Ыштэм орден

Удмурт Дунне
By Удмурт Дунне Ноябрь 8, 2011 11:14

Ыштэм орден

В. Главатских (кыкетӥез) телерадиожурналистъёсын. Г. Грязев - бурысез. 2007-тӥ ар.

«Удмурт кенеш» огазеяськон шаерысьтымы журналистъёс пӧлын туэ радъяз Эрик Батуев нимо Национальной премия сётонэз. Гожъяськисьёс пӧлын вормисе потӥз Удмурт Республикаысь дано журналист Георгий Грязев. Кызь аръёс ӵоже ини республикаямы потӥсь газет-журналъёсын печатласько атыкай музъеммес утисьёслы сӥзем ужъёсыз.

Георгий Грязевлэн тросэз геройёсыз ожмаськемын «пӧсь интыосын». Соос пӧлын — Якшур-Бӧдья ёросысь Кекоран черкогуртысь Виктор Вахрушев. Удмурт лётчик, майор геройлыко ожмаськиз Афганистанын, пусъемын кык Горд Кизили орденэн (берлозэ сётэмын быремез бере).

Мукетыз удмурт майор, лётчик Олег Исаев быриз Уйпал Кавказын ожмаськонъёс дыръя. Татарстанысь Балтач ёросысь Вуж Кушкет гуртын вордӥськем воргорон луиз Россилэн Героез. Таӵе вылӥ наградаен ик пусъемын Уйпал Кавказын бырем удмурт лейтенант Юрий Курягин.

Трос соос, Афганистанын но Чечняын ожмаськемъёс, Быдӟым ож пыр потэмъёс, Кореяын, Египетын геройлыко луэмзэс возьматэмъёс. Тросэз соос туннэ но пӧламы. «Пӧсь интыосын» ожмаськемъёс кытӥяз пӧртэм шуг-секытъёсын пумиськоно луо. Сыӵеос пӧлы шедиз Владимир Главатских.

 

Быдэ вуон

1995-тӥ арын 4-тӥ декабре Шаркан ёросысь ӟузя (Зюзино) черкогуртын улӥсь Владимир Главатских 18 арес тырмонзэ пусйиз. Озьыен, быдэ вуон дыр вуиз. Главатских армилэсь ӧз кышкалля, кулэ бере — мыноно. Кык йыро ӧрӟиен пус пияшлы но усиз.

— 14-тӥ декабре вал со, — тодаз вае ӟузялась пияш. — Со ӝытэ тётяелэн нылызлэн сюанэз вал. ӵапак соос доры васьки, оло, кыӵе ке юрттэт кулэ луоз шуыса. Жингыртӥзы. Тётя Света телефон трубкаез кутӥз. «Я таре!» — шуиз но валатски: монэ повесткалы ӧтё. ӵуказеяз ик военкоматэ мынӥ. Кытчы сюро — сыӵе юан йырам ӧй но вал. Стройбатэ гинэ шедеме уг поты, пограничник яке десантник луысал. Егитъёс ведь со сярысьгес малпасько. Шеди МВД-е.

— Мынам соку шок вал! — итӥське вераськонамы Владимир Главатскихлэн анаез Ангелина Рустиковна. — Озьы луоз шуыса, ми ӧм но малпалэ, соку гинэ вордскем нуналыз вал ук. Гуртын сюан дыръя коркась корка ӧтьылӥськод. ӝӧк тыр сиён октэмын. Сюан ӝӧк ик армие келян луиз.

Мынӥмы Ижевске. Отын монэ пие доры мыр-мыр уг лэзё. Мырдэм но кызьы офицеръёсын, солдатъёсын вераськыса, мукет ӧсэтӥ пыри. Вова столовойын нарядын сылэ вылэм. Выль ботинка басьтӥ вал, ӧз куты, малы, пе, со мыным, отын мукетъёссэ сётозы. Адямиос олокыӵе колбасаос нуо, нош ми пыжем ӟазег гинэ вайимы. Кошкемез бере уйёссэ но ӧй кӧлалля.

