Вормонэ нуись… шуг-секытъёс

Удмурт Дунне
By Удмурт Дунне 27 декабря, 2011 07:35

Вормонэ нуись…  шуг-секытъёс

Кыӵе йылпумъянъёс лэсьтыны луоз промышленностьлэн туэ ар ӵоже ужамезлы?  Кыӵе предприятиос секыт югдуре шедемын? Кыӵе огазеяськонъёсын тыршисьёслэсь уждунзэс ӝегато? Будозы-а вуоно арын бензинлы дунъёс? Вань та юанъёслы тупен-тупен валэктон сётӥз Удмурт Республикаысь Правительстволэн Тӧроезлэн воштӥсез Ильдар Бикбулатов.

 

Туэ 11 толэзь ӵоже шаерамы 259 миллиард тыр вуз поттэмын. Кылем арен ӵошатыса, 30 процентлы тросгес. Производство йылэ бере, ӝутске промышленностьын тыршисьёслэн шоро-куспо уждунзы но. Та дырлы солэн быдӟалаез 18 сюрс манет. Котьку сямен ик, тужгес но бадӟым уждун басьто мувӧй кыскон удысын тыршисьёс — 33 сюрс манет.

Нимаз огазеяськонъёс вылэ выжоно ке, туэ ар куспын производствозэс ушъямон радъязы «Воткаысь машина поттон завод», «Ижысь механикая завод», «Техновек», «Аксион-холдинг», «Ижсталь» но мукет. Пусйыны кулэ, туэ арлэн валтӥсь пусэз луиз «ИжАвто» огазеяськон. Нокин угось ӧз оскы, кык ар пала тэк сылэм конвейерлэн ужаны кутскемезлы. Заводлэн азьланез табере оскымон.

— Ньыль ар ортчыса, Ижысь автозавод араз 320 сюрс машина поттыны чакла. Ай пушъён вакытаз гинэ но солы таӵе лыдпусозь вуылыны ӧз кылдылы, — веранзэ мытӥз И. Бикбулатов. — «Рено», «Ниссан», «АвтоВАЗ» огазеяськонъёс куспын огкыл гожтэмын. Ӝоген «ИжАвто» поттыны кутскоз «Рено» но «Ниссан» иномаркаосты. Со сяна, вуоно арлэн кутсконаз предприятие басьтӥськоз «Лада Гранта» автоосты бичан борды. Сое поттонъя конвейерез радъян йылпумъяськоз туэ ар пумозь.

Кыӵе воштӥськонъёс витё на Ижысь автозаводэз? Россиысь Правительство огкыл гожтӥз кунгож сьӧрысь машина поттонъя концернъёсын. Соос азе курон пуктэмын вал: производствозэс Россиысь кыӵе ке улосэ выжтыны мылкыдзы вань ке, озьыен, машинаослы воштос ёзъёс но отын ик бичамын луыны кулэ. Малы соосты кунгож сьӧрысь ворттонэз — таиз угось шӧдӥськытэк уг кыльы автолэн дуныз вылын. Кунгожсьӧръёс таӵе куронэн соглаш кариськизы. Кунысьтымы ог куиняз улосъёсын усьтэмын луозы машинаослы воштос ёзъёс бичанъя центръёс.

И. Бикбулатов мылкыдзэ шараяз: 99,9 процентлы оскисько, пе, матысь кык ар куспын таӵе центр радъямын луоз «ИжАвто» бордын но. Асьме дорын бичаськысал иномаркаослы чаклам воштос ёзъёслэн 70 процентэз. Та проект кулэ карысал 30 сюрс ужан инты усьтыны.

«Ижсталь» сярысь верано ке, заводлы бадӟым пайда сётӥз гуръёссэс туалаосызлы воштон. Производствозы соку ик 15 процентлы йылӥз. Со сяна, отын поттыны кутскизы улӥ углеродэн андан — уг сётскы сыномонлы, ӟечлыкез уг усьы уно аръёсын.

— Шаерамы алигес вуылӥз «Росатом» огазеяськонлэн кивалтӥсез Сергей Кириенко, — шуиз Ильдар Ильшатович. — Огкыл гожтэмын. Соя Удмуртиын усьтӥськоз Металлургияя нимысьтыз центр. Та проект но республикамылы пайда ваёз.

 

* * *

Юрттэтэз витё секыт югдуре шедем «Ижмаш» но Сарапулысь радиозавод. «Ижмаш» предприятиын туэ февраль толэзьысен ужа кризисэн нюръяськонъя нимысьтыз комиссия. Со кылдытэмын «Ростехнологии» корпорацилэн кичӧлтэмезъя. Ужамзылэн емышез адӟиське ни: предприятилэн вытъёсъя пунэме кылёнэз кулэсме. Ваньзэ-ӧвӧлзэ со люкаськемын 19 миллиард манет тыр.

— Предприятиез банкротэ выжтытэк, секыт учырысь потыны уз луы, — мылкыдзэ вераз И. Бикбулатов. — «Ростехнологии» корпорацилэн бурд улаз кылдытэмын наукая но производствоя «Ижмаш» выль огазеяськон. Банкротэ вуэм «Ижмашлэн» ваньбурез но, уставъя капиталэз но выжтэмын луозы выль усьтэм огазеяськонэ. Югдурез сэрттон-пертчонэ пыриське Россиысь Обороная министерство но. Матысь дыре «Ижмаше» пыӵал тӥрлык поттонъя заказъёс вуозы.

Сарапулысь радиозаводлэн пунэме кылёнъёсыз аръёсын лыдъяськизы — 2008-тӥысен кутскыса, туэ ар кутсконозь. Шуг-секытъёс кылдӥзы, оборонзаказъёсты быдэстэмзы понна уксё вуымтэен. Та дырлы пунэме кылёнъёссы 28 миллионозь кулэстэмын ни. Азьланяз но со ичиёмоз, оскытӥз И. Бикбулатов. Сарапулысь радиозавод пумысен трос бызьылоно луиз Удмуртилэн Президентэзлы А. Волковлы. Со огпол гинэ ӧз йыгаськылы Президентлэн Д. Медведевлэн но премьер-министрлэн В. Путинлэн ӧсъёсазы. Тыршемезлэн пайдаез шӧдӥськиз: завод пыртэмын Россиысь стратегияя валтӥсь предприятиос пӧлы. Чакламын ни вуоно арлы заказъёс.

— Республикаысьтымы Правительство 350 миллион манет тыр гарантия сётэмъя «Сарапулысь радиозавод» огазеяськонлы кредит висъямын. Со юрттоз солы пыд вылаз султыны, — шуиз Ильдар Ильшатович.

 

* * *

ӟеч тыршизы шаерысьтымы мувӧй кысконъя предприятиос. «Удмуртнефть» огазеяськон туэ укмыс толэзь ӵоже 4 миллион 785 сюрс тонна пала «сьӧд зарни» поттӥз, «Белкамнефть» — 3 миллион 174 сюрс тонна. Республикалэн бюджетаз соос выт чотын ар куспын вуттӥзы 5 миллиард 400 миллион манет.

Приволжск федерал округысь 14 улосъёс пӧлын Удмуртиын эстӥськонлы дунъёс тужгес но пичиесь. 14-тӥ инты тужгес но бадӟым дун шуыса лыдъяно ке, Удмуртия — витетӥ интыын. Будозы-а бензинлы дунъёс вуоно арын? И. Бикбулатов пусйиз: йылозы, но шӧдскымонлы уз.

Елена Никитина.

Удмурт Дунне
By Удмурт Дунне 27 декабря, 2011 07:35