Юн ӟырдыт кырмомы киосмес!

Удмурт Дунне
By Удмурт Дунне 29 ноября, 2011 09:46

Юн ӟырдыт кырмомы киосмес!

«Трокай Борисов» медален пусъён.

Ортчем арня пумын Удмурт театр быдэс сяськаяськиз. Вань удмуртъёслэн «Удмурт кенеш» огазеяськонзылы 20 ар тырмонэз пусйыны люкаськизы 500 пала делегатъёс но куноос: удмурт огазеяськонлэн азьветлӥсьёсыз, тодосчиос, кивалтӥсьёс, артистъёс, журналистъёс, шаерысьтымы но республикалэн палэнысьтыз удмуртъёс.

Театре пырыку ик, мылкыд ырак каре: сомында дано, гажано удмуртъёс! Уноез юромо та ужрадлы дӥсяллям выль удмурт дэремъёссэс. Ог-огзэс праздникен ӟечкылало, мӧзмем сюлэмъёссэс буйгатыса, кенешо. Калыкез пумитаса, лэймыт гурзэс кисьто Воткаысь крезьчиос.

Тани кутскиз сӥё-дано ужрад. Катанчи усьтӥськиз — сцена вылын «Ингур» капеллаысь пиос. Кыӵе сюлмысь быдэстӥзы соос «Удмурт кенешлэсь» гимнзэ! Быдэс зал султӥз, куд-огез «ингуръёс» сьӧры кырӟазы:

Яратэ, яратэ, яратэ,

Шундыез, лыз инмез,

музъемез…

Люкаськем калыклэн пушкыз данъяськонэн но огазеясь мылкыдын бугырскиз. Нош «Удмурт кенеш» огазеяськонлэн кивалтӥсез Николай Мусалимов, ужрадэз усьтыса, пусйиз:

— Удмурт калыклэн вань аслаз ӧрез, «Удмурт кенеш» огазеяськонэз, калыкмы люкаськыны быгатэ бадӟым огазеясь ужрадъёсы. Но котьку тазьы ӧй вал. Калыклэн асваланэз ӝутскиз 20-тӥ даурлэн кутсконаз, соку нырысетӥ удмурт ӧтчамъёс ортчизы.

Нош туала историез ке чаклано, удмурт движение выльысь улӟиз, бугырскиз 20-тӥ даурлэн пумаз. Нырысь, 1988-тӥ арын, Ижын кылдӥз Удмурт клуб. Сое радъяз Николай Симанов. Бӧрысь удмурт движение ялан юнмаз, кылдӥз «Дэмен» огазеяськон, нош 1991-тӥ арын  — «Удмурт кенеш».

Николай Николаевич вакчияк мадиз на «Удмурт кенешлэсь» быдэстэм ужъёссэ но тау кариз солэн ужаз пыриськисьёслы, ассоциациен кивалтэм муртъёслы.

— Историысь пичи гинэ дыр куспын — 20 ар ӵоже — «Удмурт кенеш» юнмаз, — «кенешчиосты» юбилеен ӟечкыласа, пусйиз Кун Кенешлэн Тӧроез Александр Соловьёв. — Табере удмурт калык ассоциация республикаямы но солэн палэназ нимо-дано луэ. Солэсь верам кылзэ санэ басьто, кылзо.

Сӥё-дано ужрадын сое валаны луиз пӧртэм интыосысь вуэм ӟечкыланъёсъя но. Россиысь калыкъёслэн ассамблеязылэсь, Удмурт Республикая федерал инспекторлэсь ӟечкыланъёссэс вайиз ассамблеялэн кивалтӥсезлэн воштӥсез Светлана Смирнова. Сӥлы карон телеграммаос вуизы Россиысь фин-угор калыкъёслэн ассоциацизылэн кивалтӥсезлэсь, Россиысь Кун Думаысь, Федерация Кенешысь, Фин-угор калыкъёслэн кенешонъя комитетысьтызы, поръёслэн «Мэр Канаш» огазеяськонзылэсь. Нош Мордовиысь нациосын ужан политикая министр Александр Лузгин  Удмурт шаере ачиз вуиз, «Удмурт кенешез» ӟечкыласа, синмаськемзэ вераз Брангуртысь песянайёсмылы, удмуртлыкез утеммылы.

