Дышетско калыкез тодыны-гажаны

Удмурт Дунне
By Удмурт Дунне 20 декабря, 2011 10:53

Тодмо удмурт этнографлы Григорий Верещагинлы 160 аФр тырмиз. Солы сӥзем конференция Брангурт шор ёзо школаямы алигес ортчиз. Сое радъяны юрттӥз Историяя, кылъя но литературая Удмурт институт.

Бадӟым куноосты пумитаны школамы дышиз ини. Кылсярысь, 18-тӥ ноябре дорамы дас ньылетӥзэ ортчизы Г. Верещагинлы сӥзем элькун лыдӟонъёс. Ваньмыз со радъямын удмурт кылъя но литературая дышетӥсенымы, школа музеен кивалтӥсенымы Владимир Фёдорович Байсаровен. Арлыдзэ шӧдытэк, кӧня кужымзэ но тазалыксэ со сётэ пӧртэм ужрадъёслы! Ярано, солы котьку шедё юрттӥсьёс: дышетӥсьёслэн творчествоя лабораторизы, пиналъёслэн «Эрудит» огазеяськонзы.

Г. Верещагинлы сӥзем конференцие пыриськизы Кез, Шаркан, Кияса, Пичи Пурга ёросъёсысь, Ижысь, Татарстанысь, Башкириысь, Свердловск улосысь пиналъёс но дышетӥсьёс. Вуылӥзы Историяя, кылъя но литературая Удмурт институтысь тодосчиос Л. Христолюбова, Н. Родионов, В. Ванюшев, Брангуртысь Троицкой черкысь отец Виктор (Решетников),  Брангурт муниципал кылдытэтлэн йырыз М. Бектуганов.

Ӵектэмын вал кызьлэсь ятыр докладъёс. Ужаз кык секция: «Дышетон но шаертодон удыс» — нуиз Кияса ёросысь Вуж Салья гуртысь дышетӥсь С. Вахитов, «Верещагин урокъёсын» — радъяз Пичи Пурга ёросысь Кечол школаысь дышетӥсь Н. Ермокина. Нина Анатольевна «Верещагинлэн шудонъёсыз — удмурт кылъя урокъёсын» уженыз тодматӥз, мастер-класс ортчытӥз.

Нимысьтыз пусъеме потэ тазэ но. Азьвыл конференциосын докладъёс лыдӟылӥзы 7-тӥ классын дышетскисьёсмы гинэ, нош туэ бере кылемзы ӧз поты 6-тӥ классэ ветлӥсьёслэн но. Кылсярысь, М. Чушкина эскериз Г. Верещагинлэсь Брангуртын библиотека кылдытон бордын ужамзэ, С. Бегишев пыр-поч сэрттӥз-пертчиз Брангуртысьтымы черклэсь кылдэмзэ. Нош 8-тӥ классын дышетскись М. Девятовалы оскизы тужгес секыт ужез. Со эскериз, макем бадӟым саклык висъяське школаямы шаертодонлы.

Паймытӥзы Кияса ёросысь Вуж Салья школаысь 7-тӥ классын дышетскись нылъёс — А. Петухова, А. Полякова, А. Атеева эскериллям Г. Верещагинлэн «Зарни чорыг» поэма-выжыкылысьтыз фразеологизмъёсты, архаизмъёсты.

Шаертодонъя бадӟым эскерон уж быдэстэм Шаркан ёросысь Петуньки школаысь 7-тӥ классын дышетскись Р. Широбоков. Кез ёросысь Кузьма школаысь 11-тӥ классын дышетскись Е. Ичетовкина эскерем бадӟым но секыт удысэз — Верещагинлэсь миссионер ужзэ.

Конференцилы йылпумъян лэсьтэмын вал «Вае тодматском» котырес жӧк сьӧрын. Люкаськем калыкез шулдыртӥзы нылпиослэн кырӟанъя-веранъя коллективъёссы, быдэс дуннелы тодмо луэм Брангурт песянайёс, кылбуръёссэс лыдӟизы егит кылбурчиос.

Лилия Цигвинцева.

Пичи Пурга ёрос,

Брангурт шор ёзо школа.

Удмурт Дунне
By Удмурт Дунне 20 декабря, 2011 10:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<