ӧсъёс усьтӥськизы

Удмурт Дунне
By Удмурт Дунне 25 ноября, 2011 12:26

ӧсъёс усьтӥськизы

Куддыръя синоптикъёс оскыто: куазь луоз шуныт но сайкыт. Нош усе лымы. ВТО пумысен оскыто: улонмы капчиялоз. Лымы музэн уз пачкаты-а?

Туэ 10-тӥ ноябре Женеваын йылаз-пумаз вуттэмын Россиез Дуннеысь вуз каронъя огазеяськонэ (ВТО-е) пыртон сярысь ужпум. Азьвыл та ласянь пыдзэ туж пуктыны выре ке вал Грузия, со но нялтас кариськиз ни. Табере Россиез 15-тӥ декабре ӟечкыланы но луоз ни. ӵапак со нуналэ Женеваын пӧртэм кунъёсысь министръёсын конференция ортчоз. Зэм, вуз карон дуннее зэмос зымыны быгатомы 2012-тӥ арын март толэзе гинэ, вань документъёсмы йылаз-пумаз вуэм бере.

Россия 18 ар выриз йыгаськыны ВТО-лэн ӧсъёсаз. Лэзизы ик сое. Шумпотыны-а, куректыны-а кулэ талы огшоры ужась адямиос? Радио но телевидение пыр огъёсызлэсь кылӥськод лӧптэм мылкыдзэс, музонъёсыз синвуаськыны но дась. Нош мар карыны кулэ удмурт калык?

 

Пырытэк луэ-а вал?

Дуннеысь огазеяськонэ татчыозь пыре вал 153 кун. Таос 97 процентсэ дуннеысь вуз каронэз ас киязы возё, ас мылпотэмзыя кузёясько. Соин ик быгатэ-а вал Россия палэнын улыны? Уг. Тазьы шуэ Удмуртиысь экономикая министрлэн воштӥсез Марина Гуреева. ВТО-е сюрыса гинэ, асьмеос азьын усьтӥсько огкадь вуз карыны инвисъёс. Зэм, со дыре ик вӧлъяно луиськомы асьме кунгожъёсмес мурт вузъёслы. Кулэстоно луиськомы вытъёсты. Кызьы радъяськоз отӥяз улон-вылонмы — тазэ туннэ рос-прос нокин вераны уг быгаты на.

Марина Гурееваен соглаш кариське экономика наукаосъя доктор, Ижысь гурт удысъя академиысь менеджментъя но правоя кафедраен кивалтӥсь Анатолий Осипов.

— США-ын ужа Джексонлэн но Вэниклэн законзы. Соя асьме доры уг вуо сопалась вылӥ технологияя вузъёс. Америкаын улӥсьёслэн рыноксы но асьмелы ворсамын. Нош асьмелэн данъяськыны оломаин но луэ. Кылсярысь, Глазовысь механикая Чепца завод поттэ цирконий, кальций но мукет арбериос.

Россиын потӥсь пӧйшуран пыӵал пӧлысь 85 процентсэ бича Удмуртия, автомат — 80 процентсэ, снайпер пыӵал — 90 процентсэ. ВТО-е пырыса гинэ, асьмеос та вузъёсынымы муртъёс доры йыгаськыны быгатомы. Со сяна, Россиын пыӵал лэсьтонъя асьмеос азьмынӥсьёс ке но, монополистъёс луэмен, выль модельёс кылдытон сярысь йырмес сокем ик ум бергатӥське ни. Нош ВТО-е зымыса, тэк пукыны маза уз луы ни, ато асьмемыз лёгалозы.

Россиын музъем нянь будэтыны туж тупа. Асьмеос 25 миллион тонна туэ вузалом. Нош будэтыны но араб кунъёслы келяны быгатӥськомы тросгес. Но та ласянь пыд пуктӥсьёс лачак. Киосмес думылыны ялан выро: сомындазэ гинэ, сыӵе-сыӵе кунъёслы вузаны тысьтэс быгатӥськоды. ВТО-ын улӥмы ке, таӵе зӥбонлы пум вуоз.

