Вӧтъёсын но — бюллетень

Дэри ёросын 19 муниципал кылдытэт, нош быръёнъёсъя участокъёс 57, котькудӥзлы усе быдэн 3 участокен.

Пероггурт муниципал кылдытэтын но 3 участок, азьвыл быръёнъёсын 2 вал. Туэ нырысьсэ Шудӟаын 17/39 номеро участок усьтӥськиз. Отчыозь соос бырйыны ветло вал Лудорвае.

Мон Шудӟала вуи сизьым час но ӝыныын, КПРФ-лэсь эскерисьсэ вайыса. Участокын ваньмыз дась вал ини бырйисьёсыз пумитаны. 2-3 адями дасяськемын куаразэ сётыны.

Комиссиын 6 мурт. Тросэз азьвыл ужамын ини быръёнъёсын. Участокен кивалтэ Ирина Караваева. Кыкетӥ уйзэ, пе, умой-умой уг кӧлӥськы ни, вӧтаса но быръёнъёс ортчытӥсько. Калык, пе, туж шумпотэмын, палэнэ ветлоно уз луы, асьсэ доразы куаразэс сётозы шуыса. Ваньмыз бырйисьёс 243 мурт, 26-ез сӧсыръёс, 10-эз доры мыноно луоз урнаен, 10-эз огдырлы пусйиськемын, 17 мурт нырысьсэ бырйыны лыктыны кулэ. Та егитъёс понна дасямын ручка, шоколад но вуоно арлы календарь. Тани 8 час луэ ини. Урнаез возьмато эскерисьёслы, буш шуыса, собере ворсало но бумагаен ляко.

10 часлы 83 мурт куаразэ сётэмын вал ини, со 34,1 процент луэ.

Нош ӝыт 8 часлы 186 мурт куаразэ сётӥз, 6 адями открепительной талонэн лыктӥз на ай. Озьы ваньмыз 74,7 процентэз бырйиз.

Борис Боталов.