Зуркан пыр

Удмурт Дунне
By Удмурт Дунне Декабрь 29, 2011 15:03

Зуркан пыр

Пукыч ньӧл кадь лобо аръёс. Макем кыдёкегес азьлань вамышъяськом, сокем ӝоггес. Нош маин тодэ кылёз таиз ар: одӥг-кык учырен-а яке улон шоры учконмес чутрак воштэменыз-а?

Оглом чаклано ке, Россиысь но Удмуртиысь кивалтӥсьёс та ар ӵоже трос вераськизы огсыр азинскон, модернизация сярысь. Но макем огсыр вал ачиз улон-вылонмы?

 

Лобан но данъян

Ортчись ар Президентлэн Дмитрий Медведевлэн указэзъя ялэмын вал Космонавтикалэн ареныз. 2011-тӥын 12-тӥ апреле 50 ар тырмиз адями нырысьсэ инсьӧры лобем дырысен. Та учырез Россиын тодэ вайыса, трос бадӟым ужрадъёс ортчизы, космосэн тунсыкъяськон выльысь улӟиз. Но туэ ик шара верамын вал: космосэн герӟаськем удыс — кризисын. «Роскосмос» туж ёрме ӟеч кадръёслы. Угось 90-тӥ аръёсы та удысъя специалистъёсты дасямысь воксё дугдӥмы. Зэм, ракетаос асьмеос лэсьтӥськом. Но татын укыр данъяськыны номырин: ар ӵоже кӧня ке ракетамы мыдлань кожиз яке воксё ӝутскыны ӧз вормы.

Удмуртиын улон-вылон мукет ужпумъёс котырынгес бергаз. Республикаямы ортчись ар сӥземын вал ужась адямилы. Таин валче иворъёсты вӧлмытон ёзъёс тыршизы пӧртэм удысъёсын ас киынызы маке лэсьтӥсь адямиосты возьматыны. Нош республикалэн кивалтӥсьёсыз сюлмаськизы куашкам бадӟым предприятиосмес ӝутон сярысь, нырысь ик «ИжАвто» но Сарапулысь радиозавод пумысь. Озьы огез йырвисён вормемын вал. Туэ январь толэзьысен «ИжАвто» предприятие ужаны кутӥзы 2 сюрс 500 пала адямиез. Нош ар пумын ни Удмуртилэн кивалтӥсьёсыз пусйизы: та заводлэн ужаны кутскемез — республикамылэн 2011-тӥ ар понна тужгес бадӟым вормонэз. Нялтас вераса, «ИжАвто» но «Ижмаш» предприятиослы директоре туэ выль адямиос юнматэмын.

Нош кызьы улӥзы гуртоос? Кылем арен ӵошатыса, туэ соослы удалтӥз. Берло тямыс ар ӵоже сомында урожай республикаямы бичамын ӧй вал на. Уно аръёс ӵоже нырысьсэ пудолы быдэ 25  центнер сиён дасямын. Выльдэмын яке выльысь пуктэмын пудо вордонъя 10 комплекс, кылем арен ӵошатыса, одӥг куиньмослы тросгес комбайнъёс басьтэмын. Валамон, азьло шуг-секытъёс туэ но шӧдӥськизы. Но гуртоослы шокчон маза луиз ик.

 

Часта куноос

Шаерамы федерал кивалтӥсьёс «кунояськыны» ӧз дыртэ. Ма, рос-прос мугез но ӧй вал, лэся. Огъёсыз бадӟым юбилейёс ортчизы ни, мукетъёсыз ӧз на вуэ. Зэм, дорамы кожалляз Россилэн премьерез Владимир Путин. Но часталы гинэ. Воткаысь заводын со кенеш ортчытӥз ожгар техникаез поттон ласянь. Нимысьтыз программая та заводлы трос заказъёс чакламын. Со сярысь Путин кӧня ке пол вераз. Ракета комплексъёс поттон программая оглом 77 миллиард манет чакламын ке, 9 миллиард 600 миллионэз келямын луоз Воткаысь заводэ.

Нош «Росатомлэн» кивалтӥсез Сергей Кириенко сӥзьыл ветлӥз Механикая Чепца заводэ. Угось татын шугъяськонъёс кылдӥзы: предприятие 1 сюрс 500 ужан интызэ но 4 миллиардлэсь трос табышсэ ыштыны быгатэ вал. Ярам, югдур тупатскиз.

