Кылдэмын ог-огзылы

Удмурт Дунне
By Удмурт Дунне 30 ноября, 2011 09:53

Кылдэмын  ог-огзылы

Тамара но Иван Плотниковъёс уло Можга ёросысь Новый Русский Сюгаил гуртын. Кузпалъёс куать нылпи вордӥзы. Кема аръёс ӵоже тупаса улэмзы но ӟеч нылпи будэтэмзы понна Плотниковъёсты туэ гужем пусйизы Россилэн наградаеныз — «Яратон но оскон» медален.

8-тӥ июне Россиын пусъё Семьялы, яратонлы но осконлы сӥзем нуналэз. Соин валче шаерысьтымы дас семьяен ӵош Тамара Геннадьевналы но Иван Глебовичлы медаль сётӥз Удмурт Республикалэн Президентэз.

Иван Глебович физкультурая дышетӥсь, йылпумъяз Удмурт кун университетэз. Тамара Геннадьевна дышетскиз Глазовысь пединститутын. Кӧня ке арзэ школаын ужаз, собере муниципал кылдытэтлэн кивалтӥсезлэн юрттӥсез вал. Али пенсиын ни.

— Пиналъёсмес будэтонын нокыӵе шуг-секытъёсты ӧм адӟе, — шуэ анай. — Гуртамы нылпи садмы ӧвӧл, утиськыны нокинлы вал. Но соос ог-огенызы возиськизы. Куспамы куаретыса ум улӥське, пиналъёсынымы но лякытэн вераським. Озьы ик будӥзы, дышетскизы. Быдэ вуэмзыя  ини сюлмаськонъёс будо.

Плотниковъёслэн ваньзы ик  пиналъёссы Можга педучилищелэсь лицейзэ йылпумъязы, собере дышетсконзэс азьланьтӥзы университетъёсын. Максим но  Ульяна УдГУ-эз йылпумъязы, Юра — ИжГТУ-эз. Оляен Лена дышетско на, одӥгез — ИжГТУ-ын, мукетыз — УдГУ-ын. Бордазы пичиез пизы кылиз на, Алёша укмысэтӥ классын дышетске.

Тамында нылпиез будэтыны но дышетыны трос кужым кулэ. Вань осконзы — атайзылы. Ма, пиналъёссы но котькыӵе ужын мумы-бубызылы юртто. Огвакытэ Плотниковъёс куинь скал вордӥзы, али одӥген но, пе, тырме. Асьсэлэн музъемзы вань, отын турын будэто.

Семья улонын кузпалъёс оско асьсэлы но вылӥ кужымлы. Нылпиоссы вордӥськем бере соос кусыпъёссэс черкын герӟазы.

Лия Малых.

Удмурт Дунне
By Удмурт Дунне 30 ноября, 2011 09:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<