Сцена вылын шудоно ӧвӧл…

Удмурт Дунне
By Удмурт Дунне 29 ноября, 2011 10:11

Сцена вылын шудоно ӧвӧл…

Чабья - Е. Сунцова (паллянысез).

Елена Сунцова — Удмурт Республикаысь дано артистка. Со театрын ужа гинэ шуимы ке, янгышалом. Малы ке шуоно актриса отын улэ, шока.

Ижысь культурая училищеын дышетскыкуз ик, Лена шӧдӥз ини: со тросгес саклык висъя сцена вылын ассэ возёнлы, чебер вераськонлы. Пӧртэм быгатонлыкъёсызлы но шаплы сямызлы дышетӥсьёсыз но паймылӥзы. Со эктыны-кырӟаны чупрес, нош кыӵе быгатыса кылбуръёсты лыдӟылӥз! Соин Сунцова Ленаез бырйизы училищеысь «Зангари» ансамбльлэсь концертъёссэ нуисе. Ассэ сцена вылын улонын кадь — куалекъятэк но кышкатэк — возьылӥз. Отысен ик солэн шӧдӥськиз ини сцена вылын шудон мылкыдыз.

Ма, артист луон сярысь Лена пичи дырысеныз ик малпалляз вал. Мемеезлэсь удмурт но ӟуч  кырӟанъёссэ пеляз понылӥз. Собере, соосты ас понназ нёжъяса, ветлылӥз. Школаын одӥг ужрад но Сунцоватэк ӧз ортчылы. Со ик кырӟась но, верась но, эктӥсь но, огкылын вераса, калыкез шулдыртӥсь.

Яр ёросысь Биграгуртысь школаез йылпумъямез бере Леналэн Ленинградысь театральной институтэ пырыны мылкыдыз ӝутӥськиз. Нырысетӥ турзэ капчиен ортчиз. Кыкетӥяз валаз: солы институтэ шедьыны секыт йӧтоз. Малы ке шуоно ваньмыз сямен абитуриентъёс театральной училищеез йылпумъямын. Озьы Лена берен вуиз Удмурт шаере, дышетскыны Ижысь культурая училищее пыриз. Сое йылпумъякуз, газетысь ялон шедьтӥз: Удмурт театр Москваысь театральной институтэ национальной студие егитъёсты дышетскыны келя. Лена, аслаз быгатонлыкъёсызлы оскыса, соку ик театре шонтӥз. Экзаменъёссэ туж умой сётъяз. Озьы мукет удмурт егитъёсын ӵош Сунцовалы шуд усиз ГИТИС-ын дышетскыны. Удмуртиысь лыктэм егитъёслэн курсэнызы кивалтӥз Ирина Ильинична Судакова. Со Станиславскийлэн школаезъя дышетӥз: сцена вылын шудоно ӧвӧл, отын улоно. Та кылъёс Леналэн йыраз-сюлмаз весяклы пыӵаса кылизы.

Ньыль ар туж ӝог ортчиз. 1989-тӥ ар ГИТИС-ын дышетскем нылъёслы но пиослы вунонтэм кылёз — соос Удмурт театрлэн сцена вылаз вуизы. Дышетскем егитъёсты театрын чидатэк витё ни вылэм. Соос угось дор палъёсазы бадӟым осконэн, капчи мылкыдын но трос выль малпанъёсын вуизы. Егитъёс Москваысь дышетӥсьёсынызы ӵош С. Найденовлэсь «Дети Ванюшина» спектакльзэ дасяллям. Лена отын кузёлэсь племянницазэ шудэ. Со быдэсак ролез пушкы вые. Быгатыса но мур возьматэ героиняезлэсь сям-выросъёссэ: лушкем, ӵыжы-выжыосызлы пыриськыса улыны быгатӥсь нылашез. Озьы ик Елена Сунцова чебер но жингрес куараеныз лирической героиняосты быгатыса усьтэ. Д. Чаклэн «Вместе в одиночестве» пьесаяз со шудэ Любашаез.