Республикаысьтымы предприятиосы, шуген ке но, модернизация пыӵаны выриз. Шуом, Можгаысь «Свет» завод 42 процентлы выльдӥськиз.

 

Кинэ кытчы?

Политикаын огсыр вал шуыны уг луы. Май толэзе премьер Владимир Путин ялӥз Калык фронт кылдытон сярысь. Удмуртиын отчы пыриз 60 пала огазеяськон. Пӧлазы — «Удмурт кенеш» ассоциация но. Нош оглом Россиын фронт котыре огазеяськиз 2 сюрслэсь трос организация.

Туэ ӝыны ар ӵоже ваньзы туназы: кин вуоно арын Россилэн Президентэз луон понна вожвылъяськоз —  Медведев яке Путин? Кудпала тӧл пельтоз? Ар шорын Медведев ивортӥз: Президентэ уз ни мыны. Путин понна дурбасьтэмзэс веразы «Огъя Россия» партилэн съездаз.

4-тӥ декабре Кун Думае быръёнъёсын нырысетӥ интые нош ик потӥз «Огъя Россия», со понна куаразэс сётӥзы 49,32 процентэз бырйисьёс, Удмуртиын — 45,09 процентэз.

Кун Думае быръёнъёс партилэн списокъёсызъя мыно бере, бӧрысь уноезлы валантэм луэ: куарамес, пе, сётӥмы огъёсыз кандидатъёс понна, нош Думае шедизы мукетъёсыз. Таӵе учыр тросаз субъектъёсын кылдӥз. Ӝожомонъёс пӧсьтӥзы Удмуртиын но. Со сяна, Россиын оппозиция выль кужымен ӵашетыны ӧдъяз: быръёнъёс зэмлыко луыны кулэ! Москваын но мукет городъёсын уно сюрс адямиос пумитъяськон ужрадъёсы потазы.

Ваньзэ тае лыдэ басьтыса, вылды, Президент Дмитрий Медведев шара ялӥз: Россиын политикая системаын воштӥськонъёс луыны кулэ. Нош премьер Владимир Путин выль кужымен басьтӥськиз коррупциен нюръяськон борды.

Меӵак вераса, туэ Россиысь политикаын тросэз воштӥськонъёс герӟаськемын вал матэктӥсь президент быръёнъёсын. Кун Дума гинэ ӧз выльдӥськы, воштӥськизы Правительствоысь, Федерацияя Советысь куд-ог азьветлӥсьёс.

Удмурт шаерамы со тӧлъёс сокем ӧз шӧдӥське. Но республикаямы кылдӥзы выль министръёс. Гурт удысэз валтыны оскемын удмурт адямилы —  Алексей Стрелковлы. Нош азьвыл министр Александр Коробейников  луиз вице-премьер. Транспортъя но сюрес хозяйствоя министрлэн интыяз пуксиз Эгра ёрослэн азьвыл йырыз Олег Гарин, югдурез утёнъя министр луиз Александр Первухин.

Республикаысьтымы 11 ёрос Выль арез выль йырен пумиталоз.

 

ВВП

Кризис котырын берганъёс ӧз чалмылэ. Ар пумын Россиысь кивалтӥсьёс пусйизы: кунмы со пыр потӥз, нош Европа ялан мургес нёпое вые. Россиын инфляция 6 процент пала луиз. Удмурт шаерамы — 6,7 процент. 2011-тӥ арлэсь вормонъёссэ веран понна Россиысь кивалтӥсьёс пусъё: ар ӵоже огъя продукт (ВВП) 4 процентлы будӥз, инфляциез серметаны луиз, ужтэк кылемъёслэн лыдзы но трос ӧвӧл, экономика огсыр азинске.

Ма, мувӧйлы шоро-куспо дунъёс ӟеч возиськизы — баррелез понна 108 доллар. Кылем арен ӵошатыса, палэнэ со тросгес вузамын вал. Озьыен, кунмы инкуазь узырлыкъёсты вузан чотын улонлэсь ӧз палэнскы, та пумысен кивалтӥсьёс трос вераськизы ке но.

