Та буртчин чуръёсыд

Удмурт Дунне
By Удмурт Дунне Ноябрь 11, 2011 13:14

Та буртчин чуръёсыд

Ачиз улэп дыръя Ашальчи Окилэн 4 книгаез потӥз: «Сюрес дурын» (1925), «О чём поёт вотячка» (1928), «Мар тодӥз тракома сярысь Карпа агай» (1930) но «Мон тодам вайисько» (1968). Лина Григорьевна улонысь кошкем бере эшшо куать бичет печатласькиз. Нош туэ, кулэмез дырысен 38 ар ортчыса, дуннеез адӟиз «Удмуртия» издательствоын потэм выль книга — «Ашальчи Оки. Та бурчин чуръёсыд. Эти шёлковые строчки».

Татчы пыризы Окилэн кылбуръёсыз, веросъёсыз но со сярысь тодэ ваёнъёс. Книга удмурт но ӟуч кылъёсын, сое поттон бордын ужазы кык сузэръёс: Россиысь Писательёслэн огазеяськонзылэн ёзчиез, Ашальчи Оки нимо премилэн лауреатэз, кылбурчи Лидия Нянькина но Алнашысь Ашальчи Окилэн музейысьтыз наукая валтӥсь ужась Мария Петрова. Книгаен тодматскон ортчиз Алнаш музъем вылын ик Лина Григорьевналэн кулэм нуналаз.

Кызьы кылдӥз та книга?

— Таӵе книга поттон сярысь малпанме сузэрелы, Лидия Нянькиналы, верай ай 2006-тӥ арын но кури сое Ашальчи Окилэсь веросъёссэ ӟуч кылэ берыктыны, — шуэ Мария Петрова. — Ар ортчыса, рукопись дась вал ини. Эшшо одӥг ар кошкиз туспуктэмъёсты но тодэ ваёнъёсты люканы. Кема ас черодзэ витиз ке но, табере та книгаез киямы кутыны быгатӥськом, со чебер пӧрмиз. Вылбамаз пуктэмын Ашальчи Окилэн тусыз но вордӥськем юртысьтыз укно наличник. Нимыз пумысен кема малпаськи, мыным потӥз, солэн кылбуръёсыз буртчин выллем, сыӵе ик чебер но небыт. Таӵе ним туж тупа кадь солэн чуръёсызлы, возьматэ Ашальчилэсь пуш дуннезэ.

Ашальчи Оки дунне литератураын нырысетӥ удмурт нылкышно кылбурчи луэ шуыса, тодӥськом. Нош проза удысын кышномуртъёс пӧлын кин нырысетӥез вал? Нош ик Ашальчи Оки. Солэн нырысетӥ веросъёсыз печатласькизы 1918-тӥ арын «Виль синь» газетын. Соберегес ик литературае вамыш лэсьтӥз Лем Маня (Мария Баженова), но со Окилэсь бергес печатласькыны кутскиз. Ашальчилэн «Орок» веросэз но «Миквор кышнолэн гур бераз» выжыкылэз чуваш кылын потэмын, но одӥг веросэз но та дырозь ӟуч кылэ берыктэмын ӧй вал на.

— Ашальчи Окилэсь произведениоссэ ӟуч кылэ берыктыкум, текстлэсь палэнэ кошкыны, вӧзаз мае ке аслэсьтымзэ ватсаны ӧй дӥсьты,  номырзэ но чеберъяны ӧй туртты, — веранзэ мытэ Лидия Нянькина. — Мон котьку тодам вози: со нырысетӥез нылкышно прозаик. Вылаз ик, удмурт литература соку гинэ ӝужаны ӧдъя вал ай, кызьы тае лыдэ басьтытэк? Озьыен, Ашальчи Окилэн вань гожъямъёсыз дуноесь но тунсыкоесь луо. Нялтас вераса, прозаезлы мон туж синмаськи. Со тунсыко сюжетъёс кылдытъя, веросъёссэ туж чебер кылын гожтэ, геройёссэ яркыт возьматэ, шӧдӥське пичиослэсь психологизэс ӟеч валамез но ачиз шоры серем пыр учкемез. Ашальчи Окилэн произведениосыз пальпотто но мур малпаськыто, малы ке шуоно отын удмурт калыклэн улэм-вылэмез адӟиське.

Филология наукаосъя кандидат, литературая критик Вера Пантелеева верамъя, таӵе книга потыны кулэ ни вал ог 30-40 ар талэсь азьло.

— Удмурт кун университетысь ӟуч филология факультетысь студентъёсты удмурт литератураен тодматыкум, вералляй, макем паймымон но тунсыко кылбурчи вал Ашальчи Оки. Соос пумитам шуо: сокем ушъяськоды но, мар сыӵе начар сборникъёсыз? Табере та книгаез мон студентъёслы дэмланы быгато возьдаськытэк. Со сочинениосты люкан выллем. Книга дуно луэ ӟеч туспуктэмъёсын, ӟуч но удмурт кылбуръёсын но веросъёсын. Тодэ ваёнъёсты лыдӟыса, та адямиез мургес тодӥ. Мае кылбуръёсыз уг шараяло, улонысьтыз учыръёс сое возьмато. Школаын но вузъёсын дышетскисьёслы сяна, та книга туж кулэ луоз Ашальчи Окилэн ӟучомыны вуэм ӵыжы-выжыосызлы. Пусйыны кулэ Лидия Нянькинаез, со, вань быгатонлыксэ огазеяса, берыктэм Окилэсь произведениоссэ, ӟуч текстъёс туж усто пӧрмиллям. Мон та книгаез чебер суредэз кадь учки, чебер кырӟанэз кадь кылзӥ, — шуэ Вера Григорьевна.

