Удмурт хипстеръёс

Удмурт Дунне
By Удмурт Дунне 16 ноября, 2011 10:04

Удмурт хипстеръёс

 

Городын вордскем удмуртъёс мукетэсь. Удмурт луэмзэс валало ке но, карын сое возьматыны уг быгато. Соос туалаесь, тунсыкоесь, яркытэсь — удмурт калыклэн улоназ пырыны уг дырто. Уг но быгато, дыр. Мурт каре-а соосты удмуртлык? Вераськоно кариськи куинь эшеным — ваньзы соос туала андеграунд культуралэн шорсюлэмаз уло. Куддыр соосты исаса нимаме потэ: удмурт хипстеръёс. Но удмурт хипстер луон — со ӧвӧл-а парадокс? Дунне мода сьӧры уйиськыса, кызьы утёд удмурт выжыдэ-сямдэ?

Хипстер (to be hip — быть в теме) — егитъёслэн субкультуразы, кылдӥз Америкаын 1940-тӥ аръёсы. Туннэ нуналлы сое тазьы валэктыны луэ: городысь егитъёс, кудъёсыз тунсыкъясько кунгож сьӧрысь вылӥ культураен но лулчеберетэн, модаен, альтернативной крезьгурен но инди-рокен, арт-хаус киноен, туала литератураен. Хипстеръёс нулло винтаж (вуж — сандыкъёсысь поттэм) дӥсь, асьсэды фотое пуктыло — лэсьтыло «лукъёс», ныр вылазы быртто бадӟым оправаен очкиос, йырсизэс пазяло лакен но мукет. Али вераны секыт, кин хипстер, кин ӧвӧл — та тулкым модаысь потэ ини. Удмурт хипстерлэсь туссэ «Узы-боры» киноысь Роберт Миннекузинлэн образэз пыр возьматыны тыршим. Со одно ик лыдӟыны кулэ кадь www.lookatme.ru вотэсбамез.

 

Миша Булычев (http://vkontakte.ru/club6086221), «Swimming cars»  британ шӧмо инди-рок группалэн бас-гитаристэз. Нырысьсэ тодмасткимы, dj барын шудыкум, соку Миша куриз фин-угор кырӟан пуктыны. Отысен тодмо луиз, та визьмо пияш удмурт шуыса. Ӧй чида, группазэ аслам вордӥськем нуналам шудыны ӧтьытэк. Таяз гужем соосты адӟыны луиз «Теория относительности» но «Открытый город» фестивальёсын.

— Нимы мынам Булычев Михаил Александрович. Вордӥськи Ижын 1992-тӥ арын 14-тӥ апреле. Пичи дыръям суредаськыны яратӥ, ӵемысь укное долкалляй но малпаськылӥ, чылкак телевизор азьын пукись песятай кадь… Берлогес кутски футбол клубын шудыны, выри капчи атлетикаен, волейболъя но баскетболъя ӵошатсконъёсы пыриськылӥ. Бас-гитара классъя дышетскыны пыри. Кӧня ке шудӥ «Водоворот» коллективын. Собере эшъёсыным группамес люкам. Удмурт «тусовка» сярысь номыр но уг тодӥськы кадь, но соосын кӧня ке тодматски соцсетьёс но удмурт сайтъёс пыр. Выжыея удмурт луисько ке но, удмурт кылэз урод тодӥсько — Ижевскын вордӥськи ук. Гужем гинэ пичигес дыръям ай улӥ гуртын: Кильмезьын но Сюмсиын. Отын туж умой вал… «Sweet home Alabama». Кемалась ни отчы ветлэме.

 

Денис Тубыловен тросэз тодматскизы, дыр, «Шундыкар» лагерьысен. Нош мыным удалтӥз соин Ижысь эшъёсы пыр тодматскыны. Капчи мылкыдо, мар веранэз! BMX спортэн выре вылэм!

— BMX (англ. bicycle motocross — лыдӟиське «бээмикс») — со нимысьтыз кылдытэм велосипедэн ворттылонъя спорт. 5-тӥ яке 6-тӥ классысен ворттылӥсько ини. Начальной классъёсын К. Герд гимназиын дышетски, собере 56 номеро гимназие выжи. Удмурт классэ мынӥ ачим мылкыд каремъя. Малы BMX? Гужем ворттылӥсько ӵукнаысен ӝытозь. Ма, эшъёсы но — ваньзы!  Великеным чик ӧй люкиськылысал, соин ворттылонъя кыӵе ке выль амалъёс дышетысал. Маке дауртонъяд куддыр усиськод — вӧсь. Эх, ворттылонъёс, трюкъёс, тодматсконъёс. Адреналин!

 Яна Чупина — егит журналист, промоутер, альтернатив группаослы концертъёс, дискотекаос радъясь. Эшшо со Трокай Борисовлэн… матысь ӵыжы-выжыез.

— Удмуртъёсын мон эшъяськи туэ тулыс гинэ, фин-угор студентъёс понна ортчись IFUSCO конференцие пыриськыса. Мар мыным матынгес — Трокай Борисов яке хипстеръёс? Нырысетӥез мыным тодмо, нош кыкетӥ кылэз мон уг валаськы. Кин со хипстер? Егит адями, кин «яблок» культураез гажа — айпод, айфон, мак? Пужейёс, ыгыос, треугольникъёс?

Мон будӥ, андеграунд культуралэсь дышетскыса. Асме рокер но, панк но ниманы быгатӥсько. Оло нош уг — пичи дыръям удмурт «Чеберинае» пыриськылӥ, удмурт кырӟанъёс кырӟалляй. Анаелы-атаелы тау — дорын удмурт кылын вераськиськом.

ДАРАЛИ ЛЕЛИ.

Удмурт Дунне
By Удмурт Дунне 16 ноября, 2011 10:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<