Республикаямы туэ 10 миллион 500 сюрс тонна пала мувӧй кыскемын. Со сяна, шаерамы лэсьтӥськон ужъёс ӧз дугдылэ. Ар ӵоже 500 сюрс квадрат метр улон интыос, выль ӟуч театр, школаос, стадионъёс пуктӥськизы.

 

Араб тулыс

Музъем вылын ваче вуонъёстэк, ожъёстэк уг ортчы огез но ар. Туэ граждан ож пуромиз Ливиын. Франциысь, Великобританиысь но США-ысь ожгарчиос со вылэ бомбаос куязы. Сюлмаськытӥзы Египетысь, Тунисысь но мукет кунъёсысь ваче вуонъёс. Ма, дуннеын быдэс 2011-тӥ ар «араб тулыс» нимын кылёз, вылды.

Зуркыт вал кунамы но. Январе пуштӥз Москваысь Домодедово аэропорт, 37 адями быриз. Та йыружез «пӧрасьёс» кыл кутытэмын.

Шаерамы ӵапак май праздникъёсты пусйыку, Пакистанын быдтэмын террорист Бен Ладен. Но терроризмлы пум озьы гинэ вуысал ке. Та чер кӧчиз азьвыл шыпыт кунъёсы но. Адями быдтонэн лӧптылыны кутскизы зэмос террористъёсын воксё герӟаськымтэос. Озьы тулыс пуштӥз Белоруссиысь Минск городысь метроын. Кырмемын вал кӧня ке ар ӵоже ни пуштытъянэн вырись егит пиос. Суд соосты ыбыны пуктӥз. Нош гужем Норвегиын террористэн сэрен быриз 77 адями.

 

Адӟымтэ адӟонъёс

Пичи Удмурт шаерамы гинэ но кужмо пуштон дыбыртӥз. Пугачёво дорысь ожгар базаын зурканъёс быдэс Удмуртиез куалектытӥзы. Уно сюрс адямиослэн сюлэмазы кышкан пыраклы кылиз, лек потос выллем. Пугачёво котырын кылдэм югдур сярысь ивортонъёс кӧня ке нуналъёс ӵоже ӧз чалмылэ валтӥсь федерал телеканалъёсын но. Огъя кужымен 3 сюрс пала объектъёс, юртъёс тупатъямын вал.

Удмурт шаерын зурканъёс бӧрсьы толэзь но ӧз ортчы, кӧшкемыт адӟон вуиз бускельёсмы доры. Волга шурын выйиз «Булгария» теплоход, быриз 120-лэсь трос адями. Россиез оглом чаклано ке, шудтэм учыръёс туэ ӵемысь герӟаськемын вал вужмем техникаен яке кышкытлыклэсь утиськонъя куронъёсты вунэтонэн. Кӧня ке пол усьылӥзы самолётъёс: Сургутын, Петрозводск вӧзын, Ярославль дорын. Берлояз быриз  быдэс «Локомотив» хоккей команда.

Вылӥ верам секыт адӟонъёс адямиен сэрен луизы. Нош Япониын кужмо музъем зуркан — инкуазьлэн лекъяськемез. Кӧня ке город быдэсак куашказ-быриз. 20 сюрс пала адями кулӥз. Фукусима электростанциын авария бере котыр вӧлдӥськиз радиация. Та толэзе ик шимес бергась 185 сильтӧлъёс эрказъяськизы США-ын. Нош ар пумын музъем витёнтэм шорысь туж зол зурказ Россилэн уйпалаз, Тываын. Таӵеез отын 100 ар ӧй вал ни.

 

ӟоскыт ке но, шудо!

Ортчем ар возьматӥз: Музъем вылын ӟоскытгес луиз. Интернетлы, вылӥ технологиослы луыса, иворъёс дуннеез син куспын котырто, калыкез огвыллем шумпотто, бугыръяло, куректыто, малпанъёссэ ӝыт куспын воштыто.

Туэ ик удмурт кыл Интернетэ выль кужымен пыӵаны ӧдъяз. Со сяна, удмуртъёс асьсэды пӧртэм удысъёсын возьматыны тыршизы. Фин-угор чеберайёсты быръён конкурсын асьме нылаш, Ксения Воронцова, нырысетӥ инты басьтӥз. Вуоно фин-угор чебераез быръён табере нырысьсэ ортчоз Удмуртиын.

