Ма со иссфранкрипто?

Удмурт Дунне
By Удмурт Дунне 8 ноября, 2011 10:38

Ма со иссфранкрипто?

Конкурсэ пыриськемъёс. Шорысез - Н. Ермокина.

Куинетӥзэ ортчиз Удмуртиын «Анай кылъя устоез дышетӥсь» конкурс. Со радъяськиз Ижысь Кузебай Герд нимо гимназиын. Вожвылъяськизы 6 ёросысь дышетӥсьёс.

— Россиын конкурс туэ 5-тӥ ползэ ортчоз ни. Асьме дышетӥсьёс отчы мыло-кыдо пырисько. Тани Светлана Ильина, Татьяна Юмина, Лариса Булдакова, Валентина Широбокова, Людмила Музиянова быгатыса утизы удмурт дышетӥсьёслэсь данзэс. Нацпроектъя ялэм вожвылъяськонэ удмурт кылъя но литературая дышетӥсьёс соку ик трос ӧз пыриське, но ужъёссэс пумен мыло-кыдогес ысъяны кутскизы. Кин тодэ, оло, «Арлэн дышетӥсез» конкурсэ но Удмуртилэсь данзэ утьыны мыноз ай анай кылэз азинтӥсь педагог,  — вераз дышетонъя но наукая министрлэн воштӥсез Зоя Суворова.

Дышетӥсьёс пӧртэм интыосысь вуизы. Татьяна Васютова — Дэри ёросысь Совхозной школаысь, Нина Ермокина — Пичи Пурга районысь Шор Кечолысь, Людмила Решетникова — Сьӧлта районысь Гопгуртысь, Ольга Семёнова — Глаз ёросысь Кечпигуртысь, Олег Чувашов — Можга районысь Пазялысь. Нырысьсэ удмурт кылъя дышетӥсьёсын артэ ужаны быгатэмзэ возьматӥз пор кылъя визьнодась Любовь Осипова — со вуиз Каракулино районысь Быргында гуртысь.

Жюрие быръемын 13 мурт — дышетонъя но наукая министрлэн воштӥсез З. Суворова, Удмурт кун университетысь удмурт филология факультетлэн деканэз Л. Фёдорова, Глаз пединститутысь кафедралэн кивалтӥсез Т. Волкова, К. Герд нимо гимназилэн директорез А. Михеева но мукетъёс. Соос пӧлын одӥг воргорон — Дышетӥсьёслэсь тодон-валанзэс будэтонъя институтысь кафедралэн кивалтӥсез А. Клементьев.

 

Котькуд конкурслэн кутсконэз — тодматскон. Сцена вылэ потэ Дэри ёросысь Татьяна Васютова. Егит дышетӥсь ас удысаз кема уг ужа ай — Удмурт кун университетэз йылпумъяса, вуиз Совхозной школае. Татьяна Владимировналэн кылбуръёсын, туспуктэмъёсын но кырӟанъёсын презентациез тунсыко пӧрмем. Эх, куалекъянзэ вормыны быгатысал на ке…

Со понна мукетыз дышетӥсь Нина Ермокина шапык но ӧз куалекты.

— Мон тангыра! — вазиз Нина Анатольевна. — Тангырае дун-чылкыт удмурт кылын 38 ар ӧте ни.

Иське, сомында арзэ сӥзем педагог яратоно удысэзлы. Дышетӥсь вераз ужан амалъёссэ — мастер-классъёсыныз со поталляз Башкортостанысь но Татарстанысь анай кылъя педагогъёс доры. Печатламын методикаосыныз кӧня ке пособиез. Дышетӥсь мыло-кыдо тыршиз республикаысь терминъёсъя но шонер гожъяськонъя комиссилэн ужаз. Озьы Пичи Пурга ёросысь 81 гурт но шур нимъёсты удмурт кылэ берыктӥз Шор Кечолысь дышетӥсь. Но Нина Анатольевналэн уката бадӟым шумпотонэз но данъяськонэз — кивоштӥсьёсты будэтыны быгатэмез. Солэсь ужзэ азьланьтӥсьёс — 50 дышетӥсь. Тани конкурсэ пыриськись Людмила Решетникова но Ермокиналэн дышетскисез луэ. Нош Глаз ёросысь Ольга Семёноваез визьмаз Кечолысь педагоглэн быдэстэм дышетскисез Раиса Резенова. Озьыен, тӥни кӧня пушъетъёсты огазеяз вожвылъяськон.

