Муртлы быдэ — одӥг куара!

Удмурт Дунне
By Удмурт Дунне 25 ноября, 2011 12:36

Быгатӥсько-а мон бюллетеньме воштыны, отчы янгышаса мыдлань пус пуктыны шедьтӥ ке?

Бюллетеньдэс воштыны курыса, вазиськоно комиссилы. Изъянтэм кагаз вылэ гожтӥськыны кулэ комиссилэн кивалтӥсез но секретарез, со бӧрсьы бюллетенез быдтыны, со интые тӥледлы выльзэ сётыны кулэ.

 

Алигес фамилиме воштӥ. Быгато-а куараме сётыны, списокын мон вуж фамилиеным пусъемын ке?

Тӥляд вань луонлыкты списокъёсын азьло ик тодматскыны. Тӥ сярысь гожтэмысь янгышсэ шедьтӥды ке, комиссие  заявлениен вазиське. Участокысь комиссия, сое эскерыса, янгышез тупатыны яке курондэс палэнтыны кулэ (мугез гожтэмын луыны кулэ бумага вылын).

 

Кузпалы больницаын кылле. Быгатӥсько-а мон солэн паспортэныз ачиз понна  куара сётыны?

Уд быгатӥське. Котькуд бырйись куаразэ сётыны ачиз гинэ быгатэ. Быръён нуналъёсы больницаосын ужало комиссиос, соин  кузпалды ачиз куаразэ сётыны быгатоз.

 

Туж ӵем кылоно луэ куараосты лыдъяку, пӧяськон учыръёс сярысь…

Законъя куара лыдъяку, участокын тырмыт эскерисьёс луыны быгато: быръёнъя вылӥгес комиссиосысь ужасьёс, политической партилэн дэмлам адямиез, депутатэ кандидат, журналистъёс, чакласьёс (наблюдательёс). Куараосты шонер лыдъямез эскерон вылысь аслэсьтыз адямизэ ыстыны быгатэ быръёнэ пыриськись котькудӥз партия. Со сяна, мылкыд каремезъя оскем мурт ачиз но куара лыдъянэ пыриськыны быгатэ.

Дасямын

Удмурт Республикаысь

Быръёнъёсъя валтӥсь комиссия юрттэмъя.

Удмурт Дунне
By Удмурт Дунне 25 ноября, 2011 12:36