Россиын но Европаын вормонъёсынызы паймытъямысь ӧз дугдылы удмурт егитъёслэн «Сайлент ву гур» группазы, азьло сямен ик пиштӥзы Брангуртысь песянайёсмы. Трос ужрадъёс ортчизы, Трокай Борисовлы 120 ар но «Удмурт кенешлы» 20 ар тырмонлы сӥзьыса. Но ӝожомытӥз мукетыз: туэ шараям лыдъян-чотанъёсъя, Россиын, 2002-тӥ арен ӵошатыса, асьсэды удмуртэн лыдъясьёс 85 сюрслы ӧжытгес кылизы…

Пусъём на: 2011-тӥ арын дуннеын улӥсьёслэн лыдзы 7 миллиард луиз, нош Удмуртиын ар ӵоже 22 сюрс пала нылпи дуннеез нырысьсэ адӟиз. Озьыен, зурканъёс шоры учкытэк, улон азинске. Асьмеос одно ик шудо луыны кулэ!

Елена Миннигараева.

Удмурт Дунне
By Удмурт Дунне Декабрь 29, 2011 15:03
Write a comment

1 Comment

  1. Татьяна Миннияхметова Февраль 4, 21:16

    Та статьяез лыдзыку вань ортчем арысь югдуръёс син азьти нош ик бызё; паймытэ ик: маръёс гинэ луымтэ вылэм кылем арын. Зэмзэ но юан кылдэ, маин тодэ кылиз таиз ар шуыса. Трос дыръя йыре пырыло сыче юан-малпанъёс, кудиз югдур тужгес кулэез но кужмоез вал, яке кинлэн ке кыче ке кельтэм вамышез дунъямонгес вал-а. Малы ке но адями дышемын мукет муртлэсь ужзэ но тыршемзэ чакланы но эскерыны, аслазэз сярысь мургес но пыр-почгес малпаськон интые. Мар карод, аслэсьтыд пытьыостэ мертаны но дунъяны трослы секытгес ук; тодон-валан гинэ тырмыт овол солы, тужгес но бадзым кужым кулэ. Куддыръя кулэ но, дыр, оло, ас сярысьтыд но малпаськылыны, сыче юанъёс ас азяд пуктылыны. Быдзым ужъёс, ваньмызлы паймымон но быдэс дунее волмымон сярысь гинэ малпаськыса улон интые, тросгес матысь муртъёсыдлы зечсэ кароно ке, тужгес но тодэ кыльымон луысал, дыр. Социологъйс юалляськон ортчытоназы юало, оскись мурт-а ти шуыса но коня пол куриськон но вось интые та аре ветлиды (татын вераськон уг мыны христианъёс, мусульманъёс яке мукет осконъёсы пыриськисьёс сярсь, нош огъя оскон сярысь). Оскисьёсыз, пе, ожытсэ 20-30 пол куриськыны ветлиллям таяз арын. Собере мукет юан сёто со муртлы ик: нош коня пол со ветлэмын анай-атаез доры та арын? Ог-кык пол, пе. Мон юай Норвегиысь эшелэсь, оске-а со шуыса. Оскисько, пе, анай-атае мыным улон сётизы шуыса; ваньмыз дунне вылын озьы ик луысал, нош соостэк мон ой луысал, шуэ со. Оскисько на, пе, куке мон оволлы пото. Со ваньмыз огшоры гинэ, валамон. Соин ик мар ке но токмалы гинэ анаедлы я атаедлы, кузпалэдлы я нылпиедлы, эшедлы я бускеледлы кароно, дыр. Дунне пыдсы кинлы ке юрттэт карыны мынон интые, котжожен улон интые, анай-атайёс мон понна ожыт лэсьтиллям но сётиллям шуыса, валаны тыршоно: сыче умой ке луиськод, соин йырин но со – тон пушкын соослэн вирзы бызе; сыче урод ке тон, соин йырин но, аслад тыршемед тырмыт оволысь. Аслад котырысь улон тужгес матын но бордын, соин со шоры палэнысен учкыны но сое валаны уг луы, соин ик но, дыр, асьмеды асьмеос тэкшырон интые, мукетъёсты чакланы выриськом. Т.М.

    Reply to this comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<