Та муген ик, оло, ӧжытак куалектӥз Людмила Решетникова. Людмила Борисовна Сьӧлта районын туж чырмыт ужа, ёросысь удмурт кылъя дышетӥсьёслэн огазеяськонэнызы кивалтэ. Нош школаын кема ужаса, педагоглэн вань ни ӟеч уроклы аслаз рецептэз. Туж шер пумиськылӥсь «сиён-юонлы» кулэ книга, ручка, тетрадь, компьютер. Мултэс уз луэ талант, мылкыд. Ваньзэ огазе сураса, пӧрмоз «иссфранкрипто» ӝук — выль ужан амалъёслэсь кутсконзэс одӥг сузьетэ бичаса, таӵе выль кыл малпам педагог. Озьы Людмила Борисовна ужа турлы методикаосъя, нуналмысь ужаз туалазэ пыртэ, пиналъёслэсь мылкыдзэс ӝутэ.

«Анай кылъя устоез дышетӥсь» конкурс туэ нырысьсэ радъяськиз ӟуч кылын. Уго удмурт педагогъёсын артэ ӵошатскиз пор дышетӥсь Любовь Осипова. Удмуртъёс презентациоссэс анай кылынымы вераны быгатӥзы ке, Любовь Сергеевналы ӟуч кылэ выжоно луиз. Нялтас пусъёно на мукетсэ но. Та конкурсэ Дышетонъя но наукая министерство арлы быдэ пыриськыны куре бигер дышетӥсьёсты. Малы ке ог-огзэс валан мылкыдзы ӧз на кылды. Соин пор дышетӥсь та ласянь нырысетӥ вамыш лэсьтӥз.

Сцена вылын ассэ туж эркын шӧдӥз Ольга Семёнова. Куараез зыл-зыл. Кырӟась сяна, со артистка но, маскарчи но. Шугъяськон кылдыса но, дышетӥсь ӧз ыштӥськы. Уго азьвыл дасям презентацизэ компьютер маке муген ӝегатӥз. Нош Ольга Витальевналы номыр кадь ик ӧвӧл — мар веранзэ со сотэк но усто тодэ.

Паймытӥз ке паймытӥз воргорон — Олег Чувашов. Дышетскемезъя со — покчи классъёсты дышетӥсь, историен визьнодась. Нош вылаз ик, Олег Анатольевич удмурт кылъя но литературая урокъёсты нуэ. Огаре школаын солы оскизы физикалы но информатикалы визьманы. Таӵеезлы огшоры гинэ уд оскы — адӟыны но кылыны кулэ. Егит педагогез туж дунъязы Ижысь огаз экономикая колледжын. Нош со куинь ар талэсь азьло бертӥз вордскем гуртаз — Можга районысь Пазялэ. Вуттӥз ни нацпроектъя ялэм конкурсын премия басьтыны. Огзэ ватоссэ гинэ презентацияз ӧз шарая Олег Анатольевич. Университетэз йылпумъяса, со куинь ар дышетскиз аспирантураын, зэм, диссертацизэ утьыса ӧз на вуы.

 

Вожвылъяськонлэн радлыказ туэ пыриз выль люкет — дышетӥсьёслы юан сётъязы удмурт журналистъёс.

— Дышетонъя но наукая министр луысалды ке, кыӵе национальной школаос усьтысалды республикаын? — тунсыкъяськиз «Удмурт дуннелэн» корреспондентэз.

— Али нылпи садысен ик пиналъёс суро-пожо верасько, школаосын но югдурез уд тупаты, — Глаз палась сюлэмшугъяськонъёсты усьтэ Ольга Семёнова.

— Милям удмурт кылэз дышетыны кутско 5-тӥ классын, нош 11-тӥе вуыса, пиналъёс сое кулэ уг ни каро. Покчи классъёсын ик кутскыны кулэ, — вера Совхозной школалэсь ужпумзэ Татьяна Васютова.

— Нош мон ваньзэ тазьы ик кельтысал, ӟуч муртэ удмурт кылын юромо вераськыны уд косы. Ужаса вуисько сыӵе малпанэ: пинал дышетӥсьсэ гажаз ке, удмурт кылзэ но яратоз, — лад-лад верамезлы точка пуктэ Нина Ермокина.

— Кыӵе луонлыкъёс усьто дышетонын кутэм выль стандартъёс удмурт кылъя дышетӥсьлы? — юаз «Вордскем кылысь» журналист.

— Соос туж трос сёто. Тани туж усто луэ тренинг амалъёсты уже пыӵатон, — шуэ Ольга Семёнова.

— Синтаксислы бадӟым саклык висъясько бере, трос ужасько выль стандартъёсъя программаос кылдытон бордын. Малпасько, асьмелэн удмурт кылмы выль куронъёслэсь чик бере кылемын ӧвӧл, — шуэ Нина Ермокина.

— Шумпотонзэ сяна, сюлэмшугъяськонзэ но адӟисько, — вера Олег Чувашов. — Тани 9-тӥ классын удмурт кыллы арняяз 4 час висъямын вал, туэ кельтӥзы куинь гинэ.

 

Таӵе эскеронъёсты чакласа но, дышетӥсьёс пӧлысь тужгес устозэ висъяны ӧз дыртэ дунъясьёс. Уго удыслэн шорсюлмыз — визь-нод сётон. Соин вань оскон — мастер-класслы.

