Мар сётоз ӟенеликъёслэсь куштӥськон?

Удмурт Дунне
By Удмурт Дунне 8 ноября, 2011 10:42

Мар сётоз ӟенеликъёслэсь куштӥськон?

2012-тӥ арын 1-тӥ июльысен алэмын луоз пияла ӟенеликъёсты 2 пол уже кутонлэсь. Азьвыл таосты сузяло но выльысь тырмытъяло ке вал, азьланяз пызьлы пыргытозы, ӟырдатыса выльзэ кисьтозы. Озьы, пе, калыклэсь тазалыксэ утём, посуда пыр паласькись черъёслэсь мозмытском. Та сярысь вераськизы туэ сентябрь кутсконын Волгоградын ортчем конференциын. Россиысь Правительстволэн Тӧроез Владимир Путин сыӵе ӵектонлы дурбасьтӥз. Таможенной союзлэн комиссиез аслаз техрегламентаз туэ август толэзе со пумысен тупатъянъёс но пыртӥз ни.

Кылтыр-колтыр, кылтыр-колтыр… Куазь али гинэ югыта ай, нош укно сьӧрысь кылӥське ни: жуг-жаг куян мульдаын бугыръясько, буш ӟенеликъёсты утчало. Ӝыт шулдыръяськем егитъёс бервылазы лачак кельтӥллям соосты. Я чургубиос кадь радэн-радэн сыло, я отын-татын костасько. Пӧлазы пильылэмез но вань. Вож, ӵуж, тӧдьы — мульда сузясь пыдйылчи уг бырйиськы, ваньзэ котомкаяз тыре. Дыртэ. Курда, лэся: юлтошъёсыз вуозы но сое азьпалтозы. Соку со туннэлы сиёнтэк но юонтэк кылёз.

Одӥг ӟенеликез, шуом, «Чебурашкаез», басьто 50 копейкаен, «Портвейн» дунъяське 20 копейка тыр, «Клинское» — 10. Пияла посудаед одӥг ящик тыр люкаськиз ке, басьтод 5 манет. Таӵе дунъёс ӵабыштэмын Ижысь Широкий пролкаысь, редакцимылэсь ог 150 метр кемысь гинэ, сиён-юонэн вуз каронъя магазинлэн гулбечез борды. Посуда басьтӥськом шуыса, нокыӵе ялонэз ӧвӧл ке но (Иж город администрацилэн постановлениезъя со одно луыны кулэ), калыкез татысь 6 час ӵукнаысен нуназеозь уг бырылы. Огзэ мешоксэс бушато но кыштыр мукетсэ вутто. Укно усьтӥське 7 часын  гинэ. Пыдйылчиос черодэ султо но ог-огенызы бӧтьырто. Киоссы дыгыр-р-р куалекъяло.

Тани укно но усьтӥськиз. Арлыдо кышномурт мычиськиз.

— Кӧня барыш поттыны луэ та посудаысь? — юасько.

— Уг тодӥськы, — шуэ. — Кузё вуэ, тырмытэм ящикъёсты ӝоктэ но кошке. Кытчы нуэмзэ уг докладатьты.

Нимтулзэ но, кызьы та уже сюремзэ но ӧз вера. Огзэ шараяз — нуналаз, пе, уждунэ 120-140 манет тыр люкаське. Шутэтскон нуналъёсты уг адӟылы. Озьыен, толэзяз басьтэ 4 но ӝыны сюрс манет котыр.

Иж город администрацилэсь постановленизэ тодэ ваёно ке, Ижын гинэ пияла посуда бичанъя сэрегъёс 2008-тӥ арын ай вал 55. Тужгес трос соос усьтэмын Первомай ёросын — 17, Устиновын — 14, Индустриальнойын — 11. Озьыен, вамышлы быдэ. Ма, нёшто сомында ӟенелик люкаське?!

 

Кыӵе но киос уг кырмало посудаез, кыӵе но ымъёс уг юо дурысьтыз! Сое ик выльысь басьто, заводъёсы нуо, мисько но тырмытъяло. Нош макем чылкыт сузяло?

Сое котькызьы миськы, но рос-прос кошкытыны нокызьы уд пӧрмыты, оскытэ Эгра ёросысь пияла посуда поттонъя «Факел» заводысь валтӥсь инженер Константин Родионов. Со ик йылтэ:

— Ми шум гинэ потӥмы, ӟенеликез кыкетӥзэ уже кутыны уз яра ни шуыса. Зэм, куанэммылэн музон мугез но вань: тросгес посуда поттомы. Со сяна, пияла пыргытон машинае уногес ӟенеликъёс шедёзы ни. Озьыен, тросгес вуж пиялаез посуда кисьтонын кутыны луоз. Туннэ со 20 процент гинэ кутӥське, 80 процентэз — шихта (луоен, содаен, мелэн суро маке). Берлозэ вуттӥськомы Ульяновск палась. Ужаны кутскеммы бере, 19-тӥ даурын, асьме палась ик сое поттылӥмы, нош сульфатъёсты нуллӥмы Вятка губерниысь заводысь. Луомы асьмелэн али но вань. Но со кырсь. Пиялалэсь арбериос лэсьтон понна кулэ нимысьтыз чылкытатэм луо. Со понна нимысьтыз завод пуктоно. Соин ик Ульяновске ветлӥськомы. Таин сэрен ик сӧриськем пияла бичаны куддыр дунтэмгес усе. Сое утчаса, кытчы но ум вуиське. Посудамы пеймыт-вож мед пӧрмоз шуыса, шлак будэтӥськом, нап-ӵуж карон понна — марганцовка. 1990-тӥ арысен тросгес поттыны кутскимы кабак виналы но коньяклы мынӥсь ӟенелик.