— Ижевскысь 23-тӥ числое келязы ни, — веранзэ азьланьтӥз Владимир Главатских. — Краснодаре вуим. Мон гын сапеген вал. Удмуртиын кезьыт, пыд кынме, нош отын пукись вуостӥ ветлӥськом. Адямиос шорамы паймыса учко — кытысь таӵе котмем курегъёсты вайиллям? Пыдъёс супыльӟизы. Отын выль дӥсь сётӥзы. Асьмелэсьсэ берен доре келяны луэ вал, но мон озьы ӧй выры ни.

Нырысь ик ыбылӥськыны нуизы. Кин тросгес йӧттоз? Соку ик веразы, Чечняе но мукет сыӵе «пӧсь» интыосы уз келялэ шуыса. Мон умой ыбылӥськи. Присяга сётэм бере одӥгаз ӝытазе, стройын сылыку, «ты», «ты» шуизы но потыны косӥзы. Ми потӥм. Эшъёс верало ни: тӥледлы удалтӥз, пе, Владикавказын выль воинской часть усьтӥськем, отын служить кароды. Лафа!

Милемлы вещмешокъёс дасяллям ни вылэм. Поездэ пуктӥзы. Одӥг сутка мыныса, Владикавказэ вуим. Валатским, кытчы милемды нуо. Куинь толэзь Северной Осетиын улӥмы. Тарскийысь БМП-ос вайизы. Колоннае султыса, шонерак Грозное кошкимы. 2-тӥ апреле потӥмы ке, одӥг уйзэ Моздокын кӧлыса, Чечняын вал ни. 15-тӥ городок, 101-тӥ бригада.

 

Дарылэн зыныз курыт

— Отын ваньмыз куашкамын кадь потӥз, — тодаз вае Владимир. — Учкыны но кышкыт. Мынам синъёс солы дышемын ӧвӧл. Паймиськод, кызьы аслад киыныд лэсьтэмзэ ачид ик тӥялод! Городокмес пуктыса гинэ вуим, уйин ыбылӥськон кутскиз! Пуляос тум! тум! шулало. Кытчы корт «шӧкычъёс» лобо? Валантэм. Собере талы но дышимы, озьы ик луыны кулэ кадь.

Нырысетӥ ужрадэ мынӥмы 15-тӥ мае. Ми соку сопровождениын вал. Бензин нуись-вайись автомашинаен Червлённое ветлӥмы. ӵапак соку мынам призывысь ик пияшкалэн, БМП-лэн броня вылаз пуксьыкуз, автоматысьтыз рожокез-магазинэз олокызьы усем. Утчаны шуыса, со музъем вылэ тэтче но каллен гинэ мынӥсь машиналэн гусеница улаз пыдчиньыез шеде. Али но со учыр син азям. Гуртын холодец лэсьто ук, сыӵе ик сакыль-сакыль вал со чиньы. Та нырысетӥез кӧшкемыт адӟонэ луиз. Бӧрысь пуны кадь дыши!

Июньысен 11-тӥ блокпостын сылӥмы. Ялан чакласькыса, эскериськыса улӥмы, асьме солдатъёсты, техникаез учкылӥмы. Татын но олокыӵе учыръёс вал. Одӥгез пияшкамы, оло дыртэменыз, оло йыртэк ужаменыз, бронежилеттэк жуг-жаг куштыны потэм. Снайпер сое адӟе но ыбе. 3 час кулонэн нюръяськиз. Милям промидолмы гинэ вань, мукет эмъюмъёсмы ӧвӧл. Кӧтсюлъёсыз ик кыре потэмын вал. Асьмелэнъёс лыктыны уг быгато — окружениын кадь пукиськом. Промидолэн кӧня ке возиськиз ик.

6-тӥ августэ зэмос ож кутскиз. Котькытын ыбылӥсько. Бырем эшмы вӧзамы 3-4 нунал кыллиз. Куазь пӧсь, 30-40 градус возиське. Со пияшкалэн мугорыз зынмыны кутскиз, котырыз вия. Музъемез метр мурдала но копаны уг луы — снайпер ялан «ӵышке но ӵышке». Кызьы быгатӥмы, изъёсын шобыртыса кельтӥмы. Берлогес кивалтӥсьёсмылы верамы. Сое зэмос христиан муртэ сямен ватӥзы-а, ӧз-а, уг тодӥськы. Киров областьысь пияшка ӝоген дембеле гуртаз бертыны кулэ ни вал.

