Зэмлык — зэмос лыд

Удмурт Дунне
By Удмурт Дунне 6 декабря, 2011 08:37

Валлян, 4-тӥ декабре, Россия мылкыдзэ вераз азьланез пумысен. Вазь ӵукна ик быдэс страная 100 сюрслэсь трос участок усьтӥськиз. Куара сётыны луонлыкез вал 108 миллион муртлэн. Кун Думае быръёнъёсы кунысь вань улосъёс пыриськизы, куаразэс сётӥзы 60,2 процентэз бырйисьёс.

Асьсэлэсь мылкыдзэс ивортӥзы ву пыдсын, ин сьӧрын, лымы букосъёс пӧлын улӥсьёс но — угось дуно котькудӥз куара. Зэм, кылем быръёнъёсын ӵошатыса, со ичигес. Котьку сямен, шаплы луэмзэс но политикаен тунсыкъяськемзэс возьматӥзы Уйпал Кавказын улӥсьёс: Дагестанын выборе мынӥз 79 процентэз, Ингушетиын — 73, Кабардино-Балкариын — 91, Чечняын — 93 процентэз. Паймытӥз Мордовия — татын мылкыдзэс веразы 90,5 процентэз улӥсьёс. Со пӧлысь 94 процентэз (!) — «Огъя Россия» понна. Удмуртия шоро-куспо лыдпусъёс возьматӥз — участокъёсы вамыштӥз 692 сюрс мурт (56,55 процент).

Думаысь 450 пукон понна нюръяськиз 7 партиысь 2 сюрс 999 мурт, конкурс — одӥг интые 6,6 адями. Кызьы тодмо, парламентлэн улӥ палатаяз сюрон понна партиос 7 процентэз ортчыны кулэ. Партия понна куаразэс сёто ке 6-7 процентэз бырйисьёс, со басьтэ 2 депутат мандат, 5-6 процент ке — одӥг мандат. Туннэ тодмо ни: куатетӥ ӧтчам Думаын оглом номыр но чутрак уз воштӥськы, кыле ньыль тодмо партия: «Огъя Россия» (49,54 процент), КПРФ (19,16 процент), «Зэмлыко Россия» (13,22 процент), ЛДПР (11,66 процент).

Лыдпусъёсъя учконо ке, вормиз «Огъя Россия». Одӥг партия понна 49,54 процент — оглом бадӟым лыдпус. Арнянунал ӝыт Президент Д. Медведев но премьер В. Путин, артэ сылыса, ӟечкылазы партилэсь дурбасьтӥсьёссэ та вормонэн. Юскиськем мылкыдзэс ӧз возьматэ.

— Котьма ке но партия ӟеч ужаз, лыдпусъёс оптимальноесь, — шуизы кивалтӥсьёс. — Басьтэм авторитетэз утьыны капчи ӧвӧл уго. Но оглом валам: ми азинскиськом шонер сюрестӥ.

«Огъя Россия» азьвыл кадь ик валтӥсе кыле ук, мар ӝожомонэз, Думаын законъёс кутыку, солэн 238 куараез луоз. Но «огъяроссъёс», мар ватонэз, калыклэсь золгес дурбасьтэмзэ витизы вал… Угось кылемаз быръёнъёсы, 2007-тӥ арын, со бичаз вал йыр поромымон лыдпус — 64 процентлэсь трос. Но та рад калыклы маке уг кельшы, озьыен, малпаськоно. Мукет ласянь, ӵап та нунал бере калыклэн зэмлыклы осконэз будыны кулэ. Угось та дырозь тросэз быръёнэ ӧз мынылэ, мон бордысь, пе, номыр но уз поты, кызьы кулэ, озьы ик гожтозы, шуылӥзы. Потэ вылэм. ЦИК-лэн алдаськемез потысал ке, валтӥсь партилэн лыдпусъёсыз шӧдскымон вылын луыны быгатысалзы ук. Нош пӧртэмлык шӧдскымон.

Мукетъёслы мандатъёс люкиськозы тазьы: коммунистъёслы — 92, эсеръёслы — 64, либерал-демократъёслы — 56. Выль Дума ужалоз матысь 5 ар ӵоже.

Зинаида Рябинина.

Удмурт Дунне
By Удмурт Дунне 6 декабря, 2011 08:37