Чигвесе бырттэм мылкыд

Удмурт Дунне
By Удмурт Дунне 30 ноября, 2011 09:51

Чигвесе бырттэм мылкыд

Удмурт нылкышно кенешлэн Воткинск городысь ёзэз алигес люкаськылӥз «Чигвесь» клубе. Таиз пумиськон сӥземын вал кышетлы. Пельпумъёссэс кашамер кышетъёсын шобыртэм сяна, нылкышноос адӟытон но радъяллям. Сяськаё кышетъёсын артэ трос мукетъёсыз но вал. Кызьы соосты шуо, кытын кутӥсько, та пумысен туж тунсыко вераськон пӧрмиз.

 

Шоголика-бызика

Галина Перевозчикова.

Городысь нылкышно кенешен кивалтӥсь, нылпи садысь воспитатель Галина Перевозчикова аслаз мадемъёсыныз вань люкаськемъёсты паймытӥз. Адӟытонэ со кыӵе но кышетъёс вайымтэ: сюанэ ветлонозэ, бер пужыёзэ, лушкем пужыёзэ, катанной, пичи но бадӟым нимаськисьёссэ.

Анаелэн туж нуллэмез потэ вал, пе, сьӧд кышет, вожъяськыса учкылэм эшез шоры. Воткаысь пересь апайзы огпол сьӧд басма ваем юбкалы шуыса, сое ик кышет карем. Огпал сэрегзэ яркыт сӥньысъёсын пужыятыса, бер кышет пӧрмытэм.

— Нош песянаймылэн (ми, пиналъёс,  сое Бадӟи гинэ нималлям — бадӟым мама) кышетэз лыдъянтэм вал, — маде Галина Николаевна. — Нунал потэ ке, ньыль-витьсэ воштоз. Шуоз вал, кышет улысь йырси медаз адскы. Гидкуае потыны одӥгзэ керттоз, пӧраськоз мукетыныз, огшоры шутэтскыкуз, нош мукетсэ кутоз. Синучкон шоры ноку ӧз учкылы, милесьтым юа: умой-а пӧрмем? Пересьмылэн азькышетэз гинэ но сизьымдон сизьым вал, дыр. Соосты но нунал ӵоже олокӧня пол вошъялляз.

Г. Н. Перевозчикова озьы ик тодматӥз кышетъёсты пӧртэм сямен керттон но нуллон амалъёсын. Пинал нылъёс пель сьӧртӥ кертто ке, нылкышноос гердзэ гурулазы каро, нош пересьёс кымес вадьсытӥзы куасалтыса гурулазы кертто. Кильымез (складкаез) одӥг гинэ медло. Кык полэс луэ ке, сыӵе нылкышнно, пе, усьтыр-табыр сямо. Кышетэз янгышаса пичи пал керттыку (вакчи сэрегеныз педпала), пичи гуртэ бызёд, шуо, яке — янгыш луод. Нош пинал нылъёс кышетсэс кыместӥзы йылсо карыса шудонэ  потыку, исало: шоголика-бызика, арня бере бызёд-а?

Люкаськемъёс мукет но вераськонъёсты тодазы вайизы. Нюлэскы йыромид ке, кышетэз мыддорин керттоно. Вань сыӵе но чакланъёс: кулэм муртлы кышетэз гурулаз керттоно, пумзэ паллян палтӥ поттыса.

Галина Николаевна туж утьыса возе кума кышетсэ. Тазэ солы, 8-тӥ классын дышетскыкуз, кузьмам возем нылызлэн мумиз. Шуэм, сое нокинлы кузьманы уг яра, утьыса возёно. Та кашамер кышетме синпельлы возисько, пе, уг но керттылӥськы. Со понна та пумиськонын Перевозчикова  кӧттырымон кильтыръяськиз. Ма, маин ӧвӧл шоголика-бызика!

 

Супер, песянай!

Тамара Трефилова.

Кышетъёс сярысь озьы ик туж тунсыко мадиз Тамара Трефилова. Со но трос пӧртэмзэ ваем адӟытыны. Вуж ке но, туж дуно потэ, пе, ыж гонлэсь бадӟым кышетэ. Азьло аръёсы сое озьы гинэ уд шедьты вылэм. Вань ке сыӵе кышетэд, иське, тон узыр адями. Пинал дыръязы машинаос ӧй вал, кытчы ке кыдёке валэн ветлӥзы. Толалтэ бадӟым кышетэз дӥськут вылтӥзы кертто, гурултӥзы тэчетэн бырттыса. Нош пиналъёсты кышетэн кечат-вамат бинялто но гердзэ мышказ каро. Ма, али но ӟырт кезьытэн пичи нылпиосты мамык кышетэн озьы бинялто.