Гурезьёсын пуляос вистэм-вожтэм, норись лузьёс кадь лобало. Одӥг пол тусьты-пуньы миськыны потӥ. Ву сётӥсь гумыосмы пасесь вал бере, пичигес гу копаса, бассейн лэсьтӥмы: пӧсь куазен отын пыласькылӥмы, куд-ог дыръя тусьты-пуньы но гылъямы. Бандит пуля пель дортӥм тум! вазьыса ортчиз, стена борды пурк! усиз. Пӧсь вуэн сулям бере кадь, мон асьмелэнъёс доры пегӟи. Пуля шузи шуо ке но, со аслэсьтыззэ шедьтэ. Олокыӵе но учыръёс пыр потыса, мон луло кыли — гожтэмез озьы, дыр.

Блокпостын сылон — небыт вож турын вылын кылльыса, чильым кыскон ӧвӧл. Нуналлы быдэ ыбылӥсько. Милемыз ӵужыса сямен утялтэмзы потэ вал, ультиматумъёсын кышкатъязы. Блокпостын ик сӧсырмыны но сюри: огез узвесь йырам йӧтӥз — осколочной контузия вал, мукетыз пыдтӥм пыр потӥз.

7-тӥ блокпостын вал со. Вӧзамы быдэс нунал ӵоже 4 чечен милиционеръёс сылӥзы. Лумбыт син шорамы вал. Сыло но кошко, сыло но кошко. 16 часэ дорамы вуизы. Соослэсь одӥгзэ эшсэс боевикъёс пленэ басьто, нош малпаллям милямъёс вылэ. Кутӥллям эшсэс 22-тӥ блокпостын, со инты милемлы ваче пумит вал. Соку отын Ярославльысь ОМОН сылӥз. Чечен милиционеръёс, дорамы лыктыса, кылдэм югдурез сэрттыны-пертчыны тыршизы. Ми золтэм пружина кадесь вал.

Дорысьтымы кошкыса гинэ вуизы, куашкам юртъёс сьӧрысь шузимыса ыбылыны ӧдъязы. Блокпостмы та улон коркамылэсь но пичи, кортлэсь но бетонлэсь пуктэмын. Боевикъёс пумитазы ыбылэммес витё. Кин ке шӧдтэк шорысь ыбыны шедьтысал ке, соос милемды ваньместы борддор кузяна горд вирен наштасалзы.

Сю пала йыр вандӥсьёс тыбыр сьӧрысьтымы музъем улысь шыръёс кадь потӥзы, ӧм но шӧдылэ. Соосты адӟыны но уг луы, гурезьёсын барсъёс сямен бызьыло. Олокытӥ мар бензинэз кисьтӥллям но ӝуатӥллям. Учкиськом но, нап ӵынлэсь катанчи блокпост котыртӥ вӧлмем ни, коть пужбинялтондэ со вылэ ош. Ма кароно? Котырак выдыса, ыбылыны кутским, боевикъёс дорамы матэгес гинэ лыктыны медаз быгатэ. Тӥни соку ик мыным зол гинэ йӧтӥз. Ярам коть, луло кылимы.

Война мынэ, мон нош блокпостын шӧй-шӧй кыллисько. Ми котыртэмын. Малпасько, кулӥд ке, ыбылӥськыса мед кулод! Инмар мед утёз, вандыса гинэ медаз кельтэ! Кӧня пиосты озьы быдтэмзэс кылэме вал! Инмарлы тау, йырзэс вандэмъёсты ачим ӧй адӟылы.