США-ын ӧжыт инкуазь ваньбурзы. Кизертэм газэз соос вутто араб кунъёсысь. ВТО-ын огкылысь улыса гинэ, США-е газмес вузаны быгатом. Компьютер асьмеос поттыны ум пӧрмытӥське ке но, солы тупась программаос лэсьтыны туж ӟеч пӧрмыто специалистъёс. Со ласянь туж ушъяськыны быгато Ижысь техникая но Удмурт кун университетъёс. Озьыен, визьмын лэсьтэм программаосты но табере вузаны пӧрмытом. Ваньзэ тае лыдэ басьтыса, валано: ВТО-е пырытэк нокызьы уг луы ни вал, — шуэ Осипов.

 

Сиён-юон дунтэмалоз?

ВТО-ен герӟаськытэк нокызьы но уг луы ни вал шуо ке но, Марина Гуреева со вие ик пусъе таӵе лыдпусъёсты:

— Россия азьвыл сямен улыны уз быгаты ни. Кунмылы табере кулэстоно таможня пыр потӥсь вузъёслы пошлинаез. Кылсярысь, кунгож сьӧрын поттэм эмъюмъёслы со али тупатэмын 15 процент. Табере со васькыны кулэ 6,5 процентозь. Медицинаын кутӥськись тӥрлыкъёслы, пӧртэм суретъёслы — 2-3 процентозь. Бытовой электроникалы 15 процентысь со лэзиськыны кулэ 7-9 процентозь. Выль машинаосты кунгож вамен поттэм понна пошлиналэн быдӟалаез 25 процентысь усёз 15-ёзь. Зэм, таиз кыстӥськоз ай 7 ар ӵоже. Чорыглэсь лэсьтэм дась сиёнъёслы пошлина 1-3 ар куспын 15 процентысь васькыны кулэ 12-озь. Йӧллы но йӧллэсь лэсьтэм дунъёслы пошлина васькоз 20 процентозь. Россия куинь ар ӵоже компьютеръёслы, соосты лэсьтыны ярась детальёслы пошлиназэ быдтыны кулэ. Со дыре ик туннэ уг шараяло на: нош мае кунгож сьӧрысь кунъёсы вуттыны быгатоз Россия, кыӵе солы тупатозы пошлинаосты?

Ваньзэ тае кылыса, амалтэк малпаськыны кутскиськод: кыӵе улонэ вуомы асьмеос? Пошлина дунъёс усизы ке, озьыен, асьме доры тросгес вуыны кутскозы пӧртэм вузъёс. Рынокмес соос ӝог уз соге-а?

— Татчыозь тупатэм пошлинаос дорамы оломар но сюремлэсь кызьы но озьы возьыны быгатӥзы вал ай, — шуэ Анатолий Осипов. — Озьыен, вузъёссы асьсэ сэрегъёсазы татчыозь тымиськыса улӥзы. Валамон ни: ӧсъёсмы усьтӥськемен, ваньмыз со  магазинъёсамы шур кадь кисьтӥськоз. Дунзы но, асьме вузъёсын ӵошатыса, трослы улын луоз. Америкаысь курег пыдъёс музэн. Асьмеос дунъёсмес кулэстыны ум быгатэ. Гурт удысмес ик басьтоно ке, мерттыны-кизьыны асьмеос туж трос кужым быдтӥськомы. Западын техниказы оломар но карыны быгатэ. Таин валче ик США-ын одӥг фермерзы, асьмелэнэныз ӵошатыса, 11 поллы ӟечгес ужаны быгатэ, Германиын — 7 поллы. Асьмеос соос дорозь совето вакытэ но ӧм сузьтӥськылэ — 5 поллы лябгес тыршим. Солэсь ортчыт — саник-лопатаосмес киысьтымы куштыны нокызьы ӧм валалэ ни. Соин ик будэтэм емышъёсмы но дуно усё. Европаын емыш будэтэмзылы, пудо вордэмзылы быдтэм уксёзы пӧлысь 40 процентсэ фермеръёслы берыкто. Асьмелэн йӧллы гинэ дотация лэсьто. Тазэ но, ВТО-е пыремен, воксё пумен быдтыны косо.

