Асьсэлы асьсэос кузё

Удмурт Дунне
By Удмурт Дунне 16 декабря, 2011 09:30

Асьсэлы асьсэос кузё

Ужъя рынокысь югдурез тупатонъя программа Дэбесын куинетӥ арзэ ужа ини. Со чотын асьсэлэсь удыссэс усьтӥзы-шедьтӥзы тросэз ужтэк кылемъёс. Куд-огез 18 толэзь тыршиз но буйгаз, нош мукетыз ужбергатон ӧрзэ паськытатӥз.

«Вероника»

В. Пономарёва.

2009-тӥ арысен ик ассэ ужбергатӥсен лыдъяны кутскиз Вероника Пономарёва но. Кышномурт 13 ар ӵоже ужаз заправкаын кивалтӥсь луыса, собере биржае султоно луиз. Уже интыянъя службаысь специалистъёслэн ӵектэмзыя ик ас вылаз ужано кариськиз. Нырысь усьтӥз пичи магазин, ӝыны ар ортчыса, сое паськытатӥз ини.

— Ужтэк кылён но пайдаен берытске вылэм. Мон чик уг жаляськы со пумысен. Уго магазинэ ӟеч ужа, калык дорам басьяськыны мыло-кыдо лыктэ. Азьвыл Шарканысь фабрикае но Ижысь «Сактонэ» дӥськутлы ворттылӥ. Табере Турциысь вузэн калыкез шумпоттӥсько. Пичиез нылы, Лена, юрттэ вал, табере Ижын аслэсьтыз салонзэ усьтӥз, гижы чеберъя. Бадӟымез, Светае, егитъёслэн центразы психолог луыса тырше, шутэтскон нуналъёсы Екатеринбурге товарлы ветлэ. Базарын сыӵе дӥськут уд басьты, мон чеберзэ, ӟечсэ вайыны тыршисько. Ӵем дыръя дунзэ кулэстӥсько, товар ошиськыса медаз кылльы, эсьмаса, интыяз мукетсэ ваё, шуисько. Куд-огез мон доры гинэ басьяськыны ветло, кыӵе дэрем, кофта кулэ — заказто, куд-огез вераськыны пырало. Мон соосты кофеен но куноясько, пичиос суредаськыса пуко, картъёссы, креслое пуксьыса, кышнооссэс возьмало. Куинь ар куспын магазинэ нимзэ но куинь пол вошъяз. Ачим туж огшоры кышномурт бере, ним но сыӵе ик бырйи вал — «Надевайка». Нылъёсылы ӧз кельшы. Кильтро дӥськутэн вуз карись магазинлы, пе, «Чёрная пантера» тупалоз. Таиз ини мынам сюлэмъям ӧз луы. Куинетӥзэ басьяськисьёсы ӵектӥзы. Аслад нимыд, пе, чебер, озьы тӥни магазинэ но «Вероника» луиз. Уже туж кельше, барышез но вань, соин ик мылкыд но умой, — шуэ Вероника Игоревна.

Вероника Пономарёва, магазин усьтэм сяна, одӥг вуз карисез уже кутӥз. Татчы куриськисьёс эшшо вань.

Агай-вынъёс — ужбергатӥсьёс

С. Роготнев (паллянысез).

Дэбесысь мукетыз ужбергатӥсьёс — агай-вынъёс — Алексей но Сергей Роготневъёс. Соос одӥг гинэ ӧвӧл, асьсэлы быдэн удыс усьтӥзы. Алексей киновидеоклуб кылдытӥз, пичиез выныз «Успех» спортклуб усьтӥз. Табере Дэбесын улӥсьёс, городысь адямиос сямен ик, татчы лыктыса, мугорзэс волято, тренажёръёсын выро. Воткинскысь крезьгуръя педколледжез йылпумъям агай-вынъёс городэ ӟеч улон утчаны ӧз кошке, вордскем палъёсазы сое лэсьтоно кариськизы. Сергей верамъя, ваньзэ радъяны ог ӝыны ар кулэ луиз. Валамон ини, уже интыянъя служба пыр висъяськись коньдон талы ӧз тырмы. Малы ке шуоно залын 16 тренажёр, 5 штанга.

— Шуг-секытъёс сярысь вераме ик уг поты. Таӵе клуб кылдытон сярысь азьвыл ик малпаськылӥм ини. Малы адями вина юыны кулэ, мед со татчы лыктоз, спортэн, эсьмаса, эшъяськоз. Дэбесын татчыозь таӵе клубъёс ӧй вал на, нош маин ми пӧртэмесь городын улӥсьёслэсь?! Одӥг занятие сылэ 80 манет. Толэзьлы учконо ке, нылпиослы 500 манет усе, бадӟымъёслы 500-ысен-700-озь. Котькуд лыктӥсен огкыл гожтӥсько. 14 аресозь пиналъёс анай-атайёсынызы ветло. Котькуд пиналэн но анай-атаен нимысьтыз кенешисько. Али калык трос уг ветлы на, кык толэзь ужатозямы, котькуд нунал дорамы кожа ог дасо адями. Нылкышноос лыкто кӧйзэс куштон понна, пиос — мугорзэс кыдатон вылысь. Клуб табыш вайыны кутскоз, дыр, ай вуоно арын гинэ. Со понна ми пӧртэм акциос радъяськом. Кылсярысь, татысь ик егитъёслэн «Вертикаль» центренызы валче ортчытыны чакласьком «Устоез семья» ужрад. Вормисьёслы кузьмалом быдэс толэзьлы дунтэк абонемент. Озьы ик азьланяз малпаськом солярий усьтыны, йогая но пилатесъя занятиос радъяны, — вера та клублэн кивалтӥсез Сергей Роготнев.