— Асьмеос быдэс дуннелы тунсыко луиськом фин-угор выжыенымы, — пусйиз кивалтӥсь. — Соин ик культураенымы данъяськыны кулэ.

Юбилеен ӟечкыланы вуиз Удмуртилэн Президентэз Александр Волков но. Солэсь вераськемзэ люкаськемъёс тужгес но сак кылзӥзы.

— «Удмурт кенешлы», асьмелэн выль Россимылы сямен ик, 20 ар тырмиз. Мынам кӧня ке вераме потэ ассоциацилэн, нациосын ужанлэн асьме улонын интызы пумысен, — вераськонзэ мытӥз Президент но тодэ вайытӥз, мар лэсьтэмын вал республикаямы берло 10-20 ар ӵоже. ӧпкелемзэ вераз: 1990-тӥ аръёсы ми но, пе, трос дырмес быдтӥмы ваче вуонъёсын, али эшшо уногес лэсьтыса вуттысалмы ни.

Александр Волков пусйиз, шаерысьтымы гуртъёсын удмуртъёсгес уло. 10 ар ӵоже гинэ гуртъёсын 100 пала школа пуктэмын вал. Со сяна, ёрос центръёсын кылдылӥзы стадионъёс. Нош удмуртлыкез азинтон ласянь ке, Ижын усьтӥськиз К. Герд нимо гимназия, нылпи сад, Эшъяськон юрт, быдэсак выльдӥськиз Удмурт театр.

«Кенешчиосты» ӟечкылазы на Удмуртиысь нациосын ужан политикая министр Владимир Завалин, дышетонъя но наукая министр Андрей Кузнецов, культурая, печатья но иворъёсъя министр Дмитрий Иванов.

Сӥё-дано ӝытэ лыктэм котькуд кивалтӥсь «Удмурт кенешысь» мыло-кыдоослы таукаронъёс сётъяз. Но тужгес вылӥ дунъет луиз активистъёсты «Трокай Борисов» медален пусъён. Озьы данъямын вал удмурт калыклэн тужгес визьмо нылъёсыз-пиосыз:  тодосчиос Карл Пономарёв, Кузьма Куликов, Альберт Разин, Михаил Шишкин, Роза Яшина, Владимир Владыкин, Михаил Атаманов, политикъёс Валентин Тубылов, Светлана Смирнова, Игорь Семёнов, Можга педколледжлэн директорез Николай Пискунов, Алнаш ёросысь «Молодая гвардия» СПК-лэн кивалтӥсез Михаил Крылов, Башкортостанысь удмуртъёслэн азьветлӥсьсы Ренат Галямшин, Дэри ёросысь «кенешчи» Мария Ишматова но венгер тодосчи Петер Домокош.

Бадӟым агайзэс ӟечкыланы дыртӥзы мукет удмурт огазеяськонъёс но: «Дэмен», Удмурт нылкышно кенеш, Камсьӧр удмуртъёслэн центрзы, «Шунды». Нош палэнысь удмуртъёслэн нимынызы трос ӟеч кылъёс веразы Башкортостанысь Ренат Галямшин но Свердловск улосысь удмуртъёслэн азьветлӥсьсы Марина Ягуткина.

Юбилей дыръя делегатъёсты но куноосты паймытӥзы тужгес тунсыко удмурт коллективъёс, кырӟасьёс. Ваньзылы тау карыса, Николай Мусалимов пусйиз на: 20 ар ӵоже бадӟым сюресэз ортчим. Солы сӥзьыса, «Удмуртия» издательствоын книга поттэмын. Но азьланяз асьмеды эшшо кузьгес но паськытгес сюрес возьма. Со кузя мед мыномы, йырмес ӝутыса, ӵош кутӥськыса…

Быдэс театре нош ик шуккиськиз «Удмурт кенеш» огазеяськонлэн гимнэз. Сое мытӥз «Айкай» коллектив. Сьӧразы, мылкыдзы бугырскыса, кырӟазы  вань «кенешчиос»:

Ойдолэ, ойдолэ, ойдолэ

Юн, ӟырдыт кырмомы киосмес…

Елена Панфилова.

Удмурт Дунне
By Удмурт Дунне 29 ноября, 2011 09:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<