёзчиосыз ӝутскем мылкыдын витё матэктӥсь быръёнъёсты. Пӧсяно ке но луоз, ваньмыз чакламъя, калык радъя ортчоз.

Елена Никитина.

Туспуктӥз Владимир  Беломорских.

Удмурт Дунне
By Удмурт Дунне 2 декабря, 2011 07:55