Бызён сапег

Удмурт Дунне
By Удмурт Дунне 14 декабря, 2011 09:35

Вашкала дырысен асьме калык нуллэ гын сапег. Россиын со паськыт вӧлмиз 13-тӥ даурын. Екатерина II эксэй кышно шуныт палъёсысь вуэм куноос азе поттылэм та шуныт но небыт пыдкутчанэз. Зэм, кезьыт толэз гын сапегтэк потыны секыт ке но, кылем даурлэн пумаз кулэсь вурем пыдкутчанъёс сое палэнтыны кутскылӥзы. Нош табере гын сапег выльысь данэ потэмын.

Гын сапеглы сӥзьыса, Можга городысь кибашлыослэн юртазы тунсыко конкурс ортчиз. Та ужрадэ пыриськыны быгатӥзы егитъёс но, мӧйыос но. Ас киыныд гындэм сяна, луэ вал дасьсэ но пыдкукез ас сяменыд чеберманы, буяны.

Кибашлыослэн юртэнызы кивалтӥсьлэн Екатерина Степановалэн верамезъя, конкурс ортчиз кӧня ке номинациосъя. «Тужгес но пичиез сапег» номинацие пыртэмын пичиослы но шудон выллем сапегъёс (брелокъёс, кузьымъёс). «Тужгес но бадӟымез сапег» мӧйыослы нуллымон яке кыӵе ке великанлы сӥземын мед луоз. Вань «Бызись ныллы сапег» но.

Конкурс йылпумъяськем бере, 1-тӥ декабре, киужъёсын адӟытон усьтӥськиз. Кыстӥськоз со Выль арозь. Калык азе поттэмын 60-лэсь ятыр гын сапегъёс. Конкурсэ пыриськисьёс пӧлын вань 2-тӥ, 3-тӥ классъёсын дышетскисьёс но. Вормисьёс тодмо луозы ар пумын.

 Иван Аркашев.

Удмурт Дунне
By Удмурт Дунне 14 декабря, 2011 09:35