«Зачёт» пуктэ Президент

Удмурт Дунне
By Удмурт Дунне 13 декабря, 2011 08:59

2001-тӥ арысен ни шаерысьтымы тужгес адӟем карымон егитъёс — учёнойёс, вылӥ дышетскон заведениосысь аспирантъёс но студентъёс, ссузъёсын но училищеосын дышетскисьёс — басьто Президентлэсь стипендизэ. Пӧртэм аръёсы нимысьтыз пусъемъёслэн лыдзы пӧртэм вал, стипендилэн быдӟалаез но вошъяськиз. Туэ сӥлы каремын 112 мурт, толэзьлы быдэ соос 750 манетысен 2 сюрс 500 манетозь басьтозы.

Стипендилы сертификатъёсты сётон сӥё-дано ужрадэ егитъёс ог ӝыны часлы вазьгес вуизы. Пӧлысьтызы тросэз резиденциын — нырысьсэ. Но Президентлэсь тау карон, визь-кенеш сётон кылъёссэ нырысьсэ уг кыло ни.

— Александр Волковен ваче син кыкетӥзэ пумиськисько ни, — шуэ Удмурт кун университетысь историяя факультетын дышетскись Артём Малинин. — Пичи Пурга ёросысь Кечол школаез азвесь медален йылпумъяй. Со понна вуылӥ вал медалистъёсты сӥлы карон ужрадэ, цирке. Республикаысьтымы кивалтӥсьёслы соку вань люкаськем калык азьын удмурт сямен тау карон кылъёс верай.

Туннэ Артём тодон-валан басьтэ ньылетӥ курсын. Та дыр куспын со вузын но ассэ ӟечен гинэ возьматыны быгатӥз. «4»-ёслы но «5»-ёслы дышетскемез понна арлы быдэ басьтэ бадӟыматэм стипендия. Но Президент стипендиен пияшез нырысьсэ шумпотто.

— Тазэ басьтон понна дышетскемме гинэ уг, университетлэн улоназ пыриськемме но чаклало, — шуэ Артём. — Мон мыло-кыдо пыриськисько вузын радъяськись ужрадъёсы. Ветлӥсько кырӟаны-эктыны, пӧртэм сценкаосын шудӥсько, туж гажасько спортэз — ӵошатсконъёслэсь уг палэнскиськы. Пӧртэм конференциосысь, студентъёс пӧлын радъяськись кенешонъёсысь монэ синйылтыны луоз. Историен, фин-угор калыклэн улэм-вылэмезлы сӥзем ужъёсы пӧртэм журналъёсын печатласько. Потай ни Венгрие, студентъёслэн-финноугроведъёслэн конференциязы пыриськи…

Кытысь та егитъёслэн ваньмызлы дырзы тырме? Эшъёсынызы ӵош куддыр соослэн но ганяк кариськемзы, уй дискотекаосы вуылэмзы уг поты шат? Кызьы шуэ Артём, дышетсконзэс, ужзэс тыро-пыдо радъяло, чиданзэс, мылкыдзэс ватсало на — озьы ваньмыз пӧрме, котькытчы вуттӥсько. Со понна ик соос туннэ татын Президентлэсь стипендизэ басьто.

Егитъёсты сӥлы карон ужрадэ Александр Волковен ӵош пыриськизы Правительстволэн Тӧроезлэн воштӥсез Людмила Чунаева но дышетонъя но наукая министр Андрей Кузнецов. Республикаысьтымы вылӥ кивалтӥсьёс нылъёслы но пиослы выль вормонъёс сӥзизы.

— Шудо луон понна вӧзын мед луоз яратоно адямимы, яратоно ужмы но медаз луы вожъяськон, — сӥзиз Президент. — Оскисько: тӥ шумпотыны быгатӥськоды вӧзысьёстылэн вормонъёссылы. Озьы уга асьмеос эшшо кужмогес луом.

Элина Кумачёва. 

Удмурт Дунне
By Удмурт Дунне 13 декабря, 2011 08:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<