Кылльыса умой ӧвӧл! Костыльёс курисько, туж султэме потэ. Номыр ӧз пӧрмы. Озьы куинь нунал кылли. Пыды кор зӧкта тӧрназ. Асьмелэнъёс лыктыны уг быгато. Я, «вож коридор» усьтӥзы, лэся, перемирие ялӥзы. Чечен милиционеръёс «Урал» автомашинаосын блокпостъёсысь сӧсырмемъёсты октыса ветлӥзы. Мон но соос пӧлы шеди. Владикавказысь госпитале нуизы. ӧжыт бурми но, Дачный посёлоке эмъяськыны келязы выльысь Чечняе нуон вылысь. Ми асьмеос но берен куриськиськомы ни вал, доре бертэм уг поты. Кызьы эшъёстэ отчы кельтод? Братъёс кадь луим ни вал. Монэ аслам частям ик келязы.

— Блокпостын сылыкумы, олокӧня нунал сиёнтэк но улэммы вань. Одӥг дуры ӝук яке шыд сюре ке, ярам, тау Инмарлы. Милемлы чик тодмотэм песянай юрттылӥз. Солы ог 80 арес вал, туж губрес. Чеченка ӧвӧл, ӟуч, православной. Милям блокпостмы доры со ӝыны пакет ке но кеньыр яке маке мукет вае вал.

Одӥг пол ми дорысь берен кошкыкуз, боевикъёс пыдаз ыбиллям. Мон соку постын сылӥсько вал. Ой, пересез виизы ук, пӧй. Кӧня ке улыса, учкисько но, вырӟылэ кадь. Пичильтык гинэ берытскиз но, солы автоматысь выльысь очередь лэзизы. Ярам коть, узвесьёс вӧзтӥз ортчизы. Адӟисько: сӧсыртэм песянай урдэсаз кыллись кор сьӧры ватскиз. Эшъёслы шуисько, мынэ, пӧй, вае сое татчы.

Бур-а, паллян-а пыдаз йӧтэмын вал — уг ни тодӥськы. Мон но озьыгес ик сӧсырмыны сюри вал. Песянаез бинтовать каризы. Солы номыр кадь ик ӧвӧл, кырӟа! Тодӥсько, кыӵе со вӧсь. Вот сыӵе кужмо но чидась кышномурт! Сокугес ик дорамы Лебедь генераллэн спецназэз вуылӥз. Песянаез соос сьӧры госпитале келяны малпаськом вал, пумит луиз, кесяське: «Мон отын вал ни, тӥледын улэме потэ!» Мон, пе, тӥледлы сиён дасяло, эн гинэ келялэ. Келятэк ӧйлась. Песянай гинэ шуиськомы вал сое. Солдатъёс, патронэз шлифовать карыса, чыртыяз брелок ошизы. Гольык пыд ветлӥз, милемлы гадь киросъёс но вайылӥз. Со пересез али но тодам вайисько.

— Милемлы куазь сярысь гожъя вал, — мур лулӟе анаез Ангелина Рустиковна. — «Кыӵе чебер татын инкуазь! Чебересь сяськаос!» Тодэ ук, кыӵе мон яратӥсько будосъёсты. Бобыос, пе, макем кузесь! Солэн милемды куректытэмез уг поты вылэм. Госпитале шедем мугзэ но кызьы гожтӥз ай: гриппен, пе, сюри. Ми картошка октонмес куштӥськом, телевизор учкыны корка пыриськом, ма Чечня сярысь вералозы шуыса. Ачим медсестра ӧй ке луысал, оло, сыӵе гожтэтъёсызлы оскысал но. Ма, кызьы солдатэз пыэдэн госпитале понозы? Лариса нылылы гожтэм вылэм госпитале сюремзэ, нош мыным зэмос мугзэ  вераны лэзьымтэ.

Гожтэтъёссэ туж шер басьтылӥмы: оло ачиз ӧз гожъя, оло ми доры ӧз вуылэ. Сюлэмы ӧз чида — военкоматэ мынӥ. Верасько, мужике, пӧй, пал пыд, пие Чечняе сюрем, гожтэтэз ӧвӧл. Тодӥськоды-а, мар шуиз военком — Сенной, лэся, фамилиез: «Тӥ егит на. Мукет но пинал вордыны быгатоды!» Кытчы пырон пась уг шедьтӥськы! Котькуд адямилы уд вера ук, ма мынам пушкам пӧзе! Анае даллаше, малы, пе, мыным номыр уд вераськы! Ма, кызьы солы ваньзэ мачкод! Сюлмыз потоз ук!