Книгаен тодматскон туж шуныт мылкыдын ортчиз. Алнашысь «Вуюись» ансамбль быдэстӥз удмурт кылбурчилэсь кырӟанъёссэ, нылпиос лыдӟизы кылбуръёссэ. Байтэрек культура юртысь усточиос А. Окилэн «Культпоход» веросэзъя сценка возьматӥзы. Ӵыжы-выжыез сярысь тодэ ваёнъёссэ вераз Владимир Векшин, УдГУ-ын ужасьёслэн профсоюзэнызы кивалтӥсьлэн воштӥсез.

— Мынам анае — Ашальчи Окилэн бадӟым агаезлэн, Николай Григорьевичлэн, нылыз. Кусыпъёсмы матын вал, ми улӥмы Варзи-Ятчиын, Лина апаймы — Алнашын. Со мыным пересь но висись йӧтылӥз. Но арлыдыз шоры учкытэк, туж етӥз, визьмо вал. Кузпалэныз туж трос лыдӟиськизы. Кыксы ик ушъязы но лыдӟыны дэмлазы Лев Оваловлэсь «Медная пуговица» романзэ. Классикъёс пӧлысь тужгес но гажаз Антон Чеховез но Сергей Есенинэз. Яратоно кырӟанэз вал Александра Пахмутовалэн но Николай Добронравовлэн «Забота у нас простая» нимаськисез. Мыным паймымон потэ вал солэн трос но ӵем кыскемез. Врачъёс ӧз лэзьылэ пурккетыны, тазалыкез укыр лябӟем бере гинэ Лина апай куштӥськиз урод сямызлэсь. Синпельлы кылизы Лина апайлэн кузьмам кунгожсьӧр кылъёсъя словарез но войнаысь ваем Цейсовской биноклез. Жаляса верано, та кузьымез ышиз. Сиён пӧзьтыны Лина апай туж ик уг быгаты вал, но солэн туж бадӟым пӧраськон книгаез вал. Отысь учкыса, со туж ческыт торт пыжылӥз, сыӵезэ мынам нокинлэсь но сиеме ӧй вал. Мон шумпотӥсько, Алнашын солэсь нимзэ утё шуыса. Асме но тӥледыз ӟечкыласько таӵе книга потэмен. Нылпиосылы  одно ик сое ысто, мед тодозы но данъяськозы, кыӵе паймымон ӵыжы-выжымы милям вал, — шуиз Владимир Векшин.

Книга зэмен но туж тунсыко пӧрмемын. Сое лыдӟыса, Лина Григорьевна Векшина выль сямен усьтӥське. Кин ке паймоз солэн ужамезлы, мукетыз чидамезлы. Мон азьын но усьтӥськиз воксё мукет Ашальчи Оки. Со кылбуръёсаз кадь возьдаськись ӧвӧл, туж дӥсьтӥсь, юн сямо но чылкыт сюлэмо. Мон татчыозь уг тодӥськы вал, Ашальчи Оки гожъяськем Англиысь писателен, «Овод» романлэн автореныз Этель Лилиан Войничен но венгер писателен Мате Залкаен. Вань со гожтэтъёсты но туспуктэмъёсты 1935-тӥ-1936-тӥ аръёсы обыск дыръя талаллям. Уг тодӥськы вал, Ашальчи Оки Казаньысь «Медприбор» заводысь кык слесарьёсты операцилы тупась инструментъёс лэсьтыны курем шуыса. Уг тодӥськы вал, Оки Сергей Есенинэз ватыны ветлэмын шуыса. Книгалэсь берпуметӥ бамзэ ворсатозь, сыӵе «уг тодӥськы вылэмъёс» туж трос люкасько. Мукетъёсыз но та книгаез лыдӟыса, тодозы, кыӵе вылэм Лина Григорьевна улонын, уж дураз, войнаын, пытсэт сьӧрын но семьяяз. Солэн веросъёсыз но кылбуръёсыз сокем трос ӧвӧл, ӵок, ужпум лыдпус бордын ӧвӧл ук. Ашальчи Окилэн бурчин чуръёсыз дауръёсын уз вунэ. Озьыен, Гердлэн кылъёсыз зэмалозы:

Лымы туж ӝог шуна, быре —

Уз кыс, уз быр кылбуръёсмы.

Гожтэм чебер книгаосмес

Калык выльысь кутса лыдӟоз…

Галина Семёнова.

Туспуктӥз Владимир Беломорских.

Удмурт Дунне
By Удмурт Дунне Ноябрь 11, 2011 13:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<