Малэсь мӧзме капитан Симонова

Удмурт Дунне
By Удмурт Дунне 11 ноября, 2011 12:59

Малэсь мӧзме капитан Симонова

Глаз ёросысь Посошур гуртын вордскем Оксана Волкова (табере Симонова) пичи дырысеныз будӥз, тетрадь эскерыса. Анаез уго дышетӥсь вал. Глаз пединститутэз йылпумъямез бере школаын ужаз. Озьы Оксана но йырзэ мултэс ӧз тӥя, кытчы мыноно шуыса. Пыриз пединститутысь школалэсь азьвыл дышетонъя факультетэ. Тодон-валан люказ мыло-кыдо, нокыӵе канжаськонъёсыз ӧй вал.

Нош огполаз берпуметӥ курсэ вуэм студенткаез волонтёр чотын ужаны ӧтизы Глазовысь югдурез утёнъя ёзэ. Быдэ вуымтэ йыртэмасьёслы, пе, визьмасьёс уг окмо. Выль уж Оксаналы тунсыко потӥз. Формаен адямиос сыӵе рос-просэсь. Уката Оксана синмаськиз быдэ вуымтэосын ужась инспекторлы Татьяна Байковалы. Кӧня адями сое тодэ, кыӵе гажало сое районаз улӥсьёс. Нылмуртлэсь таӵе мылкыдзэ шӧдыса, милициысь тодмоосыз уката бурдъязы: институт бере ми доры ужаны лыкты.

Оксана озьы ик кариз. Диплом басьтӥз но шонерак тодмо РОВД пала кожиз. Нош татын шумпоттыны ӧз дыртэ: буш интыосмы ӧвӧл, пе. Кӧня ке улыса, пыр, шуизы. Оксана нош ик возьмаз. Озьы гужем но ортчиз. Эшъёсыз уже интыяськылӥзы ни, нош со весь вите. Таӵе тяпайтэмезлы аслаз ик вожез потӥз. Милицие кулэ уг каро бере, иське, нылпи садэ ик мыно, юнме шат дышетски, малпаз. Уката ик огаз садын солы ӵектӥзы бассейнысь инструкторлэсь ужзэ: пиналъёсты уяны дышетод, пе. Оксана вань медосмотръёсты ортчиз, ӵуказеяз уже потоно ни, нош мылкыдыз куашкамын. Луэ-а сыӵе кунэрес тусын пиналъёс доры вамыштыны? Нылмурт аслаз малпанэзлэсь куалектӥз но чигназ — нылпи садэ ӧз мыны.

Глазысь югдурез утёнъя ёзын шыпыт улӥзы, Оксаналы жингыртӥсь ӧй вал. Нылмурт Красногорск районысь ОВД-е но вуылӥз — оло, татын ужасьёссы уг окмо. Таяз учыре но сое шумпоттӥсь ӧй вал. Дор палъёсызлы матэ кыльыны шуд ӧз пишты бере, Оксана Ижысь уж утчано кариськиз.

Шоркаре вуыса, долказ: татын 5 РОВД! Справочникысь нырысетӥ телефон номерез бичаз но Первомай ёрослэн ёзаз шедиз. Уж утчамзэ вераса вуттӥз гинэ — сое лыктыны косӥзы. Оксана воксё паймиз шуак ӧтемзылы. Мукет телефонъёсъя жингыръяса но ӧз ни выры, ӵуказеяз ик Первомай РОВД-е лобатӥз. Кадръёсъя отделлэн кивалтӥсезлы со вераз Глазовын уж утчамзэ но,  быдэ вуымтэосъя ёзын волонтёрын тыршемзэ но. Татын туж сак кылзӥзы но районысь ПДН-лэн кивалтӥсез доры келязы. Собере ваньмыз туж шаплы радъяськиз: тест, эскерись комиссия… Озьы 2002-тӥ арысен Оксана инспектор луыса ужаны кутскиз. Вылӥ образованиен муртлы, ӝыны ар ортчыса ик, лейтенант звание сётӥзы ке но, погонъёссэ бырттыны нокытчы вал — форма сётӥзы ай, ар ортчыса гинэ.

Инспекторлэн ужез — кабинетын пукон ӧвӧл. Со тодыны кулэ аслэсьтыз участоксэ, отысь семьяосты но пиналъёсты. Оксаналэн йырвисёнэз луизы механикая завод котырысь 7 общежитиос. 5 ар ӵоже со уно пол пыраз, кенешылӥз анай-атайёсын, быдэ вуымтэосын. Ачиз но шӧдыса ӧз вуы, сое ульчаын тодманы кутскизы. Пумитаз вазё, кудддыръя кыдёкысен ик юало ни: «Кыӵе ужъёсты, Оксана Александровна?» Озьыен, ужан нуналъёсыз солэн юнме уг ортчо, районын улӥсьёслы со пайда вае, пиналъёссэс кырыж сюрес вылэ кожонлэсь утё.

Ёросаз мукетыз но сюлмаськытӥсь инты вал на — быдэ вуымтэосты визьманъя нимысьтыз училище. Таӵеез республикаямы одӥг гинэ. Татчы вутто быдэс Россиысь йыруж лэсьтэм пиналъёсты. Но таоссэ уг дырто келяны колониосы, соосын ужало психологъёс, тыршо пиналъёсты шонер сюрес вылэ берыктыны. Соин валлин училище ӝужыт кенерен но котыртэмын ӧвӧл. Нош мӧзмись пиналъёс доразы кошкыны малпало, спецучилищеысь пегӟо, сюрес вылэ коньдонзы ӧвӧл. Озьы Ижысь ульчаын нош ик кинлэсь ке коньдонзэ, телефонзэ талало. Оксана быгатӥз та пиналъёсын но ужаны, тупаз училищеысь кивалтӥсьёсын но.

Пединститутын басьтэм тодон-валанэз егит муртлы мултэс ӧз луы. Республикаямы котькуд школаосын инспекторъёс юнматэм бере Оксаналы но шокчыны маза ӧй вал. Пӧртэм классъёсын кенешонъёс радъяно. Со сяна, нуналмысь ужез но вунэтоно ӧвӧл.

Инспекторлэсь тыршемзэ синйылтытэк ӧз кельтэ Первомай ёрослэн администрациез но, республикаысьтымы МВД но — Оксаналэн трос люкаськизы ни таукаронъёсыз. Нош туэ нылмуртэ уката дунъязы — Удмурт Республикаысь быдэ вуымтэосын ужанъя устоез инспектор луиз со. Таин валче ужан тубатэз но будӥз — табере капитан Симонова чакла  Ижысь инспекторъёслэсь ужзэс, отчётъёсын, статистикаын бугыръяське. Пумен юнгес мӧзмыны ӧдъя азьвыл ужезлэсь — ӧсэ йыгаськонлэсь, «Мон тӥляд инспекторды — Оксана Симонова» кылъёслэсь. Озьы ке но туннэ но Оксана Александровна уг быгаты котькуд ӝытэ нылпи садэ мыныны — отысь нылзэ басьтыны. Таиз уж ӵемгес оскемын кузпалызлы. Уго полициын уг возисько нуналаз 8 часлы ужаны лыктэмъёс. Югдурез утисьёс яратоно удыссы понна «висё» уй но нунал.

Елена Скворцова.

Туспуктӥз Владимир Беломорских.

Удмурт Дунне
By Удмурт Дунне 11 ноября, 2011 12:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<