 

Зэмлык понна нюръяськон

— Ми ӵемысьгес сылӥськом вал сюрес вылысь 11-тӥ блокпостын, —  нош ик Чечен шаере вуэ удмурт пияш. — Нош ик боевикъёс котыртӥзы. Одӥг пол йыр вандӥсьёслэсь бензовоззэс пуштытыны быгатӥ. Постысь вуэммы бере ик ротноймы Эдуард Юрьевич орденлы представление гожтӥз. Эшъёс но мыным дурбасьтӥзы: со, пе, ялан 11-тӥ постын, номырлэсь уг кышка, ялан милемлы юрттыны тырше. Озьы представление вылӥе кошкиз.

— Милям сикысь пумы вайымтэ на вал, — тодаз вае Ангелина Главатских, — трактор но олокытысь сюриз. Юрттӥсьёс сике кошкизы. Дорысьтымы телефон жингыртӥз. Мыныны уг ваньмиськы, пумен сиён дасясько, тусьты-пуньы миськисько. Мед жингыртозы, пиналъёс, дыр, малпасько. Сюлэмы ӧз ик чида — трубкаез басьтӥ. Картэлэн вынызлэсь куаразэ тодмай. Лина тётка, пе, сылӥськод-а, пукиськод-а? Мон дышемын ни, кышкато ке, соку ик пуксисько. Ма меда вераны медэ? Пукисько, пӧй. Воваед, пе, ми дорын. Нош дыр ӝыт 7 час но ӝыны ини. Номырзэ валатэк, пукисько. «Воваед татын!» — нош ик кылӥськиз. Кытын? Кемалась ик ӧвӧл Шаркан ёросысь Гондырвай гуртэ Чечняысь Дима Вахрушевлэсь шӧйзэ коросын вайизы вал. Мынам киосы но, пыдъёсы но юскиськизы.

Малы со отчы вуэмын? Малы милемлы ачиз уг жингырты? Татын маке но умойтэм. Одӥг ар гинэ служить кариз ук! Малы вазьгес бертэмын, пегӟемын-а мар-а? Ми Вася кузпалыным выныз доры ваським. Пие отын пуке. Кызьы пумитамме уг тодӥськы ни. Берло гинэ вераз, нокыӵе документъёсы ӧвӧл шуыса, лушказы, пе. Малы мыным таӵе шуд! Огез пыдтэм, мукетыз но калыклэсь пӧртэм!

— Мыным Вова вераз, орденлы представление келямын шуыса, — итӥське вераськонэ Ангелина Рустиковналэн Светлана сузэрез — соку со ӟузя школалэн кивалтӥсез вал, али ӟузя муниципал кылдытэтлэн тӧроез. — Мон туж пайми. Нош куке прокуратурае ӧтчаны ӧдъязы, кышкай — татын зэмзэ но маке умойтэм, пӧй, та дезертир ӧвӧл меда? Документъёстэ, пӧй, возьматы ай. Поттӥз — кырымпыдэс вылаз гинэ тэрымон огшоры бумага. Отын гожтэмын, ку басьтэмын армие, ку дембеле келямын. Ярам, печатез вань. Озьы ке но ӟечен адямиез прокуратураетӥ уз кыскалэ ук!

Мон соин ӵош ик ветлӥ. Ярам, пытсэт сьӧры ӧз кельтэ. «Кытын, бен, орденэд, наградить каремын шуид но?» — юасько.

— Мынам фамилие умойтэм гожтэмын, — ӝожтӥське Владимир Главатских, — Букваос сурамын. Ваньмыз тупа, нош фамилие — уг. Ыштэм документъёсме выльдон пумысен пӧртэм чиновникъёслы кӧня куронъёс ыстылӥ. Служить карем интыосы но, аръёсыз но тупало, нош мыным гожто «Головатских не служил». Мон Бородули гуртын вордскемын. Отчы но заказной гожтэт вуиз, озьы ик «Головатских» пусъемын. Орден сярысь уг но малпаськы ни вал, киыным шонтӥ со вылэ, вуиз ке — вуоз, ӧз ке — уз. Висеменым армиысь демобилизовать карыкузы, веразы вал, татчы ӧз вуы бере, гуртад, пе, лэзёзы: тон наградной списоке сюремын, адресэд но, адӟисьёс но вань. Представление улэ ачим ик гожтӥськи вал. Озьы ик ӧз вуы.