Тани висъяськиз Нина Ермокиналэн «Николай Байтеряков но Лана» урокез. Татын адӟыны луэ видеопрезентациез но, туж тунсыко дышетӥсьлэн сётэм гуртэ ужез но. Нина Анатольевналы та уроксэ радъяны юрттӥзы Пичи Пурга районысь удмурт кылъя дышетӥсьёс.

6-тӥ класслы тунсыко урок-экскурсия ортчытӥз Людмила Решетникова. Виртуальной адӟытон пыр со пиналъёсты вуттӥз «Улэм потэ» романлэн авторезлэн П. Блиновлэн вордскем но быдэсмем сюресаз.

К. Гердлэсь «Матӥ» вероссэ мур валаны юрттэ тренинг амал. Таиныз тодматӥз Ольга Семёнова. Таӵе урокын пиналъёс быгато малпанзэс вераны, йырзэс ужато. Тренингез, юанъёсын сяна, узырмытыны луэ туспуктэмъёсын, кырӟанъёсын. Валамон, таӵе занятиын  пинал мӧзмыса уз пукы, уз нырулы, малпаськиз но тыршиз ке — соку дунъет но пуктыны луоз.

Олег Чувашов нош ик паймытӥз — таяз радэ ортчиз урок-суд. Ма муген Юнеско пыртӥз удмурт кылэз дуннеысь 49 бырись кылъёс пӧлы. Та ужпумъя пиналъёсты люкыны луэ прокуроръёслы — соос янгыше уськыто. Удмурт кылэз утё адвокатъёс. Вань та вераськонъёслы приговор пукто присяжное быръемъёс. Озьыен, таиз но урок пиналъёсты вераськыны ӧте, тэк пукыны дыр уг сёты.

Дышетон амалъёсынызы тодматэм сяна, вожвылъяськонэ вуэмъёс шараязы ваньмон дырзэс ортчытэмзы сярысь но.

 

Озьы ке но котькыӵе ӵошатсконлэн но вуэ пумыз.

— Арысь аре дышетӥсьёслэн янгышъёссы уг воштӥсько, —  вера конкурсэз нуись, К. Герд нимо гимназиысь директорлэн воштӥсез Светлана Ильина. — Педагогъёс уггес валало, мар со мастер-класс. Соин кулэ, дыр, та вожвылъяськонлэсь нырысетӥ люкетсэ ёросъёсын ортчытъяны, соку дышетӥсьёс быгатысалзы янгышъёссы бордын ужаны.

— Огкадь мылкыдъёс ӧй вал, — шуэ жюрилэн ужаз пыриськем мурт, Глаз пединститутысь Татьяна Волкова. — Конкурс дыръя котькудмы дунъямы нимаз. Соин кык мурт азьпала потӥз, соосты ӵошатыны ик секыт вал.

— Туэ конкурс уката зол ортчиз, — мылкыдзэ усьтӥз Дышетонъя но наукая министерствоысь валтӥсь специалист-эксперт Надежда Ямаева. — Арысь аре тунсыкогес луо презентациос. Мӧзмытгес вал дышетӥсьёслэн ваньмон дырзылы сӥзем люкет. Туж вити паймымон мастер-классэз. Туэ тупазы ӟеч урокъёс. Озьы ке но весь тодын на Вавож районысь Людмила Музияновалэн ортчытэм дышетонэз. Туэ  со выллемзэ адӟыны ӧз кылды.

Залэ люкаськемъёс но валазы: омыр тужгес ӟырдаз Нина Ермокина но Олег Чувашов котырын. Валамон, Нина Анатольевналэн узыр но бадӟым дышетон опытэз. Олег Анатольевич паймытэ дӥсьтонэныз, шаплы но азьмынӥсь луэменыз. Озьы ке но — кин?

Пӧртэм номинациосъя дунъязы дышетӥсьёсты. Устоез мастер-класс ортчытэмен лыдъязы Олег Чувашовез. Можгаослэн мылкыдзы чусомиз. Со понна бурдъяськизы пургаос — уго вормисе потӥз Нина Ермокина.

Таиз диплом дышетӥсьлэн турлы вормонъёсыз пӧлысь эшшо огез гинэ луоз. Озьы ке но Нина Ермокиналэн синъёсыз нюромизы.

— Оскиды-а вормонлы? — юай уно сяська керттэтъёсын сылӥсь Нина Анатольевналэсь.

— Оски, — уг танӥськы удмурт кылъя устоез дышетӥсь. — Эх, али ик Москвае ӵошатскыны мынысал, вуоно арез возьмаса, чыртые кузь луоз, дыр.

Алёна Ионина.

Туспуктӥз Владимир Беломорских.

Удмурт Дунне
By Удмурт Дунне 8 ноября, 2011 10:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<