Ярам, али тросэз вуж укнооссэс вошъяны кутскизы пластиклы. Ӵапак со укноосты ик дорамы кутӥськомы. 1 тонназэ 1 но ӝыны сюрс манетозь дунъяськомы. Дунлэн быдӟалаез потэ посудалэн чылкытлыкез бордысь. Чебергес миськемын ке, тросгес копейка сётӥськомы.

 

Пияла посудаез трос пол кутонлы дурбасьтэ химия наукаосъя доктор Вадим Петров:

— Посудаосты рос-прос ӧй кошкытысалзы ке, шуом, отчы лэзьям сур кык-куинь нуналскын чырсасал. Озьыен, кырсь ӟенеликлэсь куштӥськысалзы ни кемалась. Нош сое 30-35 процентаз учырын лэзьяло вуж посудаосы ик.

Мар бен ваньмыз та сярысь малпа биология наукаосъя доктор Виктор Туганаев?

— Одӥг бутылкаез миськонлы ӧжытгес электроэнергия кошке, сое пыргытыса выльысь кисьтонлы сярысь. Озьыен, омыре кырсь но ӧжытгес потэ. Тазэ вунэтыны уг яра. 2007-тӥ арын лыдъяллям: Россиысь 88 интыын кылле кварц луо.  Тужгес трос со Сибирь палан. Но татысез уже ӧжыт кутӥське — дорозяз киос ӧз сузе на. Тужгес ӧжыт кварц луо Дальний Востокын но Уралын. Удмуртиын Красногорск палан пиялалы мынӥсь луо вань — 1 сюрс 137  тонна, со трос ӧвӧл. Макем чылкыт — шуг вераны. Соин ик ӟенеликъёсты трос пол уже кутэмысь дугдӥзы ке, вина дунъёс соку ик тэтчозы. Тужгес но — сур. Таид уго 30-35 процентаз учыре азьвыл кутылэм ӟенелике ик лэзьяське. Дунлэн будэмез огласянь умой но: калыкмы, оло, ичигес юыны кутскоз. Яке дунтэмгес юон вылэ выжоз меда? Но мукет ласянь, кулэ-а ӟенеликъёсын нюръяськыны? Пияла, аръёс  ӵоже музъемын кылльыса, воксё сылме, минераллы пӧрме. Пластик посудаен жугиськоно. Тазэ тани нокыӵе микробъёс уг вормо — лошъясько, быдэс дуннеез согыса. Тодосчиос али ке но уг тодо, кызьы соин нюръяськоно, — вера Виктор Туганаев.

Малпаськоно ке, шуг вераны, макем вылэ тэтчозы вина дунъёс. Пыргытэм пиялалэсь выль посуда пельтонлы трос ик кужым кулэ ӧвӧл ни уго. Со понна выль луоез бергатоно но пӧзьтоно ӧвӧл. Табере уксё кисьтоно уз луы ни ӟенелик миськонлы. Коньдон уз быры сое нуыны-вайыны. Но мукет ласянь, алонлэн музон палыз но луыны быгатоз. Шуом, пластик посуда уногес кулэ уз луы-а? Пиялаез пызьлы пӧрмытӥсь пунктъёс усьтыны уго секытгес. Сое пыргытон но копейка сылоз, озьыен, костаськись ӟенеликъёс нокинлы кулэ уз луэ ни.

Чехиын вань посудазы олокӧня пол кутӥське. Адямиослэн отын пичи дырысен йырвизязы пыӵатэмын: пиялаез огаз мульдае, картонэз мукетаз поно. Нош асьме доры ку сыӵе цивилизация вуоз? Асьмеос дышетэмын ӧвӧл кампет бумагамес гинэ но куркуянэ куштыны. Буш бутылкамес пильыса кельтӥськомы ай. Озьыен, урамъёсмы уката уз кыжме меда?

Оскыны гинэ на кыле: берло юанэз сэрттон-пертчон сярысь кун ачиз ик сюлмаськоз. Али ик кылӥське ни: 2012-тӥ арын Сарапулын усьтӥськоз жуг-жагез утялтонъя завод. Ёрослэн йырыз Игорь Асабин верамъя, татын нимаз висъялозы пиялаез, кортэз, клеёнкаез но мукетсэ. Соку гинэ соосты пыргытӥсь-кизертӥсь машинаос улэ понозы. Зын но кырсь омыре уз потэ, пе.

 Елена Сараматова.

Удмурт Дунне
By Удмурт Дунне 8 ноября, 2011 10:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<