— Документъёсын трос гинэ выроно луиз, — сюлэм ӝожзэ кисьтэ Ангелина Рустиковна. — Нырысь ик сӧсырмемез сярысь справка утчамы. Володя 2-тӥ группаен инвалид. Документъёсыз ӧвӧл. Армиысь бумага вуэ. Отын я «Головатских», я «Главатцких» гожтэмын. Документъёс берен кошко. Серекъясько ни вал: кӧня коньдон армиысь вайид — ваньзэ сюрес вылэ быдтӥмы. Шарканэ яке Иже ачим келяса ветлӥ. Одӥгысьтыз кабинетысь улляло, ми мукетаз пыриськом. Адями служить каремын бере, кызьы документъёстэк улыны кулэ? Со пудо ӧвӧл ук!

Одӥг пол Ижын военкоматэ ӵош пыримы. Юало:

— Тон армиын вал-а?

— Вал! — шуэ.

— Соку малы татчыозь анаедлэн юбка бордаз кутскыса ветлӥськод?! — шонерак вераз офицер.

Монэ кабинетысь поттыны выро. Мон, пӧй, уг поты.

— Мон тӥледлы солдат будэтӥ. Армие ветлӥз анайтэк. Но малы монтэк документъёс татчыозь лэсьтыны уд быгатӥське? Со тӥ дорысь ук армие кошкиз! — верай пумитаз.

Югдурмес тодэм ёрос газетысь журналист Раиса Пинегина. Со туж юрттӥз. Пӧртэм интыосы гожтэтъёс ыстылэм. Докуметъёс мырдэм но кызьы лэсьтӥзы. Пиме нош адями чот каризы. Но тазалыкез ӧвӧл ни. Гуртын уж уг шедьы, городэ келяме уг поты.

— Уж шедьтоно ик вал, — сюлмаське Володя. — Армия бере Ижысь автозаводэ кутскылӥ. Кошки, йыр висегес. Отын татчыозь пичи осколокез вань. Мукетыз пыдтӥм потӥз. Папалэн пыдыз ӧвӧл, мон но пал пыд кылё ни малпасько вал. Ярам коть, лыаз но сӧназ олокызьы ӧвӧл йӧтэм.

 

Йылпумъяса

10 ар ортчыса гинэ, 2006-тӥ арын декабре, Чечен элькунын геройлыко ожмаськемез понна Владимир Главатскихлы гадь вылаз Мужество орден бырттӥзы. Кезьыт корт шунтӥз на меда кема аръёс ӵоже зэмлыкез витись егит сюлэмез?

ӟузя черкогуртысь сюлэмам секыт узвесен кошки. Мыным кылзыны гинэ но капчи ӧй вал Владимир Главатскихлэн но солэн семьяезлэн зэмлык понна нюръяськемзы сярысь. Данъяськисько юн сюлэмо луэмзылы, асьсэды киязы кутыны быгатэмзылы, улонысь югытэзлы оскемзылы.

Оло, верамысьтызы ваньзэ шараяно но ӧй вал? Мултэссэ гожтэме понна вождэс эн поттэ. Куректонэз шори люкыса, трослы капчигес луэ, шуо. Тӥ вормонтэмзэ но вормиды. Данъяське — Владимир зэмос герой! Тужгес но дуноез — солдат дораз лулоен бертӥз. Одӥгез понна сюлэм ӝож: кужмо воргоронлэсь тазалыксэ чырс лимонэз кадь пызьыртӥзы но вунэтыны кутскизы. Оло, мон янгышасько?

Георгий Грязев,

Удмуртиысь дано журналист.

Удмурт Дунне
By Удмурт Дунне Ноябрь 8, 2011 11:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<