Улондэ без медаз бездыты

Удмурт Дунне
By Удмурт Дунне 30 ноября, 2011 09:35

18-тӥ ноябре Ижевске люкаськылӥзы шаерысьтымы 100 пала онкологъёс но урологъёс. Пӧлазы вал Москваысь куно но — Россиысь Онкоурологъёслэн огазеяськонзылэн вице-президентэз Игорь Русаков. Конференциын вераськизы воргорон безын (предстательная железа) кылдэм лек пыктосэз дыраз шараян но йӧнатон сярысь.

Республикаысьтымы лек пыктосэн нюръяськонъя диспансерысь онкохирург, хирургия ёзэн кивалтӥсь Алексей Соколов сюлмаськемзэ уг ваты:

— Кышномуртъёс араз огпол ке но эмъясьёс доры пырало ик. Нош пиосмуртъёс, жаляса верано, тазалыксы сярысь сюлмаськыны вунэто. Лыдпусъёс возьмато: быдэс дуннеын безын лек пыктос кылдон учыръёс 2 поллы будэмын. Удмурт шаерын та висён 2-тӥ интыын мынэ ни.

Пусъёно: адями та черлэсь бордаз кырмиськемзэ нырысь-валысь уг шӧдылы. Нош со арысь аре, толэзьысь толэзе выжыоссэ мургес но мургес лэзе. Озьы пиосмурт, шуген кызям сяна, лыосыныз курадӟыны шӧта.

— Ми доры пиосмуртъёс ӵем дыръя йыгасько соку, куке вӧсьлы уг чидало ни, — веранзэ азьланьтэ Алексей Николаевич. — Озьыен, висён куинетӥ стадие вуэмын. Вазиськысал ке со вазьгес, пыктосэз ӝоггес йӧнатыны луысал. Ярам, та висёнэз вормыны милям али пӧртэм луонлыкъёсмы вань. 2008-тӥ арын усьтӥмы нимысьтыз урологияя отделение. Табере висись котькыӵе стадиын мед луоз, ми сое утьыны быгатомы.

Конференциын бадӟым саклык висъямын вал ёросъёсын но гуртъёсын ужась врачъёслы. Пуктэмын ужпум: мургес чаклано 60 аресъем воргоронъёсты, соослы пыӵатоно тазалыксы сярысь сюлмаськон мылкыд. Угось ужась пиосмуртъёс тазалыксэс эскерыло ик — диспансеризациез ортчыло. Нош пенсие потэмъёс палэнэ кылё.

— Туннэ пыдлось гуртын улӥсь пиосмурт но, нимысьтыз Иже ветлытэк, дунтэк эскериськыны быгатэ, — шуэ кивалтӥсь. — Шаерысьтымы котькудаз сямен поликлиникаын лэсьто PSA анализ. Соя тодыны луэ: мугорын вань-а, ӧвӧл-а пыктослэн пытьыосыз. Улон сётӥське одӥг пол. Сое утёно!

Ольга Корепанова.

Удмурт Дунне
By Удмурт Дунне 30 ноября, 2011 09:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<