Процент лэсьтэ котькудӧз!

Удмурт Дунне
By Удмурт Дунне 16 ноября, 2011 10:24

Малы егитъёс мылкыдтэк мыно быръёнъёсы? Та юанлы валэктон утчало социологъёс но, ЦИК-ысь специалистъёс но. 18 арессэс тырмытэмъёсты куаразэс сётыны ӧтёнэн вазисько вылӥ кивалтӥсьёс но. Нош егитъёс, валче кариськыса, быръёнъя участоке вамыштыны уг дырто. Со понна — пумтэм трос та пумысен мылкыдзэс гожъяло но ӵашето социальной сетьёсын. 

Тани 4 ар талэсь азьло Кун Думае быръёнъёсы Удмуртиысь  егитъёс шоро-куспогес пыриськизы.

— 30 аресозь нылъёс но пиос пӧлысь куаразэ сётӥз 46,7 процентэз, — вера республикаысьтымы Быръёнъёсъя валтӥсь комиссилэн секретарез Георгий Пчельников. — Нош муниципал быръёнъёсы уката мылкыдтэк мыно. Тани миым Ижысь егитъёс пӧлысь 25,5 процентэз гинэ куаразэс сётӥзы. Оскиськом, вуоно быръёнъёсы нылъёс но пиос ӟечгес мылкыдын вамыштозы.

Егитъёсты вырӟытон борды кутскизы Кизнер ёросын. Татын толэзь талэсь азьло ялӥзы ни «Мон — бырйись» конкурс. Отчы сочинение гожтыса ыстоно. Ужзэс келяны быгато 9-тӥ-11-тӥ классъёсын дышетскисьёс но, 25 аресозь ужась егитъёс но. Но таӵе «вашкала» амал емышъёссэ уггес сёты. «Ровесник» центрысь методист Юлия Монмахова верамъя, конкурсэ ыстэмын 2 сочинение гинэ. Кин тодэ, оло 30-тӥ ноябрёзь кӧня ке ужъёс вуозы ик на. Озьыен, егитъёсты уд гочаты кузьымен но, устозэ сочинениез райгазетын поттыны сӥзёнэн но.

Быръёнъёсын вормисьёс азьло ик тодмо — таӵе кунэрес мылкыдзэс форумъёсын верало егитъёс. Талы мон уг оскиськы. Соин В. Путинлэн верамез кельше. «Рядовой гражданин понна вань, мае бырйыны» шуэ со. Уго вуоно быръёнъёслэн процентъёсын лыдпуссы тодмо ӧвӧл.

Путин оскытэ: Россиысь политикаын шуак воштӥськонъёс уз луэ. Но со вакытэ ик «Огъя Россия» партилэн лидеръёсыз огинтыязы кема уз пуке. Кин тодэ, оло Россиысь калык фронтэ пырисьёс пӧлысь ик потозы мукет азьветлӥсьёс.

Тани толон гинэ Путин ортчытӥз Россиысь гурт интеллигенцилэсь форумзэ. Районъёсы мынӥсь егит специалистъёслы саклык одно ик луоз. Со пумысен Путин вераз ни вал партилэн съездаз но. Районэ выжись егит врачъёслы 1 миллион манет тыр юрттэт чакламын. Нош гуртысь дышетӥсьёслы — 8-8,5 процентэн ипотека.

Мон врач но, дышетӥсь но ӧвӧл. Озьы ке но куарае жаль уг поты. Бырйыны мыно одно ик.

Бырйиськись Олён

Удмурт Дунне
By Удмурт Дунне 16 ноября, 2011 10:24