Со сяна, басьтэм емышмес но утьыны ӵемысь ум вормиське ай — толалтэ юн кезьыт луэ уго. Нош палэнын шуныт вакытсы асьмелэсь но кузь. Соин ик капчигес уло соос. Кивалтӥсьёсмы оскизы, лэся: гурт удыслы ӧм юрттэ ке но, со улоз ай. Ма, коньдон ужпумъёсъя азьвыл министр Алексей Кудрин шуиз вал:  гурт удыслы юрттэменымы, со азгынме, ачиз берганы, маке сярысь сюлмаськыны уг вала ни. Таӵе дыръя кызьы уз куашкалэ ляб хозяйствоос? Ярано коть, шумпотто Вавож ёросысь Мичурин нимо СХПК выллем азьмынӥсьёс. Выль технологиосын ужаны соос уг кышкало.

 

Гуртлы вуоз пум?

Кунгож сьӧрысь вузъёс дунтэмазы ке, ӧжыт уждун басьтӥсь калык соос шоры гинэ уз мертаськы меда? Зэм, экономистъёс верамъя, ВТО-е пыремен валче ВВП но будоз,  уждун но 1 процентлы йылоз. Но со мае ке воштоз меда? Инфляциез кутыны уз луы. Озьыен, тросэз хозяйствоосмы ворсаськыны быгатозы. Гурт удысъя но сиён-юонъя министрлэн воштӥсез Аркадий Малков верамъя, асьме поттэм кешырмес, картошкамес но палэнэ келяны быгатомы, оло, ум ай. Кылсярысь, ВТО-лэн куронъёсызъя, ӵужкушман кузьдалаезъя одно луыны кулэ 15-20 сантиметр. Нош асьмелэн куазьмы тӧло пу кадь: я зорыса улэ, я шунды пыжемысь уг дугды. Сыӵе учырын быдэс бусы мерттэм кешырысьтыд но кӧняез тупатэм куронъёслы яралоз меда? Сое утялтыны но йӧнала техникамы ӧвӧл. Со сяна, октэм бакча сиёнэз бырйыны, миськыны, нимысьтыз бинялтыны кулэ на. Ваньзэ тае лэсьтӥсь техника асьмелэн ляб. Сое басьты вал — дуныз куртчылӥське.

Зэм, экономистъёс оскыто: гурт удысэз кун уз аналты. Солы висъяськоз арлы быдэ 9 миллиард доллар. Со сяна, ВТО-е пыремен валче асьме доры сюрес усьтӥськоз кунгож сьӧрысь банкъёслы но ӵапак со страховой компаниослы. Озьыен, югдур ӟеч пала воштӥськыны кулэ. Зэм, со компаниослэсь филиалъёссэс асьме дӥне лэзёзы ай, 9 ар ортчыса гинэ.

— ВТО-е пырытэк, ӟеч улӥськомы шат? — меӵкытэ Осипов. — Шуг вераны, макем кема пыд йылазы возиськыны быгатозы юн хозяйствоос. Егитъёслы туннэ ик дышетсконо ни вылэм бизнес-инкубаторъёсын ужаны. Милям академимы та бордын выре ик. Котькуд студентэз бизнес-план гожтыны дышетӥськомы, налогъёсын ужаны валэктӥськомы. Но со гинэ уг тырмы на. Асьмелэн, удмуртъёслэн, сямамы пыӵамын ӧвӧл вуз карон. Нош со сямез кызьы ке одно вырӟытоно вылэм. Сотэк асьмеос быромы.

 

Чидано но осконо?

