Шудэз думыса уд возьы

Удмурт Дунне
By Удмурт Дунне 30 ноября, 2011 09:55

Шудэз думыса  уд возьы

Учкисько Алнаш ёросысь Азамат гуртысь Мария Сомовалэн туспуктэмез шоры но паймисько: мар понна солы Инмар вылысьтыз вылаз кайгузэ ыстэ? Чиданзэ эскере шат?

Мария Алексеевналэн вордскемез ик шудтэм вылэм, лэся. Вазь анайтэк кылиз со. Ӵужаез нуныкаезлы вань шунытсэ сётыны выриз ке но, Маша юн вожъяськыса будӥз тыро семьяослы. Соин, вылды, пичи дыръяз аслыз шуылӥз: аслам пиналъёсы вордӥськизы ке, ваньзэ лэсьто, соос синву медаз кисьтэ шуыса. Но шуд ас малпамед бордысь гинэ уг поты вылэм…

Вить пиналыз пӧлысь туннэ улэп ӧвӧл ни кыкез. Огзэ нылпи ваён юртысен ик ыштӥз. Бӧрысь эмсузэръёс сипыртэм каризы: со таза луысал, акушерка ӧй сӧсыртысалыз ке. Нош мукетсэ нылзэ ватӥз 2001-тӥ арын. Таизлэсь но малэсь кулэмзэ рос-прос уг тоды. Судмедэкспертъёс шуизы: пушкысьтыз шедьтэмын нымы-кибыосты быдтонъя яд. Но со гожъямъёсын документ олокытчы чиптэм-чаптэм ышемын. Мария Алексеевна огзэ гинэ тодэ: нылыз картэныз туж ик уг тупало вал. Со ик ядэн сектаз, дыр. Ма, анайзытэк кылем куинь нылпиосыз но огымысь кадь куриськизы: ӵужай, ну милемыз дорад.

Пичиезлы Глеб внукезлы 2 арес сяна ӧй вал. Бадӟымезлы, Мариналы — 10. Таос вискын эшшо Алёша вань на. Сомова малпаз: нуныосты со ноку уз кушты. Зэм, куд-огез бышкись кылъёс аслыз ик вералляз: уксё понна нылпиосты аслыд кельтӥд-а? Картэд но кулэмын, кызьы пичиосты будэтыны малпаськод, пе. Муртъёслы валэктод шат, ас пиналъёстэ нылпи юртэ келяны туж секыт шуыса? Ачиз соосты утялтыны быгатыку, кызьы уллялоз коркасьтыз? Анайзылы но шайгу дораз кылзэ сётӥз ук: будэтоз, дышетоз, адямие поттоз.

Жаляса верано, Марина нуныкайзэ утьыны ӧз пӧрмыты. 2008-тӥ арын 28-тӥ июне 17 аресъем нылашез виизы. Аръёс ортчыса но, рос-прос тодмо ӧвӧл, кинлы со люкетӥз. Огез шараямын: чыртыыз чигемын, мугорыз сӧсыртэмын. Виисьсэ утчазы — ӧз шедьтэ. Одӥг пиосмурт янгышсэ ас вылаз басьтыны выриз ик: мон, пе, машинаеным вылаз пыри. Но сое судэтӥ но ӧз кыскалэ — туннэ ке но гань-гань улэ.

Мария Сомова гинэ аслыз инты уг шедьты. Вир кисьтӥськем интые Маринаелэсь лулзэ буйгатон вылысь вӧсям ву ке но, пе, пазьгысал. Нош солы кулэм интызэ но возьматӥсь уг шедьы. Ачиз гинэ Марина огпол вӧтатӥз ӵужанайзэ. Азаматэ кожон палась сик дурын пуке кадь. Возь вылын. Пыдыз бинямын. Но бинтэз сюлтыр-калтыр ошылӥськемын. Нылаш сое тупатъяны выре кадь. Ӵужайзэ адӟиз но, йырзэ мырдэм ӝутыса, вераз: тодысал ке, нокытчы но ӧй мынысал — сокем йыры висе. Бератаз будэтӥз на: монэ татын ӧз вие.

Марина со ӝытэ Алнаше дискотекае мынӥз вал. Чалмыт, востэм дыды дыртыса ик потӥз юртысьтыз. Ӵужаез малы ке лулӟиз: бакельме (благословение) но ӧй сёты ук. Сюлэмыз шӧдӥз, лэся. Дораз бертон сюрес вылэ эшеныз потэм Марина юртозяз ӧз вуы.

Матысь ӵыжы-выжыостэ ог-огзы бӧрсьы ватыса, шузимод кадь. Но Мария Сомова возиське. Глеб внукме будэтоно на, шуэ. Со али 7-тӥ классын дышетске. Кылъёсъя предметъёсын гинэ «куиньёс» басья. Нош мукетъёсыныз йырвизьзэ ужатэ ик. Туж яратэ математикаез. Дышетскон-шудон висказ ассэ пиртэшен шӧдэмысь но дугдылэ кадь. Но ӝыт вуэмъя лулӟылыны кутске: малы меда, пе, мынам гинэ анае ӧвӧл? Атайлы сокем ик вожъяськемзэ шӧдыны уг луы. Бубиз улэп ке но, доразы уг возьматъяськы, алимент уг тыры. Ма, атайзэ Глеблы воштӥз 19 аресъем агаез. Таиз али сюан шудӥз. Оло, выль кен ик Глеблы анайзэ воштыны юрттоз ай. Нылпи но вайыны дасясько кадь. Таӵе малпанъёс ик азьлань вамыштыны кужым сёто Мария Сомовалы.

Елена Фёдорова.

Туспуктӥз Владимир Беломорских.

Удмурт Дунне
By Удмурт Дунне 30 ноября, 2011 09:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<