Милям майормы

Удмурт Дунне
By Удмурт Дунне 21 ноября, 2011 16:16

Милям майормы

В. Байгузин.

Полицилэсь ужамзэ огшоры улӥсь дунъя аслаз районысьтыз участковой пыр.  Участковой сюлмаськытӥсь юанлы валэктон шедьтэ ке, шуг-секыт учырез сэрттыны быгатэ ке, озьыен, со усто специалист. Законэз тӥян кыӵе гинэ учыр уг тупа — ваньмыз со пыр потэ. Уго районаз улӥсьёсты солэсь ӟеч тодӥсь мурт ӧвӧл ни. 

Туэ октябрьлэн кутсконаз Ижысь огаз бадӟым юртын авария луиз. Нырысетӥ этаже кӧня ке час ӵоже жальыр вияз пӧсь ву. Ӵап татын интыяськемын офисъёс. Ярам, шутэтскон нуналъёс тупазы. Офисъёсын сигнализация жиетэ. Вуизы коммунальной юрттэт сётон удысын ужасьёс. Ваньмыз валатскизы ни — ву бызе кыкетӥ этаже интыяськем квартираысь. Солэн ӧсаз дыбыр йыгасько — пумитазы потӥсь ӧвӧл. Квартирае пырыны нокин уг быгаты, бускельёс но кузёез сярысь номыр вераны уг тодо. Коммунальной удысын ужасьёс йырзэс тӥяса мултэс ӧз улэ ни — ву сётӥсь огъя гумыез кысӥзы. Озьы быдэс подъезд — 20 квартира — вутэк кылиз. Не пӧсез, не кезьытэз уг лыкты. Уд но пыласькы, сиён но уд пӧра. Таӵе югдурын нокыӵе лулсэръёс уз тырме. Нош ЖКХ удысын тыршисьёслы дунне — ву уг бызьы, иське, шугъяськон но ӧвӧл.

Югдурез валаны луысал, ӵогам квартиралэн ӧсэз усьтӥськысал ке. Нош отын — кизьнэм куара но уг кылӥськы. Коммунальной удысын ужасьёс киоссэс гинэ вӧлъяло — мурт корка пырыны ум быгатӥське. РОВД-е вазиськыса но, буйгатӥсь ӧз луы — ӧсэз усьтон понна, пе, судлэн постановлениез кулэ. Озьы ке но полиция та учыре ыстӥз участковоез. Визьмо но рос-прос мурт лыктӥз — майор Байгузин, пе.

Владислав Борисович валэктӥз: зэм, но, полициын ужасьёс ӧсэз тӥяны уг быгато. Но таӵе сюлмаськытӥсь югдур дыръя сыӵе правоез вань юрт понна кыл кутӥсь управляющей компанилэн. Озьы ужзэ тодӥсь мурт вакчи дыр куспын шугъяськонэз сэрттӥз. Квартиралэсь ӧссэ усьтӥзы. Учыр огшоры вылымтэ. Патерын — адями шӧй. Огназ улӥсь воргорон ваннояз пыласькыны пырем. Но гылӟыса усем, йырберыныз шуккиськем. Нош усьтэм кранысь пӧсь ву бызе но бызе…

— Таӵе валантэм но секыт учыръёс нуналмысь уг луо, — вера Октябрь ёросысь участковой Байгузин. — Ӵемгес — лушкаськон, семьяын даллашон-жугиськонъёс.

Можга районысь Тутайгуртын вордскем Владислав Байгузин пичи дыръяз ик синмаськылӥз милиционерлэн ужезлы. Но дышетскыны мынӥз мукет ӧръя — Ижысь гурт удысъя академилэн инженерной факультетаз. Озьы ке но профессия быръён вакытаз сюресэз шӧдтэк шорысь кожиз югдурез утён удысэ. Байгузин участковойлэсь ужзэ бырйиз.

1998-тӥ ар, дефолт. Тросэз калык, уждун басьтытэк, веказ. Милицилэн но йыр висёнэз бадӟым вал — лушкаськонъёс, мурт квартираосты бушатонъёс. Котькуд учыръя йылзэ-пумзэ утчано участковойлы. Тодоно колониысь потэм котькуд муртэ, мар со ужа, кыӵе коньдонэн улэ-вылэ. Уж висказ Владислав Борисович нош ик дышетскон сярысь сюлмаськиз — таяз радэ юридической тодон-валан басьтӥз на.

Вакыт воштӥськиз. Табере йыртэманъёс но арысь аре ӧжытгес луо. Озьы ке но участковой доры сюрес котьку лёгемын. Лыкто арлыдоос, ӝожтӥсько юыса улӥсь нылпиоссы вылэ. Жаль, югдурез Байгузин гинэ тупатыны уз быгаты. Тордос муртэ али кужмысь эмъяны уг луы. Озьы ке но мӧйыослы ӵемгес кулэ кылзӥсь мурт, соку куректонзы но пичияк басыла.

Участковой аслаз пунктаз 10 часысен 20 часозь ужа шуыса гожтэмын. Но улонын со дыръёсты чакласа гинэ уд улы. Ӵукна ик Байгузин дыртэ районысьтыз мукет участковойёсын ӵош кенешонэ, собере аслаз пунктаз вамыштэ. Ужан нуналэз бер ӝыт сяна уг йылпумъяськы. Владислав Борисович дораз пӧсь шыд сиыны но кӧлыны гинэ вуэ на. Пизэ но, нылзэ но визьман-эркиян тросгес усе кышноез вылэ.

Пусйымон соиз но: Байгузин визьма али гинэ ужаны кутскись участковойёсты. Дораз 5 мурт дышетскиз ни, табере котькудзы асьсэ участокъёсазы ужзэс радъяло.

Полициын реформа радъяськем бере Владислав Борисович капчиен ортчиз аттестациез. Соин оске, вылӥ кивалтӥсьёслэн ӟеч сӥзёнъёссы вуоно арын одно ик шӧдӥськозы ни. Кин тодэ, оло соку участковойлы аслаз ужан районаз висъялозы улон сэрег но. Али Байгузинъёс мурт квартиралы уксё кисьтоно луо.

Майор Байгузин трос пол дунъяллямын таукарон гожтэтъёсын, Удмуртиысь МВД-лэн Данъян грамотаеныз. Озьы ке но ужзэ яратӥсь мурт понна уката дуно потэ мукетыз — урамын адямиос ӟечъясько ке, гажаса «милям участковоймы» шуо ке.

Алёна Ионина.

Удмурт Дунне
By Удмурт Дунне 21 ноября, 2011 16:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<