Россиысь Экономикая министерство ивортэмъя матысь 8 ар ӵоже кунгож сьӧрысь вуись кунян но тылобурдо сӥльлы пошлиналэн быдӟалаез уз воштӥськы. Нош парсь сӥльлы (али пошлина 15 процент) соку ик нуль процентозь васькоз. Нош асьмелэн ӵапак парсь вордон хозяйствоосмы ик али пыд йылазы юн сылыны кутскизы вал ай. Озьыен, макем шуккоз меда таосты ВТО? Эх, ваньзэ азьвыл ик тодыны луысал ке… Огез валамон: базарын парсь сӥль дунтэмалоз.

Нош 2010-тӥ арын феврале гинэ ай Президентмы Дмитрий Медведев продовольственной безопасностья доктринаын пусйиз: асьме рынокын йӧл но йӧллэсь лэсьтэм сиён-юон 90 процент луыны кулэ, сӥль — 85. Нош туннэ, Осипов верамъя, кунгож сьӧрысь вуттэм йӧлъёс рынокмес басьто ни. Сӥлья ке учконо, кунгож сьӧрысь ваемез 25-30 процент. Мар луоз отӥяз?

— Котькыӵе секыт медло улонмы, киосты лэзьяны уг яра, — веранзэ азьланьтэ Осипов. — Котьку тодэ возёно Китаез. 1960-тӥ-70-тӥ аръёсы со туж ляб вал. Нош туннэ со азинскемезъя дуннеын кыкетӥ интыын. Асьмелы но али вань кужыммес пононо быгатэммес эшшо но муромытыны, выль технологиос кылдытъяны. Нош асьмеос поттӥськомы мувӧй, чагыр эстӥськон.

Россия туннэ 25 процентсэ дуннеез газэныз шунтэ. Ми газ но мувӧй ваненымы гинэ улыны пӧрмытомы шуыса учконзэс воштон понна тросгес бызьылоно. Азьланьтоно нанотехнологиосын, атом промышленностьын, космической разработкаосын ужанмес. Палэнын ӟеч дунъяло сьӧд но чибориё кортъёсмес. Соосты тросгес поттоно.

Осипов промышленностьмес ушъя ке но, Гуреева таиз шоры но чакласькысагес учке.

— Кортэз ӵыжатон туж трос электрокужымез сие. Нош солы дунъёсты быдэс дуннеен огкадь кароно луоз. Озьыен, вузлэн дуныз но йылоз. Кышкан кылдэ машина поттон удысмы понна но. Иномаркаослы, соослы ярась детальёсты асьме доры вуттон пошлиналэн быдӟалаез кулэсмоз. Озьыен, машинаослэн дунзы но усёз. Сыӵе дыръя асьме дорын потӥсь машинаос шоры учкоз на меда калык? «ИжАвто» заводмы нош ик пытсаськон калэ уз вуы меда?

Зэм, промышленностья но энергетикая министрмы Олег Радионов оскытыны выре: азьлане завод сэзь учке. «Рено» но «Ниссан» машинаос поттон борды басьтӥське. Та модельёс быдэс дуннелы тодмо. Озьыен, ВТО юрттоз инвисмес уката паськытатыны.

 

* * *

Экономика удысын бергасьёс огымысь кадь оскыто: ВТО-е пырытэк нокызьы уг луы ни вал. Но сюлэм куалекъя: гурт улонлы со маке ӟечсэ ваёз меда? Хозяйствоослы кун али пичи юрттыны быгатэ ке вал, шуом, эстӥськон, удобрениос басьтыны, ВТО талы ваньмызлы пум поноз. Сыӵе дыръя ляб хозяйствоос узгес чидалэ ни. Кылем арысь лыдъян-чотанэз тодэ ваёно ке, Удмуртиын 1 сюрс 962 гурт. Со пӧлысь 119-аз одӥг но улӥсез ӧвӧл. 301-аз дасо мурт сяна уг улы. Сыӵе лыдпусъёсты шарая Удмуртстатлэн кивалтӥсез Евгений Данилов.

Ярано коть, марысь мар ке, Россия ВТО-ысь потыны быгатоз на. Но со «марысь мар ке» чик но медаз луы вылэм…

 Елена Сараматова.

Удмурт Дунне
By Удмурт Дунне 25 ноября, 2011 12:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<