Мар со хайп? Мар со свэг?

Удмурт Дунне
By Удмурт Дунне 16 ноября, 2011 10:20

Мар со хайп? Мар со свэг?

Кирилл Рэм Никитин — Иж понна легенда. Адями, кудзэ клуб удысын бергасьёс пӧлын тодӥсьтэмез ӧвӧл. Ижысь уй улонэ пыриз 90-тӥ аръёсы, нырысь ик Electrodinamique но Piezo электро но техно проектъёсыныз. Synthepon Allnighters, The Sekta промо-группаослэн атайзы. «Авиатор», «БВИ» но уно мукет клубъёслэн резидентсы. Кусып тупатӥсь, герӟась, эш — солэн тыршемезъя Ижысь букинг* данъяськыны быгатэ таӵе нимъёсын: The Proxy, John B, Mujuice, Pompeya, Taras 3000… Кириллэн улоназ выль вакыт кутске: ӝоген со кышноеныз Санкт-Петербурге улыны выжоз. Иж сярысь эсэпланъёссэ тодон понна пумиським-кенешим.

— Кирилл, кызьы тон малпаськод, мар воштӥськиз электрон крезьгурын, 2011-тӥ ар лыктэмен?

— Мон крезьгурез электроннойлы но электрон луисьтэмезлы люкемысь дугдӥ. Туала крезьгур сокем трос — соин но, лэся, ӟечлыксэ валан туж субъективной луэ. Умоез уно, нош конкуренция эшшо но золгес. 2011-тӥ арлэн трендъёсыз* пӧлысь мыным тросэз кельше. Ӟеч диско — MR.INTL, Hercules and Love Affair, ӟучъёсыз пӧлысь — Lipelis, Simple Symmetry. Куке ваньзы акыльтӥзы нью-рейв тулкымлэсь но каллензэ электрон крезьгурез шудыны кутскизы, ачим сярысь вераны быгатӥсько ни: дип-хаусысь но утчасько рэйв!

Али, оглом учконо ке, 1989-1992-тӥ аръёсысь тенденциос берытско: крезьгур чурытгес, агрессивнойгес луэ, bpm* ӝоглык ӝутске. Тодады вае ай Prodigy группалэсь нырысетӥ альбомзэ. Али маке UK hardcore выллем кылдыны кулэ.

Ижлэн аслаз крезьгуро историез, аслаз азинскон сюресэз. Туннэ нунал маиныз тунсыко?

— Ижлэн электрон сцена вылаз али номыр уг кылды. D-Pulse бере номыр паймымонэз ӧз вордӥськы, шуыны луоз. Мон висъясал инди-сценаез. Татын выль нимъёс пото: Flower in her head, Silent Woo Goore, Sergio Manifesto and Kings of RA… Тунсыко улэп крезьгур шудо.

Азьвыл уго вал кыӵе ке кар кылдытӥсь лэйбл — KAMA records — со котыр биниськизы крезьгурчиос, поттазы альбомъёссэс. Али уждэ мытыны секыт, кин кытын гожтэ альбомъёссэ: Сережа Манифесто — Франциын, Андрей Спортлото — Англиын, Антон Лански — Германиын. Ваньзэсты гажало но дунъяло. Нош татын асьме музыкантъёс ог-огзэс воксё но уг тодо.

Нимын-нимын вералом-а? Паша Sigmatic, «113 друзей» промо — чебер, тузӥ диско, хаус. Соин ӵош шудо Fugo, Andy Moon, Сережа Булдаков.

Андрей Рублев, Sportloto — со мыным воксё атай кадь. Вань ужъёссэ куштыса, 8 толэзь куспын альбом гожтӥз. Пофиг:  анай-атаез сюдӥзы. Робин Гуд! Со кизили луоз, адӟоды ай. Ижкар сое ыштӥз ке, сирота кылёз.

Смолы crew — бас-крезьгурез вӧлмытӥсьёс. Никита Kitsun, Данил Буров. Тужгес дуноез туннэ нуналлы — The Sekta — сектамы. Ми яратӥськом пӧртэм крезьгур. Мед гинэ со калыкез шулдыртоз, эктон мылкыд пуромытоз. Валтӥсь юрттӥсьёсы — Саша Yesnomonkey, Alex Snow. Ижкар — Россиысь клуб улонэз гажась  валтӥсез инты.

— Туннэ кызьы валэктысалыд крезьгурен тунсыкъяськемдэ?

— Мон будэмын та пӧлын. 1992-тӥ ар. Мон егит пияш ай, поръясько Ижын 4-тӥ микрорайонтӥ. Одӥг укно пыр шуак чузъяськыны ӧдъяз Kraftwerk, культовой немец группа. Мон утчай со квартираез, йыгаськи. Чувак, шуисько, гожты кассетае! Куронме быдэстӥз. Озьы азинскиз. Собере анаен Муское ветлӥмы, отын Prodigy концертэ шеди. Анае 90-тӥ аръёсы праздникъёс радъян удысын ужаз. Солы тау карисько, стробоскоп кылэз тодэме понна. Ӧр борсьы ӧр: breakbeat — jungle — d’n’b — hardcore — визьмо electro но визьмо лэйблъёс. Но яратоно продюсере али ке но Canblaster. Hot Сreations, Art Department, Джейми Джонс, Night Slugz. Электроклэш.

— Озьыен, тон будӥд. Таин-а герӟаськемын мукет городэ выжемед?

— Мыным уг кельшы, татысь мон Берлинэ лобыны но отысь уикендэ шедьыны уг быгатӥськы шуыса. Луонлыкъёс ӧвӧл. Уг оскиськы, интыысь вузъёс пиналэлы но оскымон вылӥ дышетскон сётозы шуыса. Мукет ласянь, мынӥськом фан-капчи мылкыд но выль тубат-вамыш понна. Эшъёсме уг кушты. Иж понна озьы ик ужало, тыршо, диджей экспортэз радъяло. Асьме егитъёслы но капчигес луоз шоркаре потаны, Иже но выль нимъёс вуозы.

— Мар юрттӥз тыныд сомында ар пушкад возьыны со кужмо мылкыддэ, кудӥз нимаське хайп, свэг — дарт?

— Мыным Ижын — тунсыко. Та туж аспӧртэм город! Мон улӥсько таӵе малпанэн: мон ке ӧй, кин лэсьтоз? Иж мыным троссэ сётӥз. Мон но солы сётыны дась. Монэ дышетӥзы Ижын нырысетӥ клубъёсты усьтэм адямиос: «Ряба Мутант», «Virgo Intacta», Андрей Захаров An-2. Туннэ крезьгурез арбериез сямен адӟо: со шоры учко дӥсь, духи, сиён шоры кадь. Туннэ дабстэп, ӵуказе постдабстэп. Кин мукет учконэн улэмын, со пыраклы пушказ кылёз — крезьгур пушкы.

 * * *

Тренд — модаысь яке мукет удысысь синадӟымон амал, арбери, выльысь берытскем сям-йылол.

Букинг — диджейёсты но крезьгурчиосты ӧтчан-радъян.

Bpm (англ. beats per minute) — минут куспын четвертной ноталэн шуккем лыдыз.

Вераськиз Лели.

Быдэсыз вераськон www.disconoize.blogspot.com бамын

Удмурт Дунне
By Удмурт Дунне 16 ноября, 2011 10:20
Write a comment

2 комментария

  1. Kirill Rem 24 ноября, 15:59

    Православно!

    Reply to this comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<