Тамара Трефилова нылкышноослы возьматӥз ужен герӟаськем кышетъёссэ. Шунытгес курень кышетэн толалтэ кутсаськыны ветлӥ, нош гордмытэз тузонлэсь утиз, пе, етӥн сэстыку. Тугъёсын полукашамерен шудонъёсы потаз. Пичи тӧдьы кышет турнакуз шундылэсь утиз.

— Турнан вакыт бадӟым праздниклы пӧрме вал, — маде Тамара Яковлевна. — Ваньмыз чебер дӥсяськемын, сяська кадь адӟисько. Йыръёсазы выль кышетъёс. Нылъёслэн гердэз чырты сьӧразы керттэмын, нош нылкышноослэн — гурулазы. Котырак кырӟан чузъяське.

Т. Я. Трефилова туж яратэ кырӟаны, ветлэ «Россияночка» ансамбле. Нокыӵе удмурт ужрадъёслэсь уг кыльы. Эшъёсыныз ӵош городысь 2 номеро нылпи садысь покчиос доры ветло, соосты удмурт сям-йылолъёсын, кырӟан-шудонъёсын тодмато. Со гинэ мар, Врткинскысь песянайёс пӧлын радъям ӵошатсконын 2008-тӥ арын Трефилова «Супербабушка» луиз.

Тамара Яковлевна та конкурсын возьматӥз-данъяз ас калыксэ, ас выжызэ. Удмурт дӥськутэн, удмурт кырӟанъёсын, пӧрамъёсын дунъясьёслэсь мылкыдъёссэс бугыртӥз. Котыр ласянь юрттэмзы понна песянай тау каре городысь «Тюрагай» ансамбльлы, «Удмурт кенеш» огазеяськонлэн ёзэзлы, «Чигвесь» клубе ветлӥсьёслы.

 

Кырӟась-бӧрдӥсь ныркышет

Зоя Николаева но Валентина Черыгова.

Покчи нылпиосты дышетӥсь Валентина Черыгова тодаз вайиз армие келянэз. ӵушконэн артэ та сям-йылолын бадӟым инты басьтэ ныркышет. Пинал нылъёс яратон пизылы, матысь ӵыжы-выжызылы пужыятэм ныркышет кузьмаллязы, туала вакытэ магазинысь басьто ни. Коркась корка ветлыкуз, солдат пилы, чыртыяз ӵушкон ошем сяна, кышет но сётылӥзы.

— Армие кошкись пилэн кышетъёсыз но ныркышетъёсыз кипосказ огазеямын вал, — тодаз вае Валентина Максимовна. — Кырӟан чузъяськем улсын пияш кышетъёсыныз сэзъя. Вить пӧртэм кырӟан чузъяське вал: корка пырыкуз, потыкуз, чук шуккыкуз, ас коркасьтыз потыкуз, гуртэныз люкиськыкуз — бусы капкатӥ потыкуз.

Весь малпалляй, малы меда солдат пи кышетэн шона? Али валай ни. Кин ке борды каньылак гинэ йӧтскыса, со ачиз сярысь тодэ ваён кельтылӥз. Солдат пи армие кошкем бере толэзь пала пель сьӧрам чузъяськылӥзы на со кырӟанъёс, ачиз но весь син азьын улӥз.

Удмурт тодосчиос вылэ пыкъяськыса, пумиськонын вераськон ӝутскиз вашкала вакытысь йыр керттэтъёс сярысь но. Чигвесьёс доры куное вуылӥз история наукаосъя кандидат Людмила Христолюбова, люкаськемъёслы со но кышетъёс сярысь валэктонъёс сётӥз.

Азьланяз лыдӟисьёсты тодматом на нылкышноослэн азьло дыръёсы кильтыръяськонъёсынызы. Нош клубе люкаськемъёс таӵе мылкыдэ вуизы: азьланяз, пе, таӵе пумиськонъёсты школаын дышетскисьёсын радъяно. Отын медло модая адӟытонэз но, киужъёслы дышетон но.

 Лия Малых.

Удмурт Дунне
By Удмурт Дунне 30 ноября, 2011 09:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<