— Мон, та ролез шудыса, бурдъяськылӥ. Со мыным котыр ласянь матын. Та роле пичи гинэ ке но вал, со мынам улонам бадӟым пытьы кельтӥз, — тодаз вае актриса.

К. Гольдонилэн «Слуга двух господ» комедияз со — ненег но яратӥсь Клариче. Удмурт классиклэсь М. Петровлэсь Италмассэ со сокем быгатыса шудэ, учкисез сюлэмшугъяськытӥсь малпаськонэ уськытэ. «Айна» крезьгуро драмаын (авторъёсыз Т. Чернова но В. Ушаков, крезьгурзэ гожтӥз Н. Шабалин) шаплы, задор, яратыны быгатӥсь, гажанэныз куштэм Идаез возьматэ. А. Островскийлэн «Гроза» драмаяз усьтыны быгатэ чурыт сямо, нокинэн вормыны луонтэм Варвараез. П. Соллогублэн «Беда от нежного сердца» водевиляз Сунцова Петербургысь мещанкаез шудэ. Д. Мамин-Сибиряклэн «На золотом дне» спектакляз заводской посёлокысь зарни поттӥсьёслэсь улэм-вылэмзэс возьматэ. Отын улӥсь адямиос алдасько, ог-огзэс вузало, шонер но яратыса улон сярысь уг малпасько. Сунцова татын шудэ купецлэсь чебер нылзэ. Со чебер гинэ ӧвӧл: визьмо, ассэ ачиз яратӥсь но лек. Алдаськемез, узырмыны турттон сямыз бырон калозь вуттэ.

Елена Алексеевна лыдъянтэм трос рольёсты шудӥз ини. Солэн котькуд ролез аслаз творчествояз гинэ ӧвӧл, театрлэн улоназ бадӟым инты басьтэ. Ваньмызлы синмаськымон луэ. Г. Романовалэн но А. Сергеевлэн «Шунды-мумы» пьесаысьтызы Чабья. Егит анай, кудӥзлэсь кыкто пиоссэ таласа ожмаськыны нуо, вань улытозяз сюлмаське пиосыз но удмурт калыкез понна. Секыт вал адӟыны шудо анайлэсь пурысьтам кышномуртлы пӧрмемзэ. Актриса та образэз быгатыса но туж мур шудӥз, усьтыны быгатӥз.

Асьме городын нылпиос понна Мунё театр вань ке но, Удмурт театрысь артистъёс арысь аре покчи учкисьёссы понна нимысьтыз спектакльёс дасяло. Выжыкылъёс бордын вань артистъёс мыло-кыдо ужало. Таӵе дыръя артистлэн быгатонлыкез эшшо но мургес усьтӥське. Елена Сунцова туж трос выжыкылъёсын шудӥз. Солэн вань геройёсыз пичи учкись понна яркытэсь, лякытэсь но яратымонэсь луо. «Маринушка и Леший» спектакльысь — Маринушка, «Принцесса-Невидимкаысь» — Принцесса, «Все мыши любят сыр» спектакльысь — лякыт но мусо шырпи Фружи.

— Рольёс бордын ужакум, уката ик репетициосын, мар ке выльзэ, тодымтэзэ шедьтӥсько ке, мон понна солэсь бадӟым шуд ӧвӧл ни, — шуэ Елена Алексеевна. — Куд-ог дыръя репетициосын шуг-секытъёс пумиськыло, я режиссёрен одӥг кылэ уд вуиськы, я ӵектэм-сётэм рользы сюлэмъя уг тупа, сыӵе дыръя ини мон рольёсы бордын ачим ужаны тыршисько.

Елена Алексеевна быръем удысаз, сюлэмзэ но мылкыдзэ поныса, тырше. Со рользэ ӟечгес шудон сярысь гинэ уг малпаськы, пьеса театре мед выжыяськоз, учкисез котыраз мед люкалоз шуыса сюлмаське.

Анна Евсеева.

Удмурт Дунне
By Удмурт Дунне 29 ноября, 2011 10:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<