Дорад — нылпи сад

М. Тронина.

Дэбесысь Марина Тронина — трос нылпиё анай, Никита пиезлы 14 арес ини, Дарина нылызлы 4, нош Софьяезлы — 1 арес но 10 толэзь. Пичизэ нылпи садэ интыямез бере кышномурт ас ужаз мыныны ӧз дырты. Декретэ потэмезлэсь азьло парикмахер луыса тыршиз. Но пинал ваемез бере быдэс нунал пыд йылаз сылыны секытгес йӧтэ. Соин ик Марина Тронина азьвыл удысаз ӧз берытскы, султӥз биржае.

— Мынам кемалась ини потэ вал усьтэме нылпи клуб, отын семьяен шутэтскыны мед луоз. Уго татын пиналъёсын ӵош нокытчы мыныны. Сыӵе клуб усьтыны туж трос коньдон кулэ. Субсидия басьтон сярысь малпаськи вал. Но уже интыянъя центрысь специалистъёсын кенешыса, ёросысьтымы дышетонъя отделысь ужасьёслэн дэмламзыя малпай усьтыны нылпи сад. Дэбесын кык садик, но отчы но интыос уг тырмо, адямиос черодзэс витё. Кин ке шуоз, вылды, парикмахер усьтэ садик, но мон йылпумъяй Дэбесысь педучилищеез, ужай но та удысын, малы ке шуоно сюлмы кыске нылпиос борды. Тӥни озьы уже интыянъя службалэн нимысьтыз программаезъя мыным висъязы 117 сюрс 600 манет. Ӵапак та коньдонэн басьтӥ лэсьтӥськон материалъёс, али со юртын мыно тупатъян ужъёс. Сюлмаськонэз трос. Тылпу кысӥсьёслэн куронъёссы трос. Вуж гурез кесяса, отчы басьтомы электрокотёл. Вань езъёсты вошъяно. Таиз ласянь юрттэ кузпалы, Андрей, со электрик. Нылпи сад интыяськоз милям вуж коркаямы, со понна ик ми ӝоггес потӥмы выляз юртамы. Юртлэн быдӟалаезъя мон кутыны быгатӥсько 9 пиналэз. Нылпиос отын ик шудозы, отын ик изёзы. Басьтомы нимысьтыз валесъёс, соос куинь люкетъёслэсь — усьясько но ворсасько. Огезлэн дуныз матрацтэк 4 сюрс манетлэсь ортче. Мукетыз ужпум — тэшкылиосты сюдон. Садикамы ум пӧраське, пиналъёслы сиён нулломы яке мукет нылпи садысь, яке школаысь. Та нылпи сад муниципальной заказ кадь луэ. Соин ик анай-атайёслэсь дун но мон кун садикъёсын сямен ик басьто — шуом, 650 манет толэзяз. Озьы ик 2-тӥ но 3-тӥ пиналзы понна тырем дунысьтызы анай-атайёс компенсация басьтыны быгатозы. Тэшкылиосты кутом 2 аресысен, утялтом, визьмалом соосты, школае мынытозязы, — шуэ Марина Николаевна.

Марина Трониналэн малпанъёсыз туж ӟечесь. Пусйыны кулэ, та дырозь ужбергатӥсьёс пӧлысь огез но садик ӧз усьты на вал. Нош Дэбесысь кышномурт, нылпи сад кылдытыны басьтӥськем сяна, эшшо одӥг муртлы уж шедьтӥз. Та садике ветлозы крезьгуръя но мугорез кыдатонъя дышетӥсьёс, соос пиналъёсын занятиос ортчытъялозы. Ужбергатӥсьлэн малпамезъя, шутэтскон нуналъёсы но сад уз ворсаськылы. 10 часысен кутскыса ӝыт 8 часозь, озьы ик ужан нуналэ 18-20 часозь анай-атайёс тэшкылизэс татчы келляны быгатозы, ватсаса 50 манет тыризы ке. Угось куд-ог дыръя ужын ӝеганъёс луо, пиналэз кык-куинь часлы огназэ уд кельты, нош татын соин воспитатель шудоз-пукоз. Марина Николаевна верамъя, солы вазиськисьёс вал ини нылпизэс садике сётон пумысен. Вань малпам ужзы пӧрмиз ке, Дэбесысь садик ӧсъёссэ усьтоз ини Выль ар бере.

Галина СЕМЁНОВА.

Туспуктӥз Владимир Беломорских.

Удмурт Дунне
By Удмурт Дунне 16 декабря, 2011 09:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<