Нунызэ мед утялтоз анай

Удмурт Дунне
By Удмурт Дунне 15 ноября, 2011 10:14

Кылем арня вискын Дышетонъя но наукая министерство коллегия люкалляз. Сӥземын вал со школа азьын визьнодан ужпумлы, нылпи садъёслэн тырмымтэзылы. Та юанъёсты сэрттыны-пертчыны ӧтемын вал Правительстволэн Тӧроезлэн воштӥсез Л. Чунаева, Кун Кенешлэн Тӧроезлэн воштӥсез С. Кривилёва, Кун Кенешысь Дышетонъя, наукая, культурая но егитъёсын ужанъя ялан ужась комиссилэн тӧроез Н. Сударикова, дышетонъя но наукая министр А. Кузнецов но мукетъёсыз.

Вить ар талэсь азьло республикаысьтымы нылпи садъёсын 76 сюрс 13 инты вал. 2010-тӥ арын луиз 82 сюрс 969. Озьыен, интыос арысь аре йыло. Котьма ке но туэ октябрь толэзе нылпи садэ черодэ султэмъёслэн лыдзы 22 сюрс. Та куинь аресозь пиналъёс. 1 арес но ӝыныозь черодэ султэмъёс 17 сюрс. Таӵе лыдпусъёсты шараяз дышетонъя но наукая министрлэн воштӥсез И. Белозёров. Со ик йылтӥз:

— Тупатъямез-выльдэмез кулэ карись нылпи садъёс республикаямы вань. Кылсярысь, 1 процентаз садъёсын канализация радъямтэ. 1,6 процентаз лэсьтэмын ӧвӧл ву сётон, 4 процентаз — шуныт сётон. Сыӵеос тросгес Алнаш, Шаркан, Балезино, Кез ёросъёсын.

Юон ву умой ик ӧвӧл Шаркан, Кияса, Камбарка, Можга ёросъёсын.

Ярано коть, пумен йыло нылпиослы юрттэт сётонъя кабинетъёс. Кылсярысь, визьнодан удысын ужа 608 медпункт, 6 эмъянъя но мугорез кыдатонъя зал, 2 пинь йӧнатонъя кабинет. Ляб тазалыко пиналъёсмы но тырмыт. Республикаямы 1 сюрс 686 пинал (128 группа) вераськыны шугъяське. 521-лэн ляб адӟе, 56-ез йырвизьмызъя бере кыле, 147-лэн лулсэрыз сӧриськемын. 18 муниципал кылдытэтын воксё но радъямын ӧвӧл таӵе сӧсыръёсты дышетон.

Удмурт кун университетысь психологияя, педагогикая но социальной технологияя институтлэн директорезлэн воштӥсез, психология наукаосъя кандидат А. Сунцова верамъя, ляб пиналъёс бордын ужась специалистъёсмы умоесь. Кылсярысь, ӟеч ласянь висъяське Ижысь 218 номеро нылпи сад. Пиналъёслэсь ас шӧдонзэс но будэтыны пӧрмыто. Но школаослы пиртэш пиналъёс мултэсэсь. Шуом, сонгро эке я дыды пичиысен дышизы пелязы пыртэм имплантантэн ужаны, куараосты кылыны, вераськемез валаны. Нош соосты куто коррекционной классэ гинэ. Малы соку 2 миллион тыр имплантант пуктоно вал?

* * *

Город администрациысь нылпиосты школалэсь азьло визьноданъя управленилэн кивалтӥсез Надежда Варламова ивортэмъя, доразы пукись 1 но ӝыны — 3 аресъем пиналъёс Ижын туннэ 7 сюрс 649.

— Туэ 9 толэзь ӵоже городын вордӥськиз 1 сюрс 330 пинал. Озьыен, матысь куинь ар ӵоже черодэз быдтэммы узгес луы, — шуиз со. — Зэм, ми ужаськомы частной нылпи садъёс усьтон бордын, адямиосты ӝуткаськомы. Туннэ 15 сыӵе сад вань ни. Но анай-атайёс нылпиоссэс отчы сётыны уггес дырто. Дуныз куртчылӥське — 6 сюрс манетысен 12 сюрсозь толэзьлы быдэ куро. Соин ик группае 7-8 пинал сяна уг ветлы.

Со дыре ик Глазовын черодзы ӧвӧл. Но анай-атайёс сюлмасько ни 1 аресысен 1 но ӝыны аресозь вуэм нылпиоссы сярысь. Декрет отпускын пукемзы потытэк, дыдыоссэс но экеоссэс садэ сётэмзы потэ ни. Туннэ сыӵеос 136 кузя. Кунлэн луисьтэм садэ мынэмзы уг поты — дуно.

 * * *

Ваньзэ тае кылыса, А. Кузнецов меӵак шуиз: выль сад пуктонлы гинэ оскиськыны уг яра! Черодэз пытсан понна соос туж трос кулэ, нош сомында уксё ӧвӧл. Соин ик мукет амалъёс утчано.

Н. Сударикова люкаськемъёслы вазиськиз: куд-ог школаос буш уло, соин ик классъёсты садлы сётоно, нош нылпиосты кык сменаен визьнодано.

Зуркатэм мылкыдэз капчиятыны выриз С. Кривилёва:

— Удмуртия Москвае вазиськиз, анайёс декрет отпускын, ӟеч пособие басьтыса, 3 аресозь пукыны мед быгатозы шуыса. Нуныез солэсь ӟеч нокин но уз утялты. Республикамылы 64 улос дурбасьтӥз. Оскисько: милемыз кылозы.

Елена Фёдорова.

Удмурт Дунне
By Удмурт Дунне 15 